Bo final

O Compos puxo o punto final á tempada coa cuarta vitoria a domicilio do curso. Un triunfo sen nada en xogo ante o Barbadás nun partido sen apenas intensidade e que non contou con goles ata o segundo tempo con remontada incluida dos nosos e un penalti parado por un Lorenzo que deixou boas sensacións na despedida do curso.

Pero este partido ten outro significado ademais de ser o final da campaña. Dous finais emotivos e importantes. Máis alá de ser o adeus a unha tempada de transición e aprendizaxe, puidemos vivir o final das carreiras de xogadores que pasarán á historia do noso equipo como son David Rey e Cabrejo, dúas novas lendas que puxeron os seus nomes na historia branquiazul con letras de ouro logo de longas carreiras.

Pouco máis que un amigable. 

Sen nada importante polo que loitar máis que pechar a tempada cun bo sabor de boca, Barbadás e Compos non puxeron tódalas súas cartas sobre a mesa durante o primeiro tempo. Corenta e cinco minutos de igualdade e sen ocasións máis que algunha que outra xogada a balón parado, sobre todo por parte do conxunto branquiazul.

Nin con dous dianteiros no once titular, Santi e Nogueira, chegaron as ocasións con facilidade sobre a portería ourensá sobre un terreo de xogo case descoñecido polos nosos, de herba artificial e que provocou complicacións no xogo do equipo de Yago Iglesias. 

E chegaron os goles. 

Logo dun mal primeiro tempo, a segunda metade arrincou cun ritmo superior e, por sorte, con goles. Só un minuto houbo que agardar para ver ao Barbadás adiantándose no marcador grazas a un gol de Igor coa cabeza logo dun centro dende a banda. 

A superioridade no luminoso por parte do conxunto local durou algo menos de cinco minutos. O Compos mellorou notablemente e puxo en serios problemas á defensa do Barbadás. Tanto foi así que, cun gran centro de Mon, chegou o empate cun gran gol de Cardeñosa superando á zaga local por alto. 

Xa sen David Rey sobre o campo, que tivo os seus últimos minutos coma profesional, chegou o segundo gol dos nosos certificando a remontada e a vitoria. Inmellorable asistencia de Diego Rey para Samu e este supera ao porteiro cun disparo ao pau longo. Bo premio para o centrocampista, que volveu ao once titular. 

Logo dunha merecida remontada, chegou un posible pau para os nosos transformado en pena máxima de Ander sobre un home local. E aquí aparece a nota curiosa do encontro. E é que Berto, porteiro do Barbadás, foi o encargado de lanzar o penalti. Por sorte, baixo paus apareceu Lorenzo para salvar o que puido ser o tanto do empate. 

E chegou o fin. 

Hai case 9 meses comezou en Abegondo a tempada 2016/17 cunha derrota do Compos ante o filial do Deportivo. Máis de 3.400 minutos de fútbol oficial despois, o equipo pecha unha nova tempada co sétimo posto asegurado e a mente posta en mellorar a vindeira tempada, onde o obxectivo debe ser moi superior. Unha tempada, a 17/18, que non contará sobre o campo de San Lázaro con Cabrejo nin David Rey mais na que se gaña a dous seareiros máis. 

Agora mesmo só queda unha cousa por dicir a xogadores, corpo técnico, directiva e demais xente que forma a familia branquiazul: GRAZAS!

ALIÑACIÓN: Lorenzo; Saro, David Rey (), Cardeñosa, Taboada; Samu, Mon; Diego Rey, Make, Nogueira (); e Santi.  

CARTÓNS: Amarelos para Ander, Cardeñosa, Rubén e Mon.

GOLES: 1-0 46' Igor, 1-1 51' Cardeñosa, 1-2 59' Samu.

CAMPO: Os Carrís.

Pensemos noutra cousa

Chega o final da tempada para un Compos que chega xa co obxectivo no peto. Será, ademais, a derradeira saída do curso nun partido adiantado ao resto da xornada ante o Barbadás, tamén sen nada por xogarse máis que unha boa imaxe na súa última cita ante a súa afección.

Tampoco hai que esquecer que nos Carrís se poderá vivir o final de dúas carreiras importantes na historia do noso equipo confirmando xa as dúas primeiras baixas de cara á vindeira tempada, na que xa hai que pensar co obxectivo do ascenso.

Nada que mellorar.

O Barbadás chega a este final de campaña sen posibilidades de mellorar a súa posición na táboa. Décimo, o equipo ourensán suma 50 puntos, salvado matematicamente aínda habendo un sexto descendido de perder a categoría o Boiro. Ademais, pode presumir de ser o equipo que máis empates asinou ao longo da tempada (14) e de só quedar sen puntuar nunha ocasión nos Carrís, ante o Silva.

Un dos equipos máis febles a domicilio, conseguindo só 15 puntos de 57 posibles gañando en tres ocasións, é por contra o segundo que máis veces puntuou na casa, aínda así sen ser un dos que máis puntos fixo. 9 vitorias, 8 empates e 1 derrota nun campo onde Racing Vilalbés, Depor B, Cerceda e Bergantiños non foron quen de puntuar sequera sendo só Rápido de Bouzas e Arousa os equipos da zona alta capaces de facerse cun punto.

En canto a goles, non se trata dun dos equipos que máis ve portería (44). De feito, só cinco equipos da categoría suman menos goles ca o Barbadás. Por contra, recibiron 46 goles. De todos eses tantos, na casa anotaron 28 e encaixaron 18 sendo un equipo difícil de superar en terras ourensás. 

A nivel individual hai varios xogadores que destacar. Comezando polo ex do Compos Germán, unha das pezas importantes no ascenso a Segunda B, hai que sumar a xogadores coma Alfredo, con 8 goles ata o momento, e Rodrigo Parreira, autor de 12 tantos nos 37 partidos que levamos este curso.

Segunda visita.

Ata o de agora, o Compos só visitou Os Carrís nunha ocasión, que rematou con vitoria santiaguesa. Ese partido data de abril do 2013 e a Esedé volveu cos tres puntos grazas a un solitario gol de Marcos Suárez. Un partido cun mal primeiro tempo onde Fredi buscou sorprender ao Barbadás con ata seis defensas.

A ese resultado hai que sumar tamén os outros dous colleitados en San Lázaro, onde o Compos conseguiu gañar en ámbalas dúas citas contra o conxunto ourensán. Dous partidos, en 2012 e na primeira volta desta mesma tempada en decembro de 2016, onde os nosos conseguiron o mesmo resultado nas dúas citas: 2-0.

O empate, o esperado.

Agora mesmo, tal e como están as cousas, o máis normal sería que este partido rematara con reparto de puntos. De feito, tanto o Barbadás na casa coma o Compos a domicilio suman 8 empates cada un. Se a iso lle engadimos que o noso equipo só coñeceu a vitoria lonxe da casa en tres ocasións, sempre con dificultades, e que o que será o equipo local só permitiu unha derrota, as cousas non permiten pensar agora mesmo en algo máis positivo.

Só de Ribadumia, Cangas e Ordes se puideron traer os tres puntos nunha campaña onde gañar fóra de San Lázaro volveu ser a materia pendente do equipo branquiazul. Un equipo que, ademais, sumou 8 empates e caeu noutras 7 ocasións, con goleadas tan importantes coma o 5-1 en Abegondo.

Como xa dixemos antes, dos Carrís saíron ata 11 puntos en forma de 8 empates e só unha derrota. Nove resultados que non deixaron aínda así malas sensacións a un equipo que na casa encaixou 18 goles quedando sen marcar en tres ocasións, pechando dous empates sen goles e outro con derrota por 0-3 ante un Silva forte a domicilio.

Vitoria do Compos, derrota do Barbadás.

A pasada xornada rematou con resultados moi diferentes para os dous equipos, non así ao mellor nivel ningún. A cara, para o Compos, a cruz para un Barbadás que se viu superado ante un xa descendido que dixo adeus á categoría na casa coa cuarta vitoria da tempada.

Un Compos a medio gas superou ao Negreira nun partido marcado, en gran parte, polas despedidas na casa de David Rey e Cabrejo. Partido sen emoción, sen nada en xogo, sen intensidade, e que se pechou cun gol de David Nogueira.

O Barbadás, polo seu lado, non saiu con nada positivo da súa visita ao Municipal de Bembibre. O Dubra puido darlle unha última boa nova á súa afección na última cita do equipo na casa. Un partido onde os de amarelo chegaron a poñerse 2-0 na segunda metade. Suárez recortou diferenzas, Mariño anotou o terceiro para os do Val do Dubra e Novoa, no engadido, asinou o 3-2 definitivo para un Barbadás que non gaña dende o 2 de abril ante o Ribadumia conseguindo 4 empates nos 5 últimos partidos. 

Agora si, chega o fin. 

Unha e outra vez hai que lembrar que este sábado será a última ocasión na que poidamos ver sobre un terreo de xogo a nivel profesional a Juan Cabrejo Pasantes e David Rey Ameijenda. Dúas baixas de cara á tempada 17/18 importantes, dúas retiradas e un partido importante á par que emocionante. 

En canto ás baixas para o partido, Yago poderá contar con todo o equipo agás Tomás. O centrocampista vigués mancouse hai xa algo máis de dous meses en Carballo e, malia contar coa súa baixa entre dúas e tres semanas, non volveu entrar nunha convocatoria adestrando dende hai pouco co resto dos seus compañeiros. 

Tingamos Os Carrís. 

O partido será o sábado ás 18:30 horas no Campo Municipal dos Carrís, en Barbadás. Un partido para o que o equipo ourensán, con intención de darlle unha boa despedida aos seus, porá entradas a 5 euros para todos e de balde para menores de 14 anos. 

Quen non poida asistir ao encontro poderá seguilo a través das diferentes redes sociais da Curva Branquiazul, Facebook e Twitter, así como no perfil oficial do clube en Twitter.

E bo domingo. 

Sen nada que ver co noso equipo, o domingo será un día clave para coñecer máis datos de cara á vindeira tempada. Ás 18 horas comezará o final tanto da Segunda B, onde esperamos un bo final para o Boiro, que depende de si mesmo para salvarse, algo que pasaría se superan ao Burgos en Barraña, coma da Terceira. Na nosa categoría saberemos cal será o quinto descendido e o cuarto clasificado para a promoción de ascenso ademais de saberse se haberá un sexto equipo que perda a categoría rumbo á Preferente, algo que depende do resultado do encontro en Barraña.

Grazas!

O Compos volveu ao camiño dos tres puntos en San Lázaro ante o Negreira. Un partido sen case intensidade onde os dous equipos, sen nada en xogo máis que un bo final de tempada, tiveron opcións de levarse os tres puntos, que quedaron na casa grazas a un gol de Nogueira. 

O partido non será recordado por un bo xogo mais pasará á historia do clube xa que nel puidemos vivir dúas retiradas importantes. Dúas despedidas de dous xogadores que aceptaron a chamada do Compos o pasado verán e nos deixaron boas leccións de fútbol durante este curso. Dous homes, David Rey e Cabrejo, aos que só lles podemos dar as grazas por tanto o que fixeron non só polo noso equipo senón tamén polo fútbol galego.

Superiores sen case perigo. 

Durante o primeiro tempo, o Compos foi superior a un Negreira que tivo que realizar dous trocos obrigados nos quince primeiros minutos de xogo. Pouco máis pasou nos primeiros intres dun encontro onde os nosos foron donos da pelota ante un equipo que se limitou a defender no seu campo e buscar a porta de Lorenzo á contra, forma da que conseguiron levar máis perigo que os nosos durante a primeira media hora de xogo con Chiño e Jacobo Tato probando ao seu ex equipo. 

Ritmo e intensidade baixos nun encontro que tivo o seu único gol superada a media hora. Pase de Saro en profundidade dende o centro do campo para Nogueira que recibe no punto de penalti. O dianteiro da capital só tivo que definir a un lado aumentando a súa conta de goles esta tempada. 

Tralo gol, Jacobo Tato tivo outra máis perdoando ante Lorenzo mentres que Taboada non foi quen de bater ao porteiro do Negreira cun disparo dende fóra da área. 

Igual segunda parte. 

Se xa o primeiro tempo non tivo moita emoción, o segundo non foi para menos. Pouca intensidade, pouco fútbol e algunha que outra ocasións nas dúas porterías que ben souberon solventar os dous porteiros. Tamén hai que engadir a mala nova do partido que chegou coa lesión de David Uña.

Trocos, interrupcións e poucas oportunidades de gol sobre o campo de San Lázaro onde o mellor estaría por chegar, logo do asubío final dun partido que chegou ao minuto 95. Cabrejo e Saro tiveron nas súas botas o segundo gol branquiazul mentres que o ex da Esedé Ángelo estivo a piques de empatar mandando un balón ao longueiro no treito final. 

Moitas emocións.

Sen dúbida, o mellor chegou ao final. Rematou o encontro e comezou a emoción. Manteos, fotos, celebracións... David Rey, que foi capitán, e Cabrejo despedíronse da que foi e sempre será a súa casa. Un momento que se podería repetir o vindeiro domingo en Barbadás cando si se confirmará totalmente a retirada destas dúas xa lendas do Compos. 

ALIÑACIÓN: Lorenzo; Saro, David Rey, Uña (Cardeñosa, min. 61), Cabrejo; Taboada, Mon; Diego Rey (Ander, min. 72), Samu, Recoba (Santi, min. 64); e Nogueira.

CARTÓNS: Amarelo para David Rey.

GOLES: 1-0 34' Nogueira.

CAMPO: San Lázaro.

Chega o fin

Este domingo chega a despedida oficial do Compos 2016/17 en San Lázaro. O último partido dos nosos na casa nesta campaña e que, esperemos, signifique a volta do equipo á vitoria despois de catro xornadas sen puntuar de tres, e mes e medio sen deixar os tres puntos na casa. Ademais, recibiremos a un Negreira sen nada en xogo nun partido case considerado como un derbi.

Unha semana despois de perder as opcións definitivas de entrar na promoción por parte do Compos e de asinar de xeito matemático a permanencia, agás sorpresa dende a Segunda B, o Negreira, os dous equipos chegan a esta penúltima data do campionato sen nada polo que loitar máis que rematar a tempada deixando boas sensacións e un bo final que recordar.

Permanencia sen problemas.

O Negreira non pasou por problemas para certificar o seu obxectivo esta tempada. Nunha tempada onde a permanencia non está a ser doada para moitos equipos, xa que este ano cóntase con cinco postos de descenso, os equipos tiveron que achegarse aos 50 puntos para non pasar problemas. E así foi o que tivo que facer o conxunto negreirés para afrontar este final pensando xa na seguinte campaña.

Con José Manuel Pose á fronte do equipo vermello, asinaron a permanencia grazas a un empate con moitos goles a pasada fin de semana no García Calvo ante o Dubra. De feito, na casa conseguiron 32 dos 49 puntos que suman ata o de agora perdendo só dous partidos contra Silva na primeira xornada e Deportivo B hai un par de meses. Contan tamén con vitorias importantes como a conseguida ante o Racing Vilalbés (4-0) sendo un dos poucos equipos capaz de sacar tantos puntos contra rivais da zona alta da táboa.

50 goles avalan a un equipo con moito gol, sexto que máis porta viu, aos que restar 43 goles en contra, segundo que menos tantos recibiu da zona media baixa da clasificación encaixando tamén tres menos que o Compos. Un seguro de gol que conta con só catro partidos con empate sen goles.

A nivel individual hai que destacar a moitos xogadores. Stefan, máximo goleador do equipo con 12 tantos, Capelo, Jacobo Tato, Chiño... e ata seis xogadores con máis de tres goles entre os que chama a atención a presenza do ex defensa da Esedé Ángelo, que suma 5. Tamén hai que contar a outro dentro da historia branquiazul e que agora busca pechar a súa carreira no García Calvo: Pignol, que debutou na Esedé en Primeira.

Na busca da vitoria.

O Compos chegou ao final da tempada con opcións de facer algo importante e entrar na promoción de ascenso. Non obstante, o equipo de Yago Iglesias suma agora catro xornadas sen coñecer a vitoria desfacendo os soños da afección. Tres derrotas contra Vilalonga, Rápido de Bouzas e Cerceda, todas pola mínima, e un empate a 2 contra o Choco deixándose igualar un 2-0, son as razóns polas que este domingo non haberá nada polo que loitar en San Lázaro.

Pola súa parte, o Negreira só conseguiu unha vitoria nos catro últimos partidos. Dous empates ante Alondras (2-2) e Dubra (3-3) e unha derrota pola mínima ante un xa descendido As Pontes só fixeron que a permanencia matemática chegase algo máis tarde. A súa última vitoria, hai tres semanas, chegou na casa ante un Castro que buscará esta xornada manterse con vida na categoría.

Poucos precedentes.

Compos e Negreira case non coincidiron en categoría nacional. De feito, só hai dous precedentes recentes e que sinalan aínda máis ao Compos como o gran favorito. Dous encontros que, ademais, chegaron en tempadas que remataron con ascensos branquiazuis.

No 2008, os dous equipos abriron a tempada en San Lázaro nun partido onde o Compos foi moi superior e no que os goles non tardaron en chegar. Rubén Márquez adiantou aos nosos aos 5 minutos e sete despois foi Claudio quen certificou a vitoria local.

Os tres puntos quedaron tamén na casa en 2013, con Fredi no banco, malia adiantarse o Negreira ao arrinque do segundo tempo. Un gol que axudou ao Compos a irse ao ataque e empatar cun gol de Tachi nun córner. Si tardou algo máis en chegar o segundo tanto, o da vitoria. Foi, quen senón, Joselu o autor do segundo gol no 85 para achegar algo máis a promoción a Santiago.

E xa nesta tempada, na primeira volta, o resultado non puido ser positivo para os intereses do equipo da capital. A primeira vitoria puido chegar naquel partido de decembro cun gol de Cardeñosa logo dun córner no 55 pero Quintairos empatou no 83 deixando un mal sabor de boca para os nosos.

Diferentes chegadas.

A Esedé non pode presumir de chegar a este partido nun bo momento en canto a resultados nin falando do xogo. A última derrota ante o Cerceda deixando unha imaxe moi mellorable demostran que o equipo non está a pasar por un bo momento. Superado en moitos momentos dos partidos, os de Yago Iglesias buscarán volver á vitoria na despedida na casa desta tempada.

Pola súa parte, o Negreira chega de empatar ante o Dubra nun encontro tolo e que puido caer para calquera lado. De feito, o Dubra adiantouse con goles de Mariño e Vieites apenas superados os quince minutos de partido. Dous goles de Jacobo Tato, un deles golazo de falta directa, serviron para empatar e Quintairos fixo o 3-2 a dez minutos para o final. E de novo Vieites atopou o camiño á porta dous minutos máis tarde para pechar un empate a 3 con ata tres goles con pasado na Esedé.

Despedidas a parte.

Sen dúbida hai un home que merece unha despedida a parte. Cabrejo anunciou en redes sociais que deixaría o fútbol ao final desta campaña e ante o Negreira xogará por última vez en San Lázaro en partido oficial. O lateral de Camariñas, que arrincou a súa carreira deportiva hai vinte anos no Compos B, colgará as botas en Barbadás non antes sen recibir o cariño da afección en San Lázaro no que será o seu último partido no campo onde viviu o comezo do que sería unha gran carreira deportiva. Isto será posible logo de cumprir sanción a pasada fin de semana ante o Cerceda por acumulación de amonestacións.
Quen tamén vivirá por última vez como xogador o ambiente de San Lázaro será David Rey. O central de Ordes, que chegou a principio de tempada e que non contou con moitos minutos, terá este domingo tamén a derradeira oportunidade de vestirse de curto no campo onde debutou en 2003 coa camisola branquiazul.
O lateral volverá ao once nun partido especial que, de novo, se perderá Tomás por lesión. Ademais, Make será tamén baixa por problemas musculares. 

Horario unificado.

A Federación xa fixo oficiais os horarios das dúas últimas xornadas e, sorpresa, tódolos partidos serán domingo ás 18 horas. San Lázaro acollerá a penúltima data do campionato, última en Santiago, As entradas para os que queiran asistir estarán a un prezo de 10 euros para non socios e de 5 para rapaces entre 17 e 14 anos.

Quen, por contra, non poida estar no teatro dos soños branquiazul poderá seguir o encontro en directo a través das redes sociais da Curva Branquiazul, Facebook e Twitter, e no perfil oficial do clube en Twitter. Ademais poderá escoitarse en directo na 'Esedé Radio', na web oficial.

Xa nin as matemáticas

Ata aquí. Xa non quedan máis opcións para un Compos que non puido gañar ao terceiro clasificado a domicilio. No Roxo, ante o Cerceda, o equipo non foi quen de conseguir nada positivo logo dun mal primeiro tempo onde os locais foron moi superiores anotando o único gol, obra de Uxío. Mal encontro, frío, e que foi ademais o primeiro de Lorenzo dende a súa volta á Esedé.

Logo do empate do Bergantiños, o Compos chegaba cunha mínima opción de entrar na promoción. Unha opción que pasaba, unicamente, por gañar nun campo onde non se gañou en liga. E un ano máis mantivéronse os puntos en Cerceda logo dun segundo tempo no que os homes de Yago Iglesias non conseguiron nada mellor.

O Cerceda, moi superior. 

O Cerceda foi superior durante os corenta e cinco primeiros minutos de encontro, suficientes para desfacerse do Compos e asinar a súa presenza un ano máis na promoción de ascenso á Segunda división B. Non obstante, a superioridade non levou aos de José Luis Lemos á porta de Lorenzo ata os once minutos, logo dun tempo de posesión no centro do campo sen achegarse con perigo á portería. 

Os minutos foron pasando e a superioridade local foi en aumento chegando con máis perigo á portería branquiazul e á media hora de xogo fixéronse co merecido premio. Centro de Javi Otero ao segundo pau e chega dende atrás Uxío para, cun gran testarazo, facer un golazo. 

Por parte do Compos, só dúas ocasións sen demasiado perigo con ambos centros de Mon que non chegaron a poñer en perigo a portería de Marcos Valín, tranquilo ata o tempo de lecer. 

Algo mellor no segundo tempo.

Mellorar a primeira parte non era moi difícil e aínda así fixeron falta vinte minutos para romper o xogo sen intensidade dos primeiros instantes da segunda metade. Aínda así, metendo ao Cerceda no seu campo, as ocasións non chegaron con facilidade á porta de Marcos Valín, só con xogadas a balón parado e con Mon como protagonista.

A Esedé achuchou a porta de Valín pero faltou, unha vez tras outra, finalizar as ocasións con Santi incapaz de superar á defensa. Tampouco Martín e Nogueira, que entraron co partido avanzado, foron quen de bater ao gardamallas local nun final onde Saro errou ante Valín e no Javi Otero puido facer o segundo logo de irse en velocidade de Lorenzo.

Finalmente, o Compos esgotou a derradeira oportunidade de entrar na promoción esta tempada con esta derrota e só lle queda dar unha boa despedida á afección o domingo en San Lázaro ante o Negreira na que será a penúltima xornada. A última, en Barbadás, tamén será domingo ás 18 horas con horario unificado. 

ALIÑACIÓN: Lorenzo; Saro, Cardeñosa, Taboada, Uña; Ube, Mon; Diego Rey (Make, min. 63), Recoba, Rubén (Nogueira, min. 73); e Santi (Martín, min. 80).

CARTÓNS: Amarelo para Santi e Recoba.

GOLES: 1-0 30' Uxío.

CAMPO: O Roxo.

Enfrontamento entre grandes

Compos e Cerceda terán este luns un partido importante no Roxo. O noso equipo chegará xa sen opcións matemáticas de clasificarse para a promoción de ascenso mentres que os locais loitarán por manterse entre os tres primeiros, aínda con opcións de facerse co primeiro posto, e certificar a súa presenza na promoción de xeito matemático, xa que está virtualmente clasificado ao igual que o Rápido de Bouzas co que comparten puntos.

Encontro entre dous históricos galegos na terceira ocasión que a Esedé visitará O Roxo en partido de liga coa intención de sumar a súa primeira vitoria en Cerceda e que chega nun mal momento para o noso equipo logo de non gañar nas tres últimas xornadas perdendo as opcións de rematar entre os catro primeiros. Dous dos equipos con máis gol. Uxío contra Lucas. Moitas cousas que chaman a atención nesta cita que pechará a xornada o luns 1 de maio, día festivo.

Gran segunda volta.

O Cerceda ten xa na súa man o billete para a súa cuarta promoción de ascenso consecutiva, duodécima na súa historia e que semella ser a definitiva para acadar o seu primeiro ascenso á Segunda B da historia. Ante o Compos terán que asegurar a súa presenza, para a que precisan dous puntos máis, e poderían meter man no segundo posto, polo que empatan co Rápido de Bouzas, e case achegarse ao primeiro, para o que non dependen de si mesmos e que podería certificar o Deportivo B na penúltima xornada.

O equipo cercedense é o segundo equipo con máis vitorias e máis goles a favor, só superado polo Fabril, e o cuarto con máis derrotas e con máis goles recibidos. Un equipo forte e que na casa iguala en puntos á Esedé (39) logo de sumar só dúas derrotas ante Rápido de Bouzas e Choco e tres empates rematando só un partido sen goles, sendo o único encontro do equipo cercedense sen ver portería na casa.

Gran culpable do bo momento deste Cerceda de José Luis Lemos é Uxío. O dianteiro de Lugo é o máximo goleador do equipo e da categoría con 25 goles facendo 16 ante a súa afección. Un dianteiro que estivo nas axendas de equipos como o Boiro ou o Compos a principio desta mesma tempada.

Seguros de que haberá gol.

Se non era suficiente que o Cerceda marcou sempre nos seus partidos como local agás no empate sen goles ante o Negreira, o Compos tamén se perfila como un seguro de gol a domicilio, onde as vitorias non chegan con facilidade.

Malia sumar só 17 de 51 puntos posibles lonxe de San Lázaro, o equipo de Yago Iglesias anotou en tódalas súas saídas agás ante Racing Vilalbés (2-0), Rápido de Bouzas (1-0) e Arousa (0-0). Unha mostra máis de que este ano, aínda sen ter un goleador claro, o equipo non ten problemas para ver portería. A todo isto hai que engadir que o noso equipo só conseguiu tres vitorias a domicilio este curso, todas na segunda volta, en Ribadumia, Cangas e Ordes, e oito empates ademais de seis derrotas.

A por un bo final.

Sen nada en xogo xa, o Compos terá na súa man volver ao camiño da vitoria logo de tres xornadas sen gañar. Con nove puntos en xogo, o equipo da capital buscará en Cerceda a primeira vitoria en Liga no Roxo, onde só puido conseguir un empate en dous encontros. Un partido no que, ademais, o Cerceda buscará remontar o resultado da primeira volta, onde gañou a Esedé.

A primeira visita chegou en 2008 e rematou con empate a un gol, obra de Claudio para os nosos. E catro anos máis tarde o resultado foi moi diferente. A Esedé volveu sen nada do Roxo grazas a un gol de Vía Rápida, que foi suficiente para superar aos nosos, que rematarían a tempada cun ascenso.

A eses dous resultados hai que sumar o da primeira volta, en San Lázaro, onde o Compos gañou pola mínima grazas a dous goles de Tomás en once minutos e onde Marcos Caridad recortou diferenzas con polémica nunha segunda metade onde puido pasar de todo.

Fóra da liga, en Copa Deputación, si que podemos contar unha vitoria no Roxo ante o Cerceda. Jimmy e Orbegozo anotaron os goles branquiazuis mentres que Capelo pechou o 1-2 definitivo que deixaba aos nosos nas semifinais do torneo onde se caeu contra o Somozas.

8 puntos de diferenza.

Nas tres últimas xornadas, onde se decidiu practicamente todo na parte alta da clasificación, o Compos perdeu ata oito puntos que o afastan da promoción de ascenso definitivamente. Só un empate neste final no que pasou de depender de si mesmo a quedar fóra. O Cerceda, pola súa parte, asinou nove puntos de nove posibles metendo man no segundo posto.

A domicilio, o Compos non está a ter moita sorte cometendo erros de cara a porta que evitaron durante a tempada a chegada de máis puntos a Santiago. E se lle sumamos un partido pésimo en San Lázaro e outro segundo tempo para esquecer... Derrota ante un Vilalonga que xogou gran parte do encontro co porteiro mancado en San Lázaro deixando unha moi mala imaxe. A seguinte semana, en Bouzas, nova caída aínda que mellorando o xogo. E a pasada fin de semana, ante o Choco tamén na casa, un empate deixando de novo moito que desexar na segunda metade permitindo aos de Redondela igualar un 2-0 en media hora.

Pola súa parte, o Cerceda de José Luis Lemos está a facer un gran final de tempada, merecendo incluso o ascenso histórico para o cadro cercedense. De feito, o equipo suma as mesmas vitorias consecutivas que o Compos xornadas sen sumar de tres. Logo de dous empates, asinaron tres triunfos ante equipos xa descendidos ou, no caso do Castro, loitando para non facelo. 1-2 en Castro Riberas de Lea, 2-1 no Roxo ante o As Pontes e, na última xornada, 0-3 en Bembibre ante o Dubra.

Baixas importantes.

Yago Iglesias recuperará a David Nogueira para esta cita importante pero perderá a outra peza chave nos seus plans. Cabrejo, que viu o quinto cartón ante o Choco, non poderá estar na que foi a súa casa durante tres anos perdendo así a oportunidade de participar en tódolos partidos da recta final da súa carreira, que rematará en Barbadás.

No capítulo de lesionados, Tomás segue a recuperarse dunha escordadura no nocello que o apartou dos terreos de xogo dende hai varias semanas deixándoo sen sitio case no once inicial nos plans do adestrador branquiazul.

Luns.

O Compos pechará esta xornada 36 o luns, 1 de maio, ás 18 horas. O Roxo acollerá un bo partido entre dous grandes da categoría nun día pouco habitual e ao que ambos chegarán sabendo o que fixeron na xornada os demais rivais da categoría. Un partido para o que as entradas terán un prezo de 10 euros e de balde para menores de 15 anos.

Quen non poida achegarse a Cerceda poderá seguir o partido tanto nas redes sociais da Curva Branquiazul, Facebook e Twitter, así como no perfil oficial do clube en Twitter. Quen ademais queira comentar o partido en redes sociais poderá facelo co cancelo #CercedaCompos.

Adeus

Ata aquí chegou. As opcións de entrar na promoción de ascenso desapareceron logo do empate en San Lázaro ante o Choco ao que aumentar a vitoria do Bergantiños ante o Rápido de Bouzas deixando o cuarto puesto a sete puntos, con nove en xogo e a sete días de visitar a un Cerceda a piques de confirmar a súa presenza na promoción de xeito matemático. Algo que si conseguiu o Deportivo B, que pode asegurar case o primeiro posto a vindeira xornada, e que tamén pode facer o equipo vigués, con sete puntos sobre o quinto e o sexto.

O pésimo segundo tempo ante o Choco rematou con calquera oportunidade do equipo, que loitará a vindeira tempada por volver á Segunda B. A tres xornadas para o final, o soño remata definitivamente logo de tres partidos sen coñecer a vitoria malia facer méritos para saír con algo positivo tanto ante o equipo redondelán coma en Vigo.

Cara e cruz.

O Compos amosou dúas caras moi diferentes este sábado. Durante a primeira metade fíxose coa posesión da pelota e todo saiu case á perfección. Bo fútbol, ocasións de perigo e, o máis importante, dous goles que fixeron pensar que os tres puntos quedarían na casa. Pero, contra todo pronóstico, o equipo non se presentou a un segundo tempo onde o Choco foi quen de igualar o resultado a case quince minutos para o final, con tempo para que un dos equipos puidera facer un terceiro e facerse con tres puntos moi importantes para ambos.

Agora, a Esedé terá tres partidos por diante para despedirse con boas sensacións da tempada mentres que o Choco pelexará ata o final por conseguir a permanencia na que está a ser a campaña máis difícil do equipo nesta nota etapa na Terceira.

Xa é matemático.

O Deportivo B asinou o punto que necesitaba na súa visita ao Campo do Morrazo. O filial coruñés, que depende de si mesmo para afrontar a promoción como campión de grupo, xa asegurou a súa presenza na fase de ascenso á Segunda B. 

Ante o Alondras, a domicilio, o Fabril non fixo un bo partido, o suficiente para puntuar e volver a casa co seu billete para loitar, un ano máis, por estar na categoría de bronce. Pola súa parte, o equipo de Nacho fixo méritos para sumar os tres puntos quedando ás portas do gol ante un Alex Cobo que está a ser unha peza moi importante nas filas do conxunto branquiazul. 

A tres xornadas para o final, o Depor B ten que asinar catro puntos de nove para ser campión matemático. O Alondras terá que buscar afastarse do Ribadumia e agardar que o Boiro non descenda tamén facendo caer ata un sexto equipo á Preferente. 

Seguen facendo méritos. 

Partían como favoritos para facerse cun dos catro postos que dan opción a loitar polo ascenso e nesta segunda metade están a confirmar o seu gran nivel. O Bergantiños, que non perde dende decembro, segue a facer das súas na Terceira división buscando un ascenso histórico trinta anos despois do primeiro. A súa última vítima ata o de agora non foi outro que o Rápido de Bouzas, que perdeu unha oportunidade moi importante de achegarse ao primeiro posto.

Un encontro que podería ser positivo para os intereses do Compos de gañar o equipo vigués pero que se decantou do lado local grazas a un gol de Rodrigo Alonso no 74. Un gran resultado para os de Carballo, que poñen terra de por medio con respecto a Arousa e Vilalbés, que terán que loitar aínda máis se queren o premio final.

Igualdade total.

Racing Vilalbés e Arousa. Un dos dous podería facerse con moitas opcións de rematar no máis alto. Gran partido nas alturas que rematou con igualdade en todo. Un empate sen goles que non axuda a ningún dos dous equipos contento malia intentalo ata o final. 

Quinto e sexto citáronse en A Magdalena para demostrar cal dos dous equipos podería ter máis opcións para arrebatarlle o cuarto posto ao Bergantiños. Pero ningún foi quen de ver portería nun enfrontamento onde o Arousa saiu peor parado coa expulsión de Fran Matos na segunda metade, baixa para o seguinte partido do conxunto arlequinado, no que visitarán ao Órdenes.

A dous puntos.

O Cerceda está a só dous puntos de confirmar a súa presenza na promoción de xeito matemático. O seguinte rival do Compos non tivo moitos problemas para desfacerse do Dubra en Bembibre con tres goles na segunda metade e empatar así a puntos co segundo clasificado, o Rápido de Bouzas.

Marcos Caridad, Alex Ares e Otero asinaron os tres goles para un Cerceda que depende de si mesmo para rematar o campionato no segundo tempo e, con algo de sorte, poderían asaltar incluso a primeira posición antes do final de campaña.

Primeira de tres.

Estamos a tres partidos para o final. Tres xornadas nas que o Compos non se xoga practicamente nada pero na que tres equipos buscarán facerse cun posto na promoción de xeito matemático, xa que dous deles teñen os seus billetes virtualmente comprados. Seis partidos con algo en xogo entre os que destacan o Cerceda-Compos e o Depor B-Castro. 

Comecemos cun partido con menos en xogo do que nos gustaría. O Cerceda recibirá ao Compos nun partido onde só os locais pelexarán por algo importante. Buscarán facerse cos tres puntos para buscar a segunda praza e, con algo de sorte, achegarse ao primeiro posto. Ademais, de gañar asegurarían xa a promoción. O Compos, pola súa parte, só ten por diante asinar un final de tempada con boas sensacións.

En Abegondo estará en xogo o primeiro posto, que case podería quedar asegurado, e a permanencia case imposible para un Castro que suma xa catro xornadas sen coñecer a vitoria. Partido importante para ambos conxuntos onde, de non gañar, os lugueses poderían confirmar o descenso de categoría. 

A loita polo segundo posto pasa tamén polo Baltasar Pujales. Logo da derrota ante o Bergantiños, o Rápido de Bouzas recibirá a un Silva sen nada en xogo, salvado matematicamente. Partido interesante, sobre todo para os intereses do Cerceda, no que o Silva buscará o seu quinto partido consecutivo sen perder.

E comecemos xa coa loita real polo cuarto posto. O Bergantiños visitará ao Choco buscando aumentar a súa xeira de resultados, que se achega ao ano sen perder. Pola súa parte, dous equipos necesitados, Céltiga e Racing Vilalbés, buscarán os tres puntos no Salvador Otero. E por último, mellor pódeo ter o Arousa en Vista Alegre ante o Órdenes, un partido ante un rival xa descendido e que non se xogará nada. 

Así non se pode

O Compos perdeu a mellor oportunidade para manterse na pelexa pola cuarta posición da táboa. Un partido, tres puntos, que parecían estar no peto ao final do primeiro tempo e que se perdeu nunha segunda parte horrible, para esquecer, deixándose empatar. Un resultado que, agás sorpresa, deixa ao noso equipo fóra da loita pola promoción con tres xornadas por diante, algo que depende dos resultados de mañá. 

Os goles de Santi e Diego Rey, o segundo que será o gol da xornada, non foron suficientes para facerse cunha vitoria que podería aumentar as opcións do equipo de cara á promoción, que mañá podería afastarse aínda máis das opcións branquiazuis. Na segunda metade, onde o equipo baixou os brazos, dous goles de Rober serviron para que os de Redondela volvan a casa cun bo premio que os achega á permanencia. 

Gran comezo. 

Logo de dúas derrotas consecutivas, era o momento de dar un paso adiante e asinar unha nova vitoria coa que manterse no alto da táboa e con opcións con aínda nove puntos máis por xogar. O equipo saiu ao terreo de xogo con intensidade pechando ao Choco no seu campo e, sen correr riscos, buscando incluso a portería defendida por Cortegoso. 

A pelota rondou a porta rival durante os primeiros minutos aínda que sen poñer en problemas ao gardamallas nos dez primeiros minutos agás en dúas ocasións de Rubén que foron sequera entre os tres paus. Foron, por outra parte, dous avisos importantes cos que deixaban boas sensacións sobre o campo de San Lázaro, cun ambiente positivo ante este arrinque. 

O primeiro gol non tardou nin quince minutos en chegar, por obra de Santi. O dianteiro asturiano, de novo titular ante a baixa de Nogueira, abriu o marcador cun golazo. Uña, que fixo un gran partido en ataque, puxo en pase en profundidade para que o dianteiro compostelanista só tivera que definir de primeiras coa perna esquerda ante a saída de Cortegoso. 

Oportunidades para sentenzar.

Media hora por diante e oportunidades suficientes para encarrilar unha vitoria máis na casa. Non obstante, baixo os paus da portería do Choco estivo un bo Cortegoso evitando cada ocasión dos nosos evitando a chegada de máis goles. A iso hai que engadir o posible penalti non sinalado sobre David Uña nunha das súas chegadas ofensivas, nas que a piques estivo de facer un gol. 

O segundo gol chegou a menos de dez minutos para o final do primeiro tempo. Un golazo difícil de esquecer de Diego Rey. Mon pon un balón á área, rexeita un defensa a pelota e cáelle a Diego Rey. O centrocampista contrólaa e métea de volea pola escadra dende lonxe. A confirmación da melloría do equipo e gran posibilidade de facerse con tres puntos vitais. 

Onde quedou o equipo?

Da segunda metade pouco se pode contar, ou polo menos case nada positivo. Só cinco minutos fixeron falta para a chegada do primeiro gol visitante. E se a iso lle engadimos que antes tivo que retirarse Cabrejo con molestias, que ademais non poderá estar en Cerceda por acumulación de cartóns, queda como resultado algo malo pero aínda con posibilidades de correxir. 

Os minutos seguintes foron unha baixada de intensidade do partido en gran parte pola actuación arbitral, castigando cada entrada con falta interrompendo o encontro cada pouco tempo. Ademais, hai que engadir os oito cartóns amosados nos noventa minutos, cinco deles para xogadores do Compos. E como resultado, segundo gol do Choco a menos de quince minutos para o final. Un golpe merecido logo do mal segundo tempo realizado.

E comezaron as presas. 

Trece minutos máis o engadido foi o tempo que tivo o Compos para intentar arranxar o gran problema onde se meteu pero, ante un Choco que se estaba a facer cun punto de ouro, non houbo esa posibilidade real. Empate merecido e aumentado cos problemas físicos de Cabrejo e Ube, que non puideron rematar o encontro. Aínda así, Santi tivo dúas oportunidades para manter os tres puntos en San Lázaro que non foi quen de materializar.

Agora, o equipo debe agardar que os resultados de mañá acompañen e gañar os tres partidos que restan ata o final. Aínda así, cabe destacar que o obxectivo, segundo o clube, non era outro que acadar a permanencia.

ALIÑACIÓN: Lucas; Uña, Cardeñosa, Taboada, Cabrejo (Make, min. 47); Ube (Martín, min. 66), Mon; Diego Rey, Rubén (Saro, min. 59), Recoba; e Santi.

CARTÓNS: Amarelos para Cabrejo, Taboada, Uña, Recoba e Cardeñosa.

GOLES: 1-0 14' Santi, 2-0 37' Diego Rey, 2-1 50' Rober, 2-2 77' Rober.

CAMPO: San Lázaro.

Hai vida, hai esperanza?

Este domingo chega, xa, a final definitiva onde non se pode non gañar. O Compos está a piques de xogar a final máis importante en tempo ante un Choco preto de asinar a permanencia un ano máis na Terceira división. E é que logo de dúas derrotas consecutivas e só dúas vitorias nas cinco últimas xornadas, o equipo de Yago Iglesias loitará en San Lázaro por manter as súas opcións, cada vez máis pequenas, de facerse co cuarto posto da clasificación.

Con catro xornadas por diante, a Esedé debe remontar cinco puntos a Vilalbés, Arousa e Bergantiños e con rivais moi importantes da talla de Cerceda ou Choco, que a pasada tempada estiveron a piques de ascender á Segunda B. Un final de tempada onde hai que buscar aproveitar os posibles erros dos rivais e no que non se pode perdoar nunca, hai que gañalo todo. E hai que comezar co equipo de Redondela, que loita, agora nun momento máis tranquilo, por manter a categoría un ano máis.

Do ceo ao inferno.

A pasada tempada, o Choco era un dos equipos máis importantes da categoría. Os de Redondela pecharon o curso na cuarta posición por detrás de Deportivo B, Cerceda e Boiro, o único que foi capaz de ascender. Estiveron a piques de tocar o ceo chegando á segunda rolda da promoción, na que caeron ante o filial do Zaragoza, e agora, un ano despois de certificar a súa presenza entre os catro primeiros de cara ao final da tempada regular, aínda non teñen a permanencia asegurada na mesma categoría.

O equipo de Redondela ocupa actualmente a 12ª posición da táboa con cinco puntos máis que o Ribadumia, que ocupa agora mesmo o último posto de descenso e que buscarán evitar neste final de tempada ata cinco equipos, co Barbadás virtualmente salvado. Un conxunto que, logo de dous anos entre os mellores da categoría, chegará a San Lázaro coa única intención de sumar a súa cuarta vitoria nos cinco últimos partidos, que xa case podería dárllela salvación aos pontevedreses.

O Choco é un equipo perigoso tanto na súa casa, onde asinaron 25 puntos, coma a domicilio, onde fixeron 21 sendo un dos mellores visitantes da zona media baixa da clasificación. Un equipo forte lonxe da súa afección que foi quen de sumar os tres puntos en O Roxo, San Pedro ou O Morrazo. Aínda que tamén hai que engadir que tiveron serios problemas tanto en Ordes, onde gañaron por 2 goles a 3, como en Bembibre, onde precisaron ata 4 goles para superar a un duro Dubra que, con dez, anotou o 3-4 definitivo no engadido. Outro bo dato neste sentido é que só remataron dous partidos sen goles, en Barbadás e O Barco de Valdeorras, e asinaron un terceiro empate en Negreira, nesta ocasión con dous goles por equipo. Por contra, caeron en campos coma o Baltasar Pujales, A Magdalena, Abegondo, As Eiroas e A Lomba, cinco dos campos onde se xoga a promoción de ascenso.

Se falamos de goles, hai que destacar ao equipo redondelán. Con 47 goles ao seu favor, o Choco é o sexto equipo que viu porta en máis ocasións por detrás do Compos entre outros. Tamén no tema negativo, nos goles en contra, chama a atención que con 43 goles recibidos, igualando aos nosos nese dato, son un dos equipos que máis tantos encaixan. Deses 90 goles que se puideron ver nos seus partidos, 26 foron do equipo pontevedrés a domicilio mentres que 29 os encaixaron por parte dos equipos locais perdendo só dous partidos por máis de un gol de diferenza, 4-1 en Bouzas e 4-2 en Abegondo.

A nivel individual hai que destacar a boa tempada de Rober e Silva anotando case a metade dos goles do equipo entre os dous. O centrocampista de O Porriño, Rober, é o máximo goleador do equipo con 11 tantos mentres que o dianteiro de Tomiño suma 9. Os dous chegan de ver portería ante o Dubra.

Precedentes históricos.

Ésta será a primeira ocasión na que o Choco visite San Lázaro para enfrontarse ao Compos en Liga, non así a primeira que visiten ao noso equipo. De feito, o equipo de Redondela visitou Santiago ata en tres ocasións entre 1964 e 1965 encaixando non só tres derrotas senón que ademais marcharon sen marcar en ningún partido e encaixando tres goleadas, con dez goles en total (3-0, 5-0 e 2-0).

Máis recente e a ter en conta é o encontro en Santa Mariña da primeira volta onde ámbolos dous conxuntos se repartiron os puntos grazas aos goles de Rober aos cinco minutos para os locais e de Tomás para os nosos dez minutos despois. Partido do que o Compos sufriu a lesión de Cardeñosa xusto antes do gol do centrocampista vigués.

O gol está asegurado.

O equipo de Yago Iglesias é, por detrás de Depor B e Cerceda, o terceiro equipo que máis goles anota no que vai de tempada, aínda que sumando agora dúas xornadas consecutivas sen ver portería. 56 goles en total dos cales 35 chegaron en San Lázaro asegurando o gol en gran parte dos encontros xogados no teatro branquiazul, onde os visitantes fixeron 16 rematando só un partido sen goles, ante o Ordes na primeira volta.

Entre os 51 goles que se viron en San Lázaro no que vai de tempada e os 55 por parte do Choco cando xoga lonxe de Santa Mariña, queda unha gran posibilidade de ver goles na que será unha final para os dous equipos coa permanencia e a promoción de ascenso, logo de conseguir o obxectivo principal da permanencia, máis en xogo que nunca. De feito, o gañador podería dar un paso importante no seu camiño, aínda que no caso do equipo da capital dependerá tamén do que pase noutros campos.

Dinámicas moi diferentes.

O Compos chega a este partido nun mal momento. Logo de dúas derrotas, que evitan que o equipo puidera rematar a tempada dependendo de si mesmo, hai que buscar o camiño á vitoria se non se quere perder xa calquera opción de rematar entre os catro primeiros. A esas dúas caídas ante Vilalonga e en Bouzas hai que engadir outro empate en O Barco de Valdeorras contando só dúas vitorias nas cinco últimas xornadas.

Todo o contrario pasa no caso do Choco. Hai un mes ocupaban un dos cinco postos de descenso que hai esta tempada logo de perder en Santa Mariña ante o Céltiga. Esa derrota foi un punto importante para os de Redondela, que nas catro últimas semanas conseguiron tres vitorias e só unha derrota, en As Pontes, gañando a rivais directos como son Alondras e Castro. 

Xornada vital.

Se ben o máis importante é gañar o sábado, hai dous partidos máis aos que prestar moita atención o domingo pola tarde. Dous partidos moi importantes que poderían aumentar algo máis a vida dos nosos na pelexa por rematar entre os catro primeiros.

Gañar ao Choco é totalmente obrigatorio despois das dúas derrotas importantes en Bouzas, onde se fixo un bo partido, e ante o Vilalonga, contra o noso equipo non deixou unha boa imaxe. Hai que recuperar non só o camiño á vitoria senón tamén as boas sensacións e as esperanzas con nove puntos máis por diante nun final que pode ser de infarto.

Iso é o sábado pero tamén hai que ter en conta o que pode pasar o domingo. Logo de sumar os tres puntos hai que estar moi atentos ao que faga o Bergantiños en As Eiroas ante o Rápido de Bouzas, que certificaría a súa presenza na promoción de gañar, e o que pase no enfrontamento entre Racing Vilalbés e Arousa, sexto contra quinto, en A Magdalena. Dous encontros aos que sumar o Alondras-Deportivo B, onde o filial coruñés pode confirmar matematicamente a súa presenza na promoción, e o Dubra-Cerceda no que os cercedenses poderían deixar case certificado o terceiro posto antes de recibir ao Compos en O Roxo.

Saro, alta. Nogueira, baixa.

Yago Iglesias recuperará para este partido a unha peza importante no equipo pero perderá a outro dos que máis minutos suma na dianteira branquiazul. Saro volverá logo dunha fin de semana de sanción mentres que, pola mesma razón, cae da convocatoria David Nogueira, que chegará para os tres partidos finais da tempada.

Uña, que non puido rematar o partido en Bouzas por unha baixada de azucre, e Cabrejo, que rematou con molestias, adestran xa co resto dos seus compañeiros e chegarán ao partido sen problemas. Por contra, Tomás e Taboada serán dúbida ata última hora para entrar na convocatoria. 

Abrimos a xornada. 

O Compos-Choco desta xornada será o primeiro da xornada 35. Adiantado ao sábado, o encontro será ás 18 horas en San Lázaro nun horario pouco habitual para os partidos na capital, posiblemente para evitar que coincida co partido do Obradoiro en Sar o mesmo domingo. Un partido, o noso, ao que poderán entrar de balde os que presenten as entradas do encontro benéfico xogado hai unhas semanas en favor á asociación Down Compostela. Os non abonados, e que tampouco teñan dita entrada, terán que pasar por taquilla onde o prezo das entradas será de 10 euros para maiores de 17 anos, 5 euros para rapaces entre 14 e 17 e de balde para menores de 14 anos. 

Quen por contra non poida asistir a esta gran final, poderá escoitar o partido en directo por 'Esedé Radio', na web oficial do clube, ou ben seguilo nas diferentes redes sociais da Curva Branquiazul, Facebook e Twitter, e no perfil oficial do clube en Twitter. Ademais poderá comentarse nas redes sociais co cancelo #ComposChoco. 

Catro

Quedan catro xornadas e catro equipos loitarán polo cuarto posto que dará opción a entrar na promoción de ascenso en maio. Unha loita por entrar nos postos altos da que case cae definitivamente un Compos que perdeu ante o Rápido de Bouzas e que queda, a un mes para o final do campionato, a cinco puntos do Bergantiños, que ten aos dous máximos perseguidores a un punto. Non será nada doado, non dependemos de nós mesmos pero, por que non? 

Nesta xornada 34 gañaron os seis primeiros clasificados caendo só o Compos ante o segundo, a falta de tres minutos para o final, nun partido sen moita emoción e que se decidiu por un erro cando o encontro estaba a piques de morrer. O Rápido de Bouzas segue agardando un erro do Deportivo B, intratable, para intentar meter man ao primeiro posto mentres que o Cerceda, que recibirá ao Compos dentro de quince días, ocupa o terceiro posto con tranquilidade, a tres puntos do segundo e a catro do cuarto. 

A pelexa, o importante, comeza co Bergantiños. Cuartos con 60 puntos avantaxa a Arousa e Racing Vilalbés nun punto logo de sumar unha nova vitoria nesta segunda volta de ensoño para os intereses do equipo de Carballo. Lugueses e vilagarciáns, que se verán as caras a vindeira xornada, sumaron tamén os tres puntos nos seus respectivos encontros ante Barco e Ribadumia nunha xornada que arrincou o xoves.

Cuartos por unhas horas.

Comecemos co Arousa. O equipo arlequinado abriu a xornada 34 o xoves recibindo en A Lomba a un Barco tranquilo na loita pola permanencia, a catro puntos de Alondras e Ribadumia. Un partido sen moito conto que se decidiu co gol de Sylla aos quince minutos de xogo. Moitos cartóns para xogadores ourensáns, seis para ser exactos, nun partido marcado polos dous goles anulados aos locais nun enfrontamento onde foron moi superiores.

Os descendidos non son doados. 

O Compos comprobou hai un par de semanas que superar a un equipo xa descendido non é nada doado. Houbo que sufrir e remontar para facerse cos tres puntos en Ordes e outro xa pensando na Preferente Norte, o As Pontes, non lle puxo tampouco as cousas fáciles ao Cerceda. En O Roxo, os locais puxeron terra de por medio aos vinte minutos con dous goles de Cañi e Uxío deixándose ir contra un rival que foi de menos a máis recurtando diferenzas a oito minutos para o final e achegándose ao gol do empate, que non chegou por moi pouco. Tres puntos e a manter dúas semanas máis o terceiro posto. 

O Vilalbés aínda quere.

O Racing Vilalbés, que fixo unha gran primeira metade de campionato, non parece recuperar a regularidade nesta segunda volta. Os lugueses, que contaban coa baixa de Gerardo, puideron gañar pola mínima en A Senra ante un Ribadumia que ocupa así un dos postos de descenso directo logo do descenso do Somozas. O gol, obra de José Varela mediado o segundo tempo.

Segunda volta de ensoño.

O Bergantiños segue a facer o necesario para rematar entre os catro primeiros. O equipo de Carballo, que descoñece a derrota dende o pasado mes de decembro, sumando dende aquela caída dez vitorias e seis empates, é gran merecedor de ocupar o cuarto posto. Ante o Vilalonga, en San Pedro, ampliaron a xeira de resultados grazas a un gol do ex compostelanista Nacho aos oito minutos de xogo contra un equipo que, ante a baixa dos seus dous porteiros, tivo que poñer baixo paus ao defensa Adrián Santos. Agora, uns son cuartos de xeito máis que merecido e os outros respiran tranquilos a piques de asinar a permanencia.

Aínda non.

O Deportivo B, que está a facer unha tempada histórica buscando o seu sexto ascenso a Segunda B, bateu na mañá do domingo a un Céltiga aínda en problemas cun gol de Jardel superada a media hora de xogo. Bo partido do filial deportivista que, malia o que diga a clasificación, aínda non está clasificado para a promoción de ascenso xa que perde o 'golaverage' particular co Arousa. Por outro lado, superan en catro puntos ao Rápido de Bouzas na loita polo primeiro posto. 

A permanencia, suficiente? 

O Compos chegou salvado matematicamente ao partido contra o Rápido de Bouzas, Salvado e obrigado a gañar para seguir na pelexa pola promoción, o equipo de Yago Iglesias deixou unha boa imaxe ante un rival superior fisicamente perdendo cun gol de Youssef a falta de tres minutos para o final do partido. A Esedé queda sétima a cinco da promoción mentres que o equipo vigués está moi preto de poñer o seu nome no sorteo da promoción de ascenso.

Última oportunidade.

A xornada 35 será a última oportunidade para o Compos se quere entrar na promoción de ascenso. Hai que buscar aproveitar os dous enfrontamentos que haberá entre equipos da zona alta, enfrontándose quinto e sexto e cuarto contra segundo. Unha xornada na que nós recibiremos na casa a un rival aínda non salvado matematicamente e na que o Deportivo B poderá certificar a súa presenza na promoción de ascenso ante o Alondras en Cangas. 

Da vindeira xornada destaca ante todo o partido que xogarán o Racing Vilalbés e o Arousa en A Magdalena. Partido coa permanencia máis en xogo que nunca onde o que perda quedará moi descolgado. Na primeira volta, en A Lomba, 1-1. Tamén na parte alta, o Bergantiños, cuarto e invicto nesta segunda volta, recibirá ao Rápido de Bouzas, segundo e coa intención de asaltar o primeiro posto, nun partido entre os dous equipos que máis vitorias consecutivas suman polo momento (3). 

Máis doado será para un Cerceda, rival da Esedé na seguinte saída, que visitará a un xa descendido Dubra en Bembibre coa posibilidade de poñer pé e medio na promoción de ascenso mentres que o Deportivo B poderá certificar a súa presenza se puntúa ante o Alondras no Morrazo e, incluso, podería achegarse moito ao campionato.

Cinco puntos separan a Choco e Ribadumia, equipo que pecha os postos de descenso. O conxunto de Redondela, que gañou ante a súa afección ao Dubra por 2-0, visitará a un Compos que só pode gañar de aquí ao final da liga logo de caer en Bouzas. Partido vital para os dous equipos conxuntos e que esperemos que se decida con vitoria local. 

A clasificación a falta de catro xornadas na parte alta queda así: 

Permanencia e xa

A mesma fin de semana na que se confirmaba a permanencia do Compos de xeito matemático, o equipo perdeu case tódalas súas opcións de entrar na promoción de ascenso cunha derrota no Baltasar Pujales de Bouzas. A catro xornadas para o final do campionato habería que gañar todo e agardar que os outros equipos se deixen puntos, algo case imposible. Unha derrota en Vigo cun gol a tres minutos para o final do encontro que deixa aos nosos a cinco puntos da promoción de ascenso logo da segunda derrota consecutiva e aos locais a catro do primeiro posto, que ocupa un Deportivo B cun final de tempada máis cómodo.

Segunda derrota consecutiva dos nosos logo de perder tamén hai sete días polo mesmo resultado ante o Vilalonga que xa non fai que o equipo deixe de depender de si mesmo para entrar na promoción senón que obriga a gañar os catro partidos que restan ata o final e agardar que non o fagan Bergantiños, Arousa e Vilalbés. 

Polo medio.

O primeiro tempo non tivo ocasións de perigo en ningunha das dúas porterías. Moito xogo no centro do campo e numerosos erros nos metros finais fixeron que case non se puideran ver ocasións de perigo durante os primeiros corenta e cinco minutos. Algo superior o Compos, que tivo dúas oportunidades de adiantarse pero non foi quen de poñer en apuros a Diego, que tivo unha tarde tranquila baixo paus.

Nogueira, Ube e Mon tiveron nas súas botas as ocasións para adiantar ao equipo da capital mais a sorte non estivo no lado branquiazul que de novo perdoou máis do posible. Hai que engadir tamén que, por sorte, tampouco foi quen de adiantarse o Rápido de Bouzas chegando ao final da primeira parte cun xusto empate sen goles. 

De novo pagamos os erros.

Se hai un guión que está a seguir o Compos durante as dúas últimas tempadas é o de perdoar as mellores ocasións e pagalo con erros defensivos que acaban custando un gol rival e a posterior derrota. E, como non, o mesmo pasou nun Baltasar Pujales onde non se puido ver tampouco unha gran chegada de siareiros branquiazuis, moitos coñecedores da dificultade de sumar no campo onde menos goles se marcan. 

Contra un rival que só encaixou cinco goles no que vai de tempada na súa casa, Nogueira, Make e Mon levaron de novo o perigo á porta viguesa, onde a pelota non quixo entrar. O equipo mereceu algo máis pero de novo houbo erros imperdoables ante o porteiro, que evitou o gol nas botas de Make, nesta ocasión media punta.

De novo, durante a segunda metade, poucas chegadas sobre as dúas porterías, co Compos algo mellor sobre o terreo de xogo e con interrupcións que frearon o ritmo dun partido xa de por si baixo. Un partido cunha intensidade, sobre todo por parte do equipo de Yago Iglesias, non o suficientemente alta para o que pedía o partido. 

Crónica dunha derrota anunciada.

Un dos mellores desta segunda volta en defensa, David Uña, tivo que deixar o seu posto mareado para a entrada de Samu. A iso hai que engadir a ausencia de Taboada por lesión e un plantexamento ofensivo, con dous dianteiros e cinco centrocampistas, de cara aos dez minutos finais de partido, nos que se decidiu todo no Baltasar Pujales. 

Con todo en xogo, cando o partido podería caer de calquera lado, chegou un novo erro en defensa que custou un punto aos nosos. Aproveitando que o Compos estaba metido de cheo en ataque, contra do Rápido de Bouzas pola banda esquerda. A pelota chégalle a Pardavila e éste asiste a Youssef. O ex do Celta B dispara, a pelota peta nun defensa e engana a Lucas, que non pode facer nada para evitalo.

Adeus.

Opcións aínda quedan, ou iso é o que di polo menos a clasificación. Catro xornadas por diante, doce puntos en xogo e obrigados a facer un pleno no mes de liga que queda antes das vacacións. Polo de pronto hai que pensar en sumar os tres puntos na visita do Choco a San Lázaro e non perder de vista a Bergantiños, Arousa e Vilalbés, aos que non lle agarda un calendario para nada doado. 

ALIÑACIÓN: Lucas; Uña (Samu, min. 76), Cardeñosa, David Rey, Cabrejo; Ube (Santi, min. 70), Mon; Make, Diego Rey, Recoba (Martín, min. 83); e Nogueira.

CARTÓNS: Amarelos para Nogueira, Cabrejo e Mon.

GOLES: 1-0 87' Youssef.

CAMPO: Baltasar Pujales.

Misión imposible?

O Compos visitará este domingo un dos campos máis difíciles da categoría. Un campo que a vindeira tempada podería ser de Segunda división B e un rival que buscará o primeiro posto da clasificación nas cinco xornadas finais. Un Rápido de Bouzas que non porá as cousas nada fáciles a un equipo que debe volver ao camiño da vitoria a domicilio se quere chegar ao final con opcións de rematar entre os catro primeiros.

E é que despois de perder ante o Vilalonga na casa, a Esedé deberá recuperar o camiño da vitoria ante o segundo clasificado se quere de novo depender de si mesmo para entrar na promoción antes do final do campionato regular, para o que, lembremos, quedan cinco partidos nada máis e só dous serán en San Lázaro.

O primeiro posto: obxectivo principal.

O Rápido de Bouzas ten como obxectivo principal arrebatar ao Deportivo B o primeiro posto da clasificación, posición que ocupou durante 16 xornadas ata que caeu ante o filial coruñés no comezo dunha pequena baixada do equipo vigués, empatando en dúas ocasións e perdendo en Castro de Rei. Un equipo, o dirixido por Patxi Salinas, que se presume como un dos favoritos para o ascenso non só no grupo galego senón en toda a categoría grazas ao seu xogo e, sobre todo, os resultados que asinan na casa.

Como local, o conxunto vigués é un dos mellores da categoría. De feito, só o Racing Vilalbés o supera tanto en puntos como en vitorias na casa. Logo de 16 partidos, no Baltasar Pujales quedaron 39 puntos saíndo del só 6 puntos en tres empates, ante Vilalonga, Racing Vilalbés e Ribadumia, e unha derrota contra o Cerceda no único partido do equipo gualdinegro no que non puido ver portería anotando polo menos un gol en tódolos demais.

Aínda que case nunca falten á súa cita co gol, o Rápido de Bouzas non é un equipo que marque moitos goles. De feito, nestas 33 primeiras xornadas anotaron 48 goles marcando en tódalas xornadas agás en seis, dos que perderon dous. Por contra, é o equipo que menos goles recibe da categoría logo de encaixar 23, 5 no Baltasar Pujales sen recibir máis dun por partido.

A nivel individual destaca o ex do Pontevedra Pablo Carnero. O dianteiro vigués formado nas categorías inferiores do Celta volveu ao conxunto gualdinegro logo de tres cursos nas filas do Pontevedra para ser o referente en ataque. Ata o de agora é o autor de case un tercio dos goles do seu equipo (14). Pola súa parte, o ex do Compos Jesús Varela suma 3 goles, un fixo na defensa viguesa e autor de goles moi importantes para os seus.

E por que non?

O Compos non está a facer unha boa tempada fóra de San Lázaro e se a iso lle engadimos o pau inesperado ante o Vilalonga na pasada xornada e o bo traballo do Rápido de Bouzas na casa sae como resultado un partido un pouco igualado en canto a xogo, non así se falamos do posible resultado.

O equipo vigués é un fixo vendo porta e máis aínda se xoga na casa. Un equipo que ademais conta cun muro defensivo case imposible de superar. O único dato posiblemente máis positivo é que de facer un gol as posibilidades aumentan ante un rival que só foi quen de remontar nunha das dúas ocasións nas que os visitantes se adiantaron.

Ben é certo que a domicilio, a Esedé non é ningunha marabilla. Só 3 vitorias en 16 partidos ás que engadir 8 empates e 5 derrotas, algunha tan importante como o 5-1 en Abegondo e outras axustadas como a encaixada no Municipal de Castro con remontada incluida. Tamén hai que engadir que o noso equipo non se queda atrás niso de marcar goles. Con 56 a favor, só superados por Cerceda e Depor B, o Compos anotou en tódalas súas saídas agás en Vilagarcía e Vilalba, onde sumaron un punto de seis posibles.

Ante os equipos da parte alta está a haber problemas importantes sobre todo lonxe de San Lázaro. Derrota abultada en Abegondo, empate sen goles en Vilagarcía e dúas derrotas seguidas en Vilalba e Carballo non deixan ben situado a un equipo que perdoa nos momentos máis importantes sufrindo incluso para remontar en Ordes.

A primeira volta, a ter en conta.

É certo que o Compos está a facer unha gran segunda volta a só tres puntos de igualar o feito na primeira. Nesa primeira volta, o enfrontamento ante o Rápido de Bouzas non foi nada doado para os nosos. Un partido en San Lázaro onde houbo que igualar un resultado en contra na segunda metade con moito traballo nunha mañá de domingo.

12 da mañá dun domingo de novembro. Partido televisado e pouco ambiente nas bancadas de San Lázaro. O Rápido de Bouzas amosouse superior durante todo o primeiro tempo sobre o verde e superada a media hora de xogo aproveitaron un erro defensivo para marcar o primeiro tanto do día, obra de Óscar Pardavila. Na segunda metade, por sorte, o equipo foi de menos a máis con Recoba facendo das súas unha semana máis. O uruguaio, autor do gol ante o Vilalonga unha semana antes, forzou un penalti que transformaría Mitogo. Un partido que ademais contou cun final onde os dous equipos puideron anotar o gol da vitoria.

Bos precedentes.

Rápido de Bouzas e Compos enfrontáronse en terras viguesas en cinco ocasións. Cinco visitas das que o Compos volveu con puntos no peto ata en catro complicándose a vitoria co paso dos anos. Un empate, tres vitorias para os nosos e unha vitoria local fan das visitas branquiazuis ao Baltasar Pujales algo positivo na historia.

A primeira visita, en 1965, rematou con empate a un gol. Algo máis dun ano despois, na 66/67, a vitoria caeu por primeira vez para o lado branquiazul por 0-4. E de novo un ano despois chegou a segunda, a máis abultada, por 0 goles a 8. E no 2008 pechamos, ata o de agora, o capítulo de vitorias da Esedé en Bouzas por 2-3 con goles de Centrón, Petter e Claudio para os nosos, que chegaron a ir gañando por tres tantos de diferenza. Por contra, a última visita, en 2012, rematou con vitoria local con goles de Gonzalo para os nosos e de Pardavila e Yahvé para o Bouzas.

Mal camiño.

Cando máis doado parecía o camiño cara a promoción para o Compos apareceu unha pedra polo camiño co nome de Vilalonga. O conxunto de Sanxenxo soubo aproveitar as ocasións das que gozou e superou a un Compos que non foi quen de bater a Iván Parada, lesionado dende a media hora de xogo e obrigado a defender a porta ata o final ante a ausencia dun gardamallas suplente.

Malia xogar contra un equipo xa descendido, o Rápido de Bouzas non contou con ningunha facilidade á hora de superar ao Dubra en Bembibre. Cholo adiantou aos locais sobrepasada a media hora e Carlitos empatou segundos antes do final do primeiro tempo. Na segunda metade chegou o gol de Pablo Carnero para certificar unha nova vitoria viguesa nun partido difícil.

Saro, baixa.

Se non hai ningunha sorpresa de última hora, Yago Iglesias manterá a dúbida de Tomás logo de que o vigués recibira a alta a pasada semana e a de Taboada, que non puido estar en Negreira. Ademais recupera a Mon para un partido onde non poderá estar Saro despois de ver o quinto cartón amarelo deixando o seu posto vacante, que ocupará con case toda seguridade David Uña.

Neste final de campionato hai que ter tamén en conta que hai xogadores cargados de cartóns. Agora mesmo, Ube e Nogueira non poderían estar ante o Choco a vindeira fin de semana en San Lázaro, noutra final importante, de ver un cartón amarelo en Vigo.

Lío co horario.

Logo de ver anunciado o partido para o domingo ás 12 na TVG, o partido xogarase finalmente o domingo ás 17 horas sen televisión. As entradas para o encontro estarán na taquilla do Baltasar Pujales a un prezo de 12 euros no partido declarado como 'Día do clube' mentres que os menores de 14 anos, acompañados dun adulto, pasarán de balde.

Para quen non poida asistir ao campo vigués poderá seguilo en directo a través das diferentes redes sociais da Curva Branquiazul, Facebook e Twitter, ou ben na conta oficial do clube en Twitter, onde hai uns días chegaron a 10.000 seguidores. Ademais poderá comentarse a través das redes sociais co cancelo #BouzasCompos. 

Caemos

O Compos non só perdeu ante o Vilalonga nun moi mal partido do equipo de Yago Iglesias senón que ademais perdeu unha ocasión de ouro de facerse co cuarto posto da táboa, que ten novo dono. A mellor oportunidade, no mellor esceario e nunha moi boa tarde non foi suficiente para un equipo que non soubo darlle a volta a outro partido logo de facelo ante o Órdenes sete días antes e ante un porteiro mancado. 

No mesmo día que o Somozas confirmou o seu descenso de categoría, ampliando a cinco os postos de descenso de Terceira a Preferente, o Bergantiños pasou a depender de si mesmo para rematar a tempada en postos de promoción de ascenso por terceira vez na súa historia. A iso hai que engadir o segundo empate consecutivo do Deportivo B, que xa ten máis preto ao Rápido de Bouzas, e que o Arousa sumou de novo logo de dúas derrotas. 

A mellor oportunidade. 

En San Lázaro estaba en xogo a promoción de ascenso e o Compos, de novo, non estivo á altura. O equipo non aparece nos momentos máis importantes, cando hai máis en xogo, e iso viuse unha fin de semana máis ante un Vilalonga que fixo o seu traballo antes da media hora de partido e, co porteiro mancado durante máis dunha hora, fixo todo o preciso para facerse con tres puntos que os achegan á permanencia matemática.

Nun partido marcado polo gran número de cartóns amarelos, sete para xogadores locais, a Esedé esgotou a primeira posibilidade de entrar nos postos altos da clasificación, cun novo dono. Un erro importante que haberá que arranxar no Baltasar Pujales. 

Dentro!

O Bergantiños xa ocupa un dos postos de promoción de ascenso logo de sumar unha nova vitoria ante o Órdenes en As Eiroas. O equipo de Carballo, que segue sen perder neste 2017, superou ao xa descendido Órdenes na casa grazas aos goles de Borja Facal e Iago Blanco e aproveitou así o empate do Arousa e as derrotas do Compos e o Racing Vilalbés, que seguen moi metidos na loita a falta de cinco xornadas para o final. 

E fóra.

Unha semana durou o Racing Vilalbés nos postos de promoción de ascenso. O equipo lugués segue a ser irregular nesta segunda volta e en A Magdalena caeron ante un Barco que se achega á zona tranquila da clasificación. Un gol de David Álvarez no minuto 88 foi suficiente para a vitoria ourensá noutro partido marcado polo gran número de cartóns amarelos, once con oito na última media hora. 

Terceiro. 

O Arousa suma xa tres partidos consecutivos sen coñecer a vitoria. O equipo de Vilagarcía puido polo menos puntuar logo de dúas derrotas consecutivas ante o Silva en A Grela nun partido dominado polos coruñeses, que ben puideron levarse os tres puntos. Un gol de Movilla para o Silva antes dos dez minutos de xogo foi respondido por Aitor Díaz a quince para o final nun partido vivo e con numerosas ocasións.

Tranquilidade. 

O Cerceda xa está moito máis tranquilo logo de sumar os tres puntos ante o Castro, que a pesar do traballo non puido facerse con nada positivo. Un gol de Rucho en propia porta para abrir a lata visitante, outro de Omar para empatar na primeira parte e o definitivo de Migueliño a sete minutos para o final decidiron a vitoria para o conxunto cercedense, que supera en cinco puntos ao quinto. Pola súa parte, o Castro queda tamén a cinco puntos dos postos de permanencia. 

A polo liderato.

Quen parece achegarse ao máximo obxectivo é o Rápido de Bouzas. O equipo vigués aproveitou de novo outro esvarón do Deportivo B a sete días de recibir ao Compos ante un Dubra xa de Preferente con remontada incluida. Cholo adiantou aos de Bembibre, Carlitos igualou o resultado e Pablo Carnero asinou o segundo gol visitante para dar tres puntos máis ao Rápido. 

Moi tranquilos. 

O Depor B sumou o seu segundo empate consecutivo sen ver perigar aínda o seu primeiro posto. O filial deportivista volveu de Ribadumia cun punto logo de non conseguir facerse tampouco cos tres puntos ante o Racing Vilalbés. En A Senra, Molina adiantou aos coruñeses mentres que Fran Fandiño conseguiu o gol do empate xa fóra do tempo regulamentario mantendo ao equipo do Salnés fóra dos postos de descenso. 

Dura xornada.

A xornada 34, o comezo do treito final do campionato, trae grandes partidos entre os que destaca o Rápido de Bouzas-Compos que se xogará no Baltasar Pujales tres días despois da cita amigable da Esedé en Negreira. Ao partido chave da xornada hai que engadir que Arousa, Cerceda e Deportivo B xogarán na casa mentres que Racing Vilalbés e Vilalonga farano a domicilio. 

O Compos, que xa non depende de si mesmo pero ten unha gran posibilidade de gañar os cinco partidos que restan ata o final, visitará un campo onde só puido gañar o Cerceda e no que tres máis puideron conseguir un punto. Un dos peores visitantes da categoría contra o segundo mellor local. 

Antes, o xoves pola mañá, o Arousa recibirá ao Barco mentres que o Cerceda fará o propio ante o As Pontes. Dous partidos adiantados e que poden ser de gran importancia para o futuro da Esedé, que aínda terá que visitar O Roxo. O venres será a quenda do Racing Vilalbés, que buscará de novo un posto entre os catro primeiros durante unhas horas ante o Ribadumia en A Senra. Xa durante a fin de semana, o Bergantiños visitará ao Vilalonga en San Pedro mentres que, o domingo, o Deportivo B recibirá ao Céltiga en Abegondo.

Así está a parte alta da clasificación logo de 33 xornadas:

Outro paso atrás

O Compos non puido sumar ningún punto na terceira derrota da tempada en San Lázaro ante un Vilalonga que xogou unha hora lesionado, ante a ausencia do porteiro suplente no equipo de Sanxenxo. Novo partido horrible dos nosos que non souberon remontar o gol visitante no primeiro tempo con erros importantes tanto en defensa como nos metros finais. 

Un gol de Pablo Mota na media hora de partido foi suficiente para que o Vilalonga puidera sumar tres puntos moi importantes no seu camiño cara a permanencia ante un Compos que volve caer ao sétimo posto da clasificación, aínda que só queda a dous puntos do cuarto posto que agora mesmo ocupa o Bergantiños. Ademais, conseguiron así o que foi o segundo triunfo en San Lázaro no que vai de ano, logo da vitoria do Depor en xaneiro, para asegurarse de xeito virtual a permanencia na Terceira división un ano máis.

Moi mal comezo. 

O arrinque, simulando o do partido contra o Fabril na casa, non puido ser peor. O Vilalonga saiu con máis intencións ao campo e conseguiron a primeira ocasión do encontro no primeiro minuto de xogo. As cousas non foron mellorando co paso dos minutos e superados os dez minutos tivo que aparecer Cabrejo para salvar a que podía ser a segunda gran oportunidade do equipo do Salnés. Comezaban os problemas serios para un Compos incapaz de reaccionar. 

Superados en defensa, en ataque non houbo novas do Compos ata superar os vinte minutos de partido, cando xa o Vilalonga conseguira a súa merecida recompensa. Logo dun novo aviso que conseguiu evitar Lucas, Pablo Mota deixou en evidencia á defensa local sentando a tres rivais e marcando a porta baleira. Golazo.

Máis problemas que reacción.

Lonxe dos puntos, a Esedé non foi quen de achegarse á portería de Iván Parada con perigo. De feito, o partido tivo que pararse uns minutos pola lesión do gardamallas logo dun man a man contra Diego Rey, que non tivo a súa mellor tarde. Tal é así que houbo ata catro minutos de engadido no primeiro tempo, nos que o porteiro non tivo case traballo.

Ante os problemas á hora de achegarse á porta de Iván Parada, Yago Iglesias decidiu facer o primeiro troco antes do descanso metendo a Make no lugar de Samu, un troco que aínda que si axudou a crear algo máis de fútbol non foi suficiente para crear ocasións sobre a portería defendida por un Iván Parada que tivo que xogar mancado ata o final. 

Quince minutos con posibilidades.

Sen efectividade, o Compos saiu ao terreo de xogo no segundo tempo coa única intención de darlle a volta ao marcador. O perigo chegou á área sanxenxina mais non á portería de Iván Parada, que fixo un bo partido malia non poder case mover unha perna sendo un dos homes máis importantes do seu equipo na vitoria. Non obstante, o mellor momento do equipo durou quince minutos con problemas importantes para crear ocasións de perigo, algo que parecía ter arranxado o equipo de Yago Iglesias logo dos bos resultados das pasadas xornadas.

As interrupcións marcaron o final.

Ante a posible mellora do Compos, o Vilalonga preferiu frear o ritmo do partido todo o posible a base dun gran número de faltas, que se saldaron cun total de once cartóns, sete deles para xogadores locais. Final de partido trabado que evitou que os locais puideran ter algunha posibilidade de, como mínimo, sumar un punto co que se mantería a diferenza co cuarto clasificado, un posto que non se decidirá ata a última xornada.

Agora só queda pensar en superar un dos partidos máis difíciles do curso. O domingo visitaremos ao Rápido de Bouzas, coa mirada posta no primeiro posto, nun Baltasar Pujales onde só puido gañar o Cerceda hai algo máis de dous meses.

ALIÑACIÓN: Lucas; Saro, Cardeñosa, Uña, Cabrejo; Samu (Make, min. 35), Ube (Nogueira, min. 61); Diego Rey, Recoba, Rubén (Martín, min. 52); e Santi.

CARTÓNS: Amarelos para Samu, Make, Diego Rey, Saro, Uña, Recoba e Nogueira.

GOLES: 0-1 22' Pablo Mota.

CAMPO: San Lázaro.