Repetimos

Por segundo ano consecutivo, o Compos chega á promoción cunha derrota no peto coa que pechar o curso regular. Un partido sen moito conto por parte dos nosos, no que se limitaron a intentar non caer mancados nun campo histórico, e contra un Ourense CF que buscou a cuarta posición ata o final, facéndose cun triunfo que, por outro lado, foi insuficiente coa vitoria do Alondras nas Eiroas tamén pola mínima. Non obstante, a nota negativa non foi a derrota senón a retirada de Alex Ares mancado e as molestias de Miki durante gran parte do xogo. O único gol, obra de Raly Cabral. 

Igualdade máxima. 

O primeiro tempo non deixou grandes cousas que destacar. Moita igualdade entre dous equipos que en corenta e cinco minutos non foron quen de levar perigo a ningunha das dúas porterías, con moito xogo no centro do campo. A iso hai que engadir que a tensión foi en aumento co Ourense sabedor de que os tres puntos lle poderían abrir as portas da promoción de ascenso á Segunda B. 

Pensando na vindeira fin de semana. 

Pensando xa no que se ven no futuro máis próximo, os homes de Yago Iglesias xogaron cunha marcha menos, sen conseguir efectuar o seu xogo e con Miki un tanto tocado. Ademais, os trocos non tardaron en chegar realizándose os tres en cuestión de nove minutos e con Alex Ares retirándose do terreo de xogo lesionado, algo que todo o compostelanismo agarda que quede en nada. 

O Ourense foi de menos a máis, aumentando a intensidade do xogo ata conseguir, a dous minutos para o final e sen dar tempo para a reacción aos nosos, que xa non intentaron buscar o gol do empate. Un gol, o de Raly Cabral que tivo como asistente un asistente xa moi coñecido, e querido, pola afección branquiazul. Róber, que xa fixo un gol na primeira volta, colaborou de novo coa vitoria dos seus de cheo cun novo gran pase. 

Agora, os nosos terán que esperar ao sorteo do luns pola tarde para coñecer ao rival co que medir forzas a vindeira fin de semana, aínda sen coñecerse tampouco onde se celebrará cada xogo. 

ALIÑACIÓN: Anxo; Sergio Pereira, Chechu, Uña, Naveira; Samu, Remeseiro; Alex Ares (Mon, min. 69), Brais Abelenda (Rubén, min. 58), Miki; e Aythami (Santi, min. 58).

CARTÓNS: Amarelos para Brais Abelenda e Mon. 

GOLES: 1-0 88' Raly Cabral. 

CAMPO: O Couto.

Punto e seguido

Chega o fin da tempada regular. O último partido do curso no que os nosos non se xogarán nada. Ás portas dunha promoción de ascenso ilusionante, a Esedé terá que conquistar, por segunda vez este curso, O Couto. Diante estará un dos catro equipos que aínda quere pelexar pola cuarta posición na derradeira xornada, un Ourense CF que está a facer unha segunda volta para enmarcar conseguindo meterse no máis alto da táboa no momento máis axeitado.

Un obxectivo aínda posible.

O Ourense CF está a facer unha gran tempada, a mellor da súa historia, situándose na sexta praza a falta dunha xornada con só un punto menos que un Alondras que depende de si mesmo para pelexar, por segundo ano consecutivo, polo ascenso de categoría. Un equipo que foi de menos a máis con xogadores moi importantes na Terceira galega e que superou, con moita diferenza, o feito nunha primeira volta na que quedaron en terra de ninguén, moi lonxe da situación actual.

Sextos con 61 puntos, os homes de Fran Justo conseguiron xa máis puntos nesta segunda metade do campionato converténdose nun dos rivais máis duros do grupo, algo que xa deixaron claro na súa visita ao Vero Boquete na xornada que inauguraba o 2019. 17 triunfos, superando aos equipos punteiros da categoría agás o Racing de Ferrol a asestando a maior goleada do curso con ata oito goles de diferenza contra o Céltiga no Salvador Otero, e 10 empates, entrando teste caso o cadro verde, aos que engadir outras 10 derrotas, caendo pola mínima sempre agás diante do Racing Vilalbés no Couto. Uns datos que se completan cun total de 50 goles a favor mentres que recibiron un total de 24, cifra que demostra que contan coa mellor defensa do campionato.

Un equipo moi forte a domicilio, conseguindo boa parte dos seus puntos lonxe do Couto, e que buscará pechar o curso cunha vitoria na casa, onde fixo 26 puntos. Polo Couto pasaron xa todos os equipos agás o Compos e só 6 equipos puideron marchar coa vitoria asinando a súa última caída na casa hai case dous meses, cando o Racing Vilalbés conquistou o campo ourensán. Por outro lado, 5 conseguiron sacar un punto repetíndose o 1-1 e o xogo sen goles ata en dúas ocasións cada un. No positivo, conseguiron un total de 7 triunfos, 5 deles nesta segunda volta e un menos de xeito consecutivo.

A nivel individual, hai que ter moi en conta ao gardamallas Diego García, que encaixou 6 goles en toda a segunda volta, así como a defensa ourensá. Non obstante, tamén fan falta goles e aí aparecen Raly Cabral con 9 goles no seu casilleiro e o ex branquiazul Róber con 8.

Un 2019 de ensoño.

Despois de case tres semanas de parón, a primeira volta puxo punto e final no Vero Boquete nun enfrontamento que medía as forzas de Compos e Ourense CF. Un partido que chegou ao tempo de lecer con vitoria local e que rematou cunha remontada importante para os visitantes. Unha vitoria que inauguraba un ano para o recordo dos de Fran Justo. Despois, unha serie de empates e só 1 derrota ata marzo, cando houbo un cambio de dinámica moi importante que o deixa, a día de hoxe, con 8 triunfos consecutivos recibindo neste tempo só 1 gol en contra, a pasada fin de semana na Porta Santa.

Malia non sumar unha xeira tan importante, os de Yago Iglesias chegan xa co obxectivo de clasificarse para a promoción máis que conseguido, asinado no partido da Senra contra o Ribadumia. Isto chegou logo dun segundo tempo no que, a domicilio, complicáronse as cousas máis do esperado con só 4 triunfos e 2 empates lonxe do Vero Boquete. Ao anterior hai que engadir que os nosos só anotaron 5 goles nas últimas 6 saídas.

Un campo sempre difícil.

Por segunda vez na historia, Compos e Ourense CF pelexarán pola vitoria en liga na cidade das Burgas. Un campo onde os nosos xa puideron gañar nesta segunda volta fronte ao outro equipo da cidade e no que o pasado ano non puideron pasar do empate.

Ata tres equipos recibiron á Esedé no Couto nestes últimos anos. O CD Ourense, equipo histórico da cidade, recibiu aos nosos nun total de 15 ocasións. Só 1 o fixeron UD Ourense e Ourense CF con resultados un tanto negativos para os nosos xa que só puideron saír do feudo ourensán con 4 vitorias e 3 empates mentres que outras 10 citas remataron con triunfo local, todas elas conseguidas polo equipo xa extinto.

Esta tempada, a visita á UD Ourense rematou con triunfo branquiazul grazas aos goles de Brais Abelenda e Rubén, ambos os dous no treito final de cada tempo. Por outro lado, a última visita ao Ourense CF, o pasado curso, rematou con empate grazas aos goles de Edu Otero para os locais e Alex Ares para os nosos.

Unha xornada positiva.

A Esedé pechou a parte regular na casa cun triunfo contra o Somozas que, a parte dos tres puntos, deixou unhas moi boas sensacións malia as rotacións feitas por Yago. Unha actuación sobresaínte de Miki, con ata tres asistencias, e os goles de Rubén, por partida dobre, e Santi serviron para darlle un triunfo a un equipo que chegará á promoción de ascenso nun gran momento. 

Máis problemas para conseguir tres puntos de ouro tivo o Ourense CF na Porta Santa contra o Paiosaco. Raly Cabral inaugurou a conta nos primeiros intres do primeiro tempo mentres que Josiño, a quince minutos para o final, asinou o tanto que daba a igualada aos locais. Non obstante, Iago Beceiro non quixo perder a oportunidade de manter as opcións dos ourensáns por entrar na promoción facendo o que podería ser un dos goles máis importantes da historia do clube. 

Mirando a terceiros. 

Co traballo rematado, os de Yago Iglesias terán que ir mirando cara os outros grupos para coñecer ao posible rival contra o que se medirá a seguinte fin de semana na primeira rolda da promoción de ascenso. Unha lista de 17 posibles rivais e entre os que só se coñecen, a falta dunha xornada, 3 equipos confirmados. 

Por outro lado, o Ourense CF depende doutros partidos para poder pechar o curso na cuarta posición. Para facerse con ese premio, nin Alondras, nas Eiroas fronte a un Bergantiños xa sen nada polo que pelexar, nin tampouco o Barco, que visitará Espiñedo contra o Arenteiro tamén xa salvado. Os empates dos dous equipos xunto coa vitoria dos ourensáns os clasificaría para a promoción. 

Todos dispoñibles. 

Por raro que pareza, e se nada sae mal de aquí ao domingo, Yago Iglesias terá á súa disposición a todo o equipo para a visita ao Couto. Unha cita importante para mellorar as sensacións de cara á parte máis dura e importante do curso. Non obstante, Álvaro Casas podería ter en perigo a súa presenza na ida da primeira eliminatoria de ver un cartón amarelo este domingo, xa que chega apercibido de sanción. 

Tingamos O Couto. 

O Couto abrirá as súas portas para acoller o derradeiro partido de liga este domingo ás 18 horas, de novo en horario unificado. Un partido onde haberá moito en xogo e a oportunidade perfecta para dar o último alento aos nosos antes da promoción. Para isto, as entradas terán un prezo de 10 euros para os afeccionados branquiazuis que se despracen ata a cidade termal.

Por outro lado, para quen non poida asistir á derradeira cita do curso regular, poderase seguir o encontro a través das diferentes redes sociais tanto da Curva Branquiazul coma do clube. 

Doce despedida

O Compos rematou o seu último partido no Vero Boquete de San Lázaro cun gran resultado, moi bo xogo e unhas boas sensacións xogando con pezas pouco habituais nos onces titulares. Alberto, que se estreou de inicio, onde se puido ver unha defensa de tres e no que, ante a ausencia de Aythami, Rubén e Santi asinaron os goles. Ao anterior hai que engadir a estrea de Pedro Leis en partido oficial co primeiro equipo e a case inmellorable actuación de Miki agasallando aos seus compañeiros con tres asistencias. Diante, un Somozas que non amosou a súa mellor versión deixando moitas dúbidas de cara á derradeira xornada, na que se xogará ese posto que pode dar opción ao descenso por arrastre co Paiosaco. 

Gran primeiro tempo. 

Sol, calor, bo fútbol e goles, sobre todo nun primeiro tempo que comezou do mellor xeito posible. Cando aínda había xente que non ocupara o seu sitio nunha bancada un tanto baleira, Manu Cedrón xa tivo que traballar duro. O ex gardamallas da Esedé tivo que evitar unha dobre ocasión de David Uña e Chechu con só dous minutos. Ese arrinque mantívose para dar a primeira ledicia á afección cunha carreira imparable de Miki pola banda, entra na área e asiste para Rubén, que abriu a lata xa co porteiro batido. 

Un novo aviso branquiazul serviu para esperar a un Somozas que non tivo o seu día. Luis Nuño aproveitou un erro na frontal para roubar o esférico e asistir a Alex, que non perdoou contra Lorenzo no man a man asinando un empate que pouco duraría no luminoso. E é que, entre paróns por unha lesión nun defensa visitante, chegaron novas oportunidades e un novo gol que devolvía a superioridade no marcador aos nosos. 

Mesmos protagonistas e mesmo guión. Miki aparece pola banda dereita do ataque branquiazul, entra na área e cun pase atrás deixa de novo a Rubén coa pelota e a portería sen gardamallas para só ter que empurrar o esférico devolvendo a diferenza. Un gol igual ao primeiro que deixou aínda mellor situado ao noso equipo. 

Contra un Somozas que non deixou nin moito menos as sensacións da primeira volta, a sentenza chegou aínda nos primeiros corenta e cinco minutos. De novo Miki entrando pola banda e neste caso a súa asistencia chega aos pés de Santi, que transformou a súa mellor ocasión para aumentar diferenzas e poñer os dous díxitos nos seus rexistros este curso regular. 

Segundo tempo sen historia.

Co resultado favorable aos nosos e co Somozas sen ideas, a segunda metade non contou case con ocasións. O xogo controlado polos nosos, no que non houbo traballo para Lorenzo e nunha segunda metade na que se puido vivir a estrea de Pedro Leis e a volta de Gonzalo á que foi a súa casa como puntos máis importantes logo do paso por vestiarios.

Agora o noso equipo terá que visitar O Couto para despedir a tempada regular e pensar xa de cheo na promoción de ascenso. Unha nova cita para probar cousas novas e demostrar o nivel deste equipo contra un Ourense CF que se xogará estar na promoción de ascenso acompañando aos nosos, Bergantiños e un Racing de Ferrol que xa é campión de liga. 

É o momento

Último partido de liga no Vero Boquete, penúltima xornada do campionato regular e o obxectivo xa cumprido. Chega o momento máis esperado e, sobre todo, máis importante. O momento onde afección e equipo teñen que ser un nestas portas da promoción de ascenso. Nada en xogo por parte dos nosos pero todo o contrario para un Somozas que aínda non é quen de pechar a súa permanencia na Terceira división, pasando por serios problemas e, a día de hoxe, ocupando unha desas posicións coas que depender doutros equipos para non volver a unha categoría que deixou hai once anos.

Moi preto do inferno.

En 2008, o Somozas conseguiu volver á Terceira división nove anos despois de descender. Un gran regreso que convertiu máis cedo que tarde ao equipo nun dos grandes da categoría. Cinco anos entre a zona media da clasificación e un curso ás portas da promoción para, en 2014, asinar o mellor curso da súa historia quedando campións de grupo e ascendendo á Segunda B, na que coincidiría cos nosos, logo de superar ao Tenerife B na final da promoción. Agora, despois de tres anos na categoría de bronce e case dous na Terceira, o equipo loita por non caer aos infernos da Preferente.

Con 43 puntos, ocupan a 16ª posición da táboa, un posto que despois do descenso do Fabril e moi posiblemente o do Rápido de Bouzas podería converterse nun dos que rematen en descenso de categoría, dependendo sempre dalgún ascenso para evitalo. Un posto ao que chegan despois de 11 vitorias e 10 empates conseguindo as mellores goleadas contra Racing e Compos, ámbalas dúas na primeira volta. Ademais, 15 derrotas para un equipo que anotou 43 goles e encaixou 49.

Se no Candocia conseguiron derrotar aos grandes, a domicilio quedaron ás portas de conseguir bos resultados. 4 triunfos diante de equipos da zona baixa da clasificación conseguindo a última hai xa tres meses, e 7 empates que se completan con outras 7 derrotas encaixando as peores, con tres goles de diferenza, no Couto contra o Ourense CF e na Grela hai só semana e media.

A nivel individual, un ano máis destaca a figura de Gerardo. O dianteiro asturiano volve a ser o referente no ataque somocense con 11 goles ata o momento, cifra que poderá aumentar na derradeira xornada xa que non poderá estar no Vero Boquete por sanción. Situado algo máis atrás, unha peza importante con pasado branquiazul e que segue a dar leccións de fútbol na Terceira división. Gonzalo, titular indiscutible chegando aos 3.000 minutos de xogo.

Nada e moito.

Un partido importante para recuperar as boas sensacións nos nosos e para manterse con vida nos somocenses a falta dunha xornada de liga. Co terceiro posto asegurado e sen opcións de mellorar, os de Yago Iglesias buscarán pechar a derradeira cita como local no campionato regular. Por outro lado, os da Ferrolterra terán que evitar o perigo diante dos nosos e, no encontro final, fronte a un Arosa case sen opcións de asaltar o cuarto posto. A parte, como xa é sabido, a perda de categoría dependería de diferentes factores. 

Moita igualdade.

Compos e Somozas comparten categoría por sexto ano ao longo da historia. Dende que en 2008 os nosos visitaran Pardiñas por primeira vez na historia en partido de liga, a Terceira e a Segunda división B viron xogos importantes nos que os nosos conseguiron un total de 5 vitorias mentres que os verdibrancos só 2, unha en cada campo. 

En Santiago, xogando sempre no Vero Boquete, os nosos só permitiron saír 4 puntos en forma de 1 vitoria somocense grazas a un único gol de Antón De Vicente e 1 empate con goles de Joselu para os nosos e de Carlos García para os visitantes xa no tempo engadido. 

En canto á primeira volta, o enfrontamento rematou coa maior vantaxe a prol dos homes de Manolo García. Gerardo, ausente este domingo, e Alex Ares marcaron no primeiro tempo mentres que, no segundo, Alex e Daniel aproveitaron os erros defensivos dos nosos para devolver a vitoria ao equipo que superou por primeira vez ao Compos no Candocia. 

Xornada chave.

A pasada fin de semana os dous equipos tiñan unha xornada chave que saldaron de maneiras moi diferentes. E é que os nosos pecharon o seu primeiro obxectivo do curso mentres que os somocenses caeron contra un rival directo na casa nunha cita na que contaban coa posibilidade de deixar a súa salvación practicamente asegurada. 

Despois de dúas derrotas, o Compos fixo un gran primeiro tempo na Senra para deixar sen opcións a un Ribadumia que buscará unha milagre para salvar a categoría. Un gol de Aythami e outro de Miki foron suficientes para matar un xogo no que os visitantes recurtaron diferenzas cun tanto de Rubén Cerqueiras.

Por outro lado, o Somozas chegou ao tempo de lecer por diante no marcador contra o Paiosaco grazas a un gol de Joseja. Josiño e Eloy, por partida dobre, conseguiron remontar o partido no segundo tempo co último gol xa no engadido sen opcións para os locais. Un triunfo que deixa moi ben situado aos laracheses. 

Aythami, un partido fóra. 

Chega o momento de poder facer rotacións e facer chegar en forma á promoción a todo o equipo. Sen nada polo que loitar máis que por dar unha boa imaxe, Yago Iglesias contará con só unha baixa importante: a de Aythami. O dianteiro canario foi expulsado na Senra por dobre amoestación e terá que estar unha fin de semana vendo ao equipo dende a bancada. Con el estará tamén Manuel Castiñeiras, que foi tamén expulsado por protestar e non poderá estar no banco nos seguintes 5 partidos. Por outro, Samu xa está recuperado e poderá volver ao verde mentres que Álvaro Casas chega a esta cita apercibido de sanción, polo que podería forzar o seu quinto cartón e estar si ou si na primeira rolda da promoción.

Todos xuntos. 

A promoción á volta da esquina e chega a oportunidade perfecta de xuntar afección e equipo. Este domingo ás 18h no Vero Boquete despedimos a liga na casa, á falta do encontro no Couto, nun enfrontamento onde demostrar aos nosos que estamos con eles. Un partido de balde para aboados e con entradas a 10 euros para non aboados maiores de idade e de balde para menores.

Quen, por contra, para quen non poida achegarse ao templo branquiazul poderá seguirse a través das contas de Twitter da Curva Branquiazul e do clube. Tamén se poderá escoitar en directo en 'Esedé Radio', na web oficial do clube. 

Obxectivo cumprido!

Non sen complicación, o Compos asinou a súa presenza na promoción de ascenso que dará comezo en tres semanas con, ademais, o terceiro posto asegurado. Chegou nun partido completo, con goles, bo fútbol e, sobre todo, polémica co colexiado López Parga tomando un gran protagonismo. Aythami, que fixo un grandísimo primeiro tempo e foi expulsado no segundo, anotou o primeiro gol e asistiu no segundo, obra de Miki. Pola súa parte, Cerqueiras fixo o gol do Ribadumia, insuficiente para levar algún punto mais, co resto de resultados, poden seguir vivos na competición. 

Primeiro tempo branquiazul. 

Obrigados a gañar para certificar a presenza na promoción, os de Yago Iglesias saltaron ao terreo de xogo cunha intensidade que quedou demostrada nos primeiros vinte minutos. E nada o demostra mellor que o balón de Brais Abelenda en profundidade, o control de Aythami e a definición do canario no man a man. Cinco minutos e o Compos por diante a domicilio por primeira vez case dous meses despois con gol do ex do Las Palmas lonxe do Vero Boquete dous meses e medio despois. 

Co gol, a cousa mellorou aínda máis para os nosos. Aythami a piques estivo de facer o segundo mentres que Miki, antes dos vinte minutos, finalizou á perfección unha contra que comezou logo dunha falta de Mon. A contra, na que tivo que intervir o dianteiro canario gañando un balón dividido a un defensa, pechouse cun gran man a man de Miki completando así unha boa semana no persoal con dous tantos no seu casilleiro. 

Moito por diante e Roberto Pazos convertiuse nun dos principais protagonistas do encontro evitando, ata o tempo de lecer, unha goleada maior con ata dúas intervencións de moito mérito cando todo apuntaba ao aumento de diferenza no resultado. 

E chegaron os problemas. 

Despois dun mal primeiro tempo, o Ribadumia saiu ao segundo buscando remontar o encontro, algo que non puideron conseguir malia baixar a intensidade un Compos que rematou case pedindo a hora. A iso hai que engadir os cartóns por protestar, un deles para Aythami, e a expulsión do canario aos dez minutos que deixou ao equipo moi tocado. 

Con dez, o gol en contra non tardou en chegar. Cerqueiras conseguiu materializar, despois dun rexeite, a mellor oportunidade para os locais dando vida ao equipo con aínda media hora por diante. Non obstante, esa vida extra non foi suficiente para sorprender a unha Esedé que puido ter o terceiro primeiro nas botas de Remeseiro, cuxo disparo petou no pau, e nas de Santi, que non foi quen de aproveitar o rexeite. 

Finalmente, e malia contar cunha boa oportunidade nos intres finais, os ribadumienses non puideron anotar o empate pechando así o Compos a súa clasificación para a promoción a falta de dúas xornadas e os locais quedando case sen opcións de pelexar por seguir na categoría. 

Agora, sen nada polo que xogar, o equipo terá os enfrontamentos diante de Somozas e Ourense CF para preparar a promoción de ascenso.

ALIÑACIÓN: Anxo; Sergio Pereira, Casas, Piscu, Naveira; Mon (Josiño, min. 92), Remeseiro; Miki, Alex Ares (Santi, min. 72), Brais Abelenda (Uña, min. 78); e Aythami. 

CARTÓNS: Amarelos para Mon, Casas, Remeseiro, Alex Ares e Naveira. Expulsados Aythami por dobre amoestación e Manuel Castiñeiras.

GOLES: 0-1 5' Aythami, 0-2 19' Miki, 1-2 62' Cerqueiras.

CAMPO: A Senra. 

Sen tempo para pensar

Chega o momento máis importante do campionato. Logo de dúas derrotas, perdendo as boas sensacións, o equipo buscará na Senra volver ao camiño do bo xogo e da vitoria. Diante, un Ribadumia que quere esgotar ata ao final as súas opcións de manter a categoría estando, a día de hoxe e dependendo de terceiros, a catro puntos dos postos de permanencia con nove aínda por xogarse. Un partido entre dous equipos necesitados de vitorias neste treito final do campionato con moito aínda por decidirse. 

Última bala. 

O Ribadumia quere poñer punto e final ao campionato cunha nova permanencia na Terceira galega por quinto ano consecutivo. Non obstante, o conxunto sanxenxino pasa polo seu peor momento dende que chegaron á categoría alá polo ano 2014. Con pé e medio na Preferente, están obrigados a sumar de tres este domingo se queren seguir pelexando un ano máis na máxima división do fútbol galego. 

Ocupando a 18ª praza da clasificación con 35 puntos noutras tantas xornadas, pelexan por ocupar o posto que arestora é do Laracha, unha posición que daría a permanencia de haber algún ascenso galego á Segunda B e sempre e cando non descenda o Rápido de Bouzas, obrigando así a que haxa dous ascensos evitando así arrastres máis alá do do Laracha, segundo filial do Deportivo. Un equipo que só puido gañar en 8 ocasións, gran parte na casa, mentres que no capítulo de empates trátase do cadro que máis veces repartíu os puntos, cun total de 11 igualadas. En canto a goles, sumaron a día de hoxe un total de 37 mentres que encaixaron 60 sendo o cuarto equipo que máis recibe. 

No capítulo da Senra, os resultados son algo máis positivos. 23 puntos en 17 enfrontamentos grazas a 6 vitorias e 5 empates caendo equipos coma o Barco ou o Choco e no que o Bergantiños non puido pasar do empate. Un campo no que sempre houbo goles, no que non hai un empate a cero dende hai ano e medio. 

A nivel individual, contan cun bo equipo dende a portería, cuberta con Pazos e Ángel, que apunta titular, e rematando nunha dianteira con grandes xogadores do fútbol galego coma Hugo Soto, que será baixa por sanción, e Fran Fandiño, que tivo que retirarse mancado no partido contra o Paiosaco. Ademais, nas filas do cadro ribadumiense está o ex futbolista branquiazul Tomás Abelleira, que non gozou de sorte na primeira volta no Ourense CF e, dende xaneiro, busca a súa oportunidade nas filas do Ribadumia, onde fixo dous goles ata o momento gozando de minutos en todos os partidos da segunda volta, agás do que tivo que perderse por sanción. 

Promoción e descenso. 

Na Senra os dous equipos pelexarán por algo moi importante. Dous obxectivos que pasan pola vitoria e que, de conseguilo un dos dous, poderían deixar ao outro moi tocado ou, no caso dos locais, descendido. Un partido que, por ese motivo, aumenta a emoción e a importancia do xogo entre o terceiro e o antepenúltimo. 

Despois de dúas derrotas, o Compos quere pechar de xeito matemático a súa clasificación para a promoción de ascenso. Fóra da pelexa pola primeira praza e sen case opcións de ser segundo, algo que pasa por gañar todo e que o Bergantiños non puntúe de aquí ao final da liga, o obxectivo pasa a ser o de asegurar a terceira posición. E con 4 puntos máis ca o Alondras, o primeiro obxectivo e deixar fóra desta pelexa aos principais perseguidores. Para iso, haberá que sumar tres puntos de aquí ao final. 

Pola súa parte, o Ribadumia chama á milagre. Catro puntos os separan do Laracha, equipo que marca a permanencia. Un obxectivo, o da salvación, que non puideron conseguir nin Porriño Industrial nin Boiro, descendido o pasado mércores, e que podería rematar para os do Salnés se non consiguen os tres puntos e si o fai o conxunto larachés. 

Un mal momento no peor momento. 

Por terceira vez neste curso, o Compos suma dúas derrotas consecutivas. Non obstante, a peor xeira da segunda volta chega no peor momento con problemas para realizar o xogo habitual que o levou ao máis alto e grandes problemas para facer goles lonxe do Vero Boquete. É así que, ademais da derrota fronte ao Racing Vilalbés, hai que sumar outras 4 das últimas 5 saídas nas que non foron quen de puntuar marcando só 1 gol. Ao anterior hai que engadir que os nosos só fixeron 4 dos últimos 18 puntos a domicilio este curso. 

As derrotas en Santiago contra os chairegos e no Municipal de Laracha serviron para demostrar serios problemas á hora de facer un bo xogo. Contra os vilalbeses, o primeiro tempo mantivo o guión do feito en terras carballesas mentres que o segundo, por debaixo no marcador, serviu para mellorar mais sen a fortuna suficiente para sacar algo positivo. 

A mesma sorte apartou ao Ribadumia de rematar cunha xeira de 10 saídas sen perder. A visita dos homes de Luis Carro á Porta Santa deixou un triunfo importante para un Paiosaco que se achega un pouco máis á permanencia. Tres goles locais, con dous erros graves, e as expulsións de Javi Domingo e Hugo Soto, ás que engadir a lesión de Fran Fandiño, deixan un moi mal recordo do enfrontamento. 

Precedentes favorables. 

Compos e Ribadumia veñen enfrontándose cada curso nos tres últimos anos con Yago Iglesias como gañador total no banco. E é que de 5 precedentes, os nosos non se deixaron ningún punto nin no Vero Boquete nin tampouco na Senra, onde, aínda con dificultades, sacaron os puntos de partidos cheos de emoción.

Imos ao 2017. En xaneiro, na segunda xornada da segunda volta do campionato, Diego Rey fixo o primeiro gol branquiazul ao filo do tempo de lecer. Unha boa vantaxe coa que se chegou ao treito final, cando Tomás asinou o segundo xa sen tempo posible para reaccionar os locais.

Mesmo ano pero na segunda xornada do campionato seguinte. Nova visita dos de Yago Iglesias á Senra e aínda máis problemas para gañar nun xogo no que se chegou ao tempo de lecer sen goles. No segundo tempo, Rubén e Primo non precisaron máis de cinco minutos para poñer unha boa vantaxe que entre Santi e Hugo Soto conseguiron igualar en menos tempo. Non obstante, a tolemia foi a máis co gol de Mon e a resposta inmediata de Fran Fandiño deixando seis goles en algo máis de vinte minutos. A sentenza, con só cinco minutos para o final do xogo, chegou cun gol de Róber pechando unha vitoria pola mínima nun enfrontamento con ata sete goles en corenta minutos. 

Samu, baixa importante.

Samu segue sen poder estar a disposición do adestrador ribeirense sendo a única baixa para este partido. Por outro lado, Piscu e Alex Ares, que xogaron con molestias contra o Vilalbés, poderían estar sen problemas na Senra nun partido moi importante para este final do campionato permitindo pensar xa na promoción de ascenso. 

Todos xuntos. 

Neste momento tan complicado, clube e afección deben estar xuntos para levar ao equipo á Segunda división B. O primeiro paso é estar ao lado dos xogadores este domingo na Senra. En Ribadumia, na Senra, o enfrontamento dará comezo ás 19 horas pechando a xornada 36. As entradas terán un prezo de 10 euros. 

Por contra, para quen non poida achegarse ao pobo do Salnés, poderá seguirse a través das contas de Twitter tanto da Curva Branquiazul coma do clube. Ademais poderá verse a través da segunda canle da TVG no Carrusel da Terceira do En Xogo. 

De menos a máis

O Compos encadeou a súa segunda derrota consecutiva deixando unhas sensacións un tanto mellorables. O Racing Vilalbés, que saltou ao terreo de xogo cun plantexamento moi marcado, fixo valer o seu fútbol para confirmarse coma o mellor equipo desta segunda metade do campionato. Un partido que deixa aos nosos tocados tanto de ánimos coma na clasificación, na que pasará de pelexar polo primeiro posto a facelo para asegurar o terceiro mentres que a clasificación matemática para a promoción podería pecharse de gañar este domingo de superar ao Ribadumia.

 

Un primeiro tempo para esquecer.

Os primeiros corenta e cinco minutos dos nosos sobre o verde do Vero Boquete mantiveron o guión do partido de Laracha. Sen ideas para superar as liñas chairegas, moi xuntas e sen fisuras, os de Yago Iglesias pasaron todo o primeiro tempo sen poñer en problemas ao gardamallas visitante antes do tempo de lecer. 

Un primeiro tempo que non gozou de ocasións de perigo e que se tivo que parar durante uns minutos por mor do vento, que causou a caída das vallas publicitarias. Un feito que serviu para frear aínda máis o partido e logo da cal, na reanudación, chegou o gol vilalbés. Un tanto que comezou nunha xogada a balón parado, un rexeite que lle chega a Villares e este non o dubida para, dende a frontal, poñer a pelota lonxe do alcance de Anxo.

Reacción insuficiente. 

O paso por vestiarios supuxo unha mellora importante, aínda que insuficiente, dos branquiazuis. As ocasións sucedéronse na área chegando boa parte delas pola banda esquerda con Naveira, Brais Abelenda e Remeseiro coma os principais buscadores dunha boa ocasión que chegou aos vinte minutos. Un gol de Miki Villar chegando dende atrás a centro de Naveira que poñía a merecida igualdade no luminoso. 

Unificando de novo liñas e mellorando en defensa, os lugueses non quixeron arriscar e poder saír de Santiago con algo positivo. A superioridade compostelanista foi case total mais non houbo sorte de cara a porta, algo co que si contaron os visitantes. Unha sorte que, acompañada dunha mala defensa nas xogadas a balón parado, levou ao segundo gol vilalbés obra de Xusto logo dun córner. 

Aythami, incapaz de ver portería. 

Despois de nove citas consecutivas na casa, Aythami quedou sen ver portería. Contra unha forte defensa formada por cinco homes e sen ocos nin erros, o canario case non tivo opcións de buscar o camiño do gol. Moi ben cuberto tivo a súa mellor ocasión no comezo do segundo tempo perdoando o que sería o gol do empate cun testarazo que saiu fóra por moi pouco. 

Agora, os nosos buscarán na Senra a clasificación matemática para a promoción así como encamiñar a terceira praza do campionato quedando xa sen opcións de ser campión e con moi escasas para ser segundo, quedando o Bergantiños a seis puntos. 

ALIÑACIÓN: Anxo; Sergio Pereira (Santi, min. 73), Casas, Piscu, Naveira; Mon, Remeseiro (Rubén, min. 81); Josiño (Miki, min. 56), Alex Ares, Brais Abelenda; e Aythami. 

CARTÓNS: Amarelos para Sergio Pereira e Piscu.

GOLES: 0-1 42' Villares, 1-1 65' Miki, 1-2 72' Xusto. 

CAMPO: Vero Boquete de San Lázaro. 

O momento máis importante

Chegamos ao treito final do campionato. Co segundo posto aínda en xogo, o Compos terá que afrontar o seu segundo encontro desta semana nun mércores onde os nosos precisarán do apoio da afección branquiazul para deixar atrás o resultado de Laracha. Diante estará o Racing Vilalbés, un dos mellores equipos desta segunda volta e que chegará ao Vero Boquete sen nada polo que loitar máis que o orgullo, logo de salvar a categoría sen correr ningún risco.

Sen riscos.

Con 29 puntos conseguidos en 15 xornadas, os de Vilalba son os que máis puntos conseguiron dende que arrincou a segunda volta. E é que logo de rematar a primeira volta, de maneira sorprendente, nos postos de descenso, os lugueses están agora salvados a catro xornadas para o final do campionato, sen pasar ningún tipo de risco a diferenza do que se puido pensar na primeira metade do torneo.

Con 46 puntos, os de Simón Lamas ocupan a undécima posición da táboa superando ao Paiosaco en 8 puntos mentres que son xa 12 os que o afastan dos postos de promoción de permanencia, quedando sen ningunha opción malia facer unha gran segunda volta. 12 triunfos avalan a un equipo forte a domicilio e que conseguiu outros 10 empates. Ademais, con 12 derrotas, é o equipo con menos partidos perdidos da metade baixa da clasificación. En canto a goles, anotaron e recibiron o mesmo número de goles: 42.

Outro dato curioso dos vilalbeses é que conseguiron o mesmo número de puntos tanto na Magdalena coma a domicilio: 23. Fóra da casa, gañaron ata 7 enfrontamentos sacando os tres puntos de campos coma Calabagueiros ou A Lomba mentres que só conseguiron empatar no Candocia e na Senra, un por volta. Uns grandes datos aos que engadir a xeira de 6 saídas consecutivas sen perder, sufrindo o último pau no Lourambal na primeira xornada desta segunda volta.

A nivel individual, contan nas súas filas con ex xogadores branquiazuis coma o central Taboada e os centrocampistas Make e Diego Rey. Ademais, o dianteiro Alex Pérez, baixa por lesión para este mércores, é o máximo anotador do equipo con 9 tantos mentres que Javi Pita, baixo paus, é unha das pezas fundamentais do gran momento que pasan.

Unha segunda volta para non esquecer.

O Racing Vilalbés está a facer unha segunda volta case inigualable. 29 puntos de 45 posibles con unicamente dúas derrotas, unha a domicilio, en Porriño, e outra en Vilalba, contra un Lugo B que suma o mesmo número de puntos que os seus veciños chairegos.

Os da Terra Chá, que encadean 4 vitorias consecutivas, son sen dúbida os mellores dunha segunda volta na que asinaron un total de 22 goles mentres que en contra recibiron só 12, con 4 nas dúas últimas citas. Unha segunda volta na que só quedaron sen marcar no derbi lugués mentres que foron quen de deixar a súa porta a cero en 6 citas.

3 de 3.

O Racing Vilalbés pisou o verde do Vero Boquete ata en tres ocasións e lonxe de sacar algún bo resultado, marchando con tres derrotas, nin sequera foron quen de marcar. Un dato que se compensa coas catro visitas dos nosos á Magdalena sen conseguir gañar nunca, asinando dous empates.

Con dous triunfos pola mínima, o mellor resultado para os de Yago Iglesias chegou a pasada campaña cunha vitoria con tres goles branquiazuis obra de Alex Ares, Tomás e Diego Rey, todos eles na segunda volta. Unha gran vitoria nun xogo igualado e coa promoción en xogo por parte dos dous conxuntos, aínda no comezo da segunda volta do curso.

Por outro lado, na primeira volta, o resultado en Vilalba foi de empate grazas aos goles de Ballesteros e un Aythami moi en forma e que este mércores buscará marcar na casa por décimo encontro consecutivo, chegando un tanto máis descansado que o resto de compañeiros despois de quedar fóra da convocatoria para o xogo contra o Laracha sendo o descarte de última hora.

Cara e cruz.

A pasada xornada deixou un novo triunfo para os vilalbeses mentres que o Compos encaixou a peor goleada dende que Yago Iglesias está no banco branquiazul. Dous partidos xogados o pasado domingo e que deixaron unha cousa en común: os goles.

O Compos recibiu unha derrota tan dolorosa coma avultada. Cinco goles en contra con diversos erros en defensa sobre un campo artificial que non está a deixar boas sensacións aos nosos este ano. Na outra portería, Alex Ares fixo o único tanto dos nosos xa case sen opcións de remontar.

O Racing Vilalbés puido poñer terra de por medio en cousa de dez minutos contra un Paiosaco que igualou a contenda antes do tempo de lecer con dous goles de Otero. No segundo tempo, Villares fixo o terceiro para os locais e o segundo na súa conta particular asinando tres puntos que os achegan á permanencia xa case de xeito matemático.

Recuperando efectivos. 

Malia poder acusar o cansazo logo do partido do domingo en Laracha, Yago Iglesias terá á súa disposición a case todos os xogadores para recibir ao Racing Vilalbés. O ribeirense recuperará para o partido a Miki, Piscu e Aythami, que caeu da última convocatoria xusto antes do partido por enfermidade. Por contra, seguirá unha semana máis fóra dos terreos de xogo Samu, cuxa volta podería estar moi preto. 

Calor e fútbol.

Mércores festivo e con previsión de calor nun Vero Boquete que podería presentar unha boa imaxe logo da iniciativa posta en marcha polo clube pola cal cada aboado puido retirar, ata hoxe, dúas invitacións. Por outro lado, as entradas nas billeteiras terán un prezo de 10 euros mentres que os menores de 18 anos pasan de balde.

Quen non poida asistir ao encontro poderá seguilo a través das contas de Twitter tanto da Curva Branquiazul coma do clube así como escoitalo en directo a través de 'Esedé Radio', na web oficial do clube. 

Os erros condean ao Compos

O Compos non puido volver con nada positivo do Municipal de Laracha nun dos peores partidos dos nosos en anos. Unha cadea de erros en defensa nun Compos que segue aumentando os malos resultados lonxe do Vero Boquete encaixando a peor goleada en case tres anos, igualando a recibida en Abegondo na primeira xornada na volta á Terceira contra o primeiro filial deportivista. 

Sen ideas, sen sorte, contra un rival que non desaproveitou ningunha oportunidade e sen ser quen de meterse no partido. Un desastre irrepetible a falta dun mes para o arrinque da promoción de ascenso e que leva os nomes de Manu Mosquera, Iago Parga, Iago Novo e Guedes, autores dos cinco tantos laracheses. Por outro lado, Alex Ares buscou manter con opcións aos nosos cun gol dende os once metros e, minutos despois, unha falta que de entrar tería cambiado o final do xogo.

Sen excusas. 

Nun campo de herba artificial xa demostraron os nosos ter numerosas complicacións para sacar bos resultados e no Municipal de Laracha non foi menos. Con só un pequeno aviso sobre a porta defendida por Santi Canedo, as sorpresas non tardaron en chegar co primeiro gol local. Un tanto logo dun erro en defensa de David Uña, o disparo que non consegue parar Lorenzo e, logo de posiblemente recibir un golpe na pelexa polo esférico, tanto de Manu Mosquera para abrir a lata. 

As sensacións non melloraron moito máis durante un primeiro tempo que rematou con outra acción un tanto polémica. Un balón longo para Manu Mosquera e Álvaro Casas toca ao dianteiro cando entraba na área. Sen entrar en se o toque é suficiente ou non, penalti a prol do Laracha e gol de Iago Parga dende os once metros para restar algo máis as opcións para un Compos que vía como se escapaba a segunda praza do campionato. 

Máis do mesmo nos instantes iniciais do segundo tempo nos que, lonxe de mellorar o xogo branquiazul, chegou a que ben puido ser a sentenza definitiva para os laracheses. Un gol de Guedes a porta aproveitando un rexeite de Lorenzo para marcar a porta baleira. 

Reacción interrompida. 

Cunha vantaxe case insalvable, Alex Ares buscou meter ao equipo no partido cun gol que de pouco serviu. Unha man dentro da área e segundo penalti da tarde que non perdoa o eumés. Un gol que fixo espertar aos nosos durante uns minutos nos que o propio Ares puido recurtar distancias algo máis cun disparo de falta que saiu por moi pouco. 

Non obstante, a reacción branquiazul rematou en menos de cinco minutos. Outro centro dende a banda directo ao segundo pau, onde non chega Lorenzo e con erro de Saro á hora de intentar despexar o esférico. Cuarto tanto da tarde e segundo na conta particular de Guedes para matar definitivamente o xogo. 

A sentenza chegou co mellor tanto da tarde. Un gran gol de Iago Novo logo de varios caneos para desfacerse da defensa branquiazul e que supoñía o quinto do tarde. Unha goleada moi importante e que deixa malas sensacións no treito final do campionato. 

Agora toca preparar o xogo fronte ao Racing Vilalbés do vindeiro mércores no que buscarán deixar pechada a clasificación matemática para a promoción así como o terceiro posto.

ALIÑACIÓN: Lorenzo; Saro, Casas, Uña, Chechu (Naveira, min. 46); Mon, Remeseiro (Alberto, min. 71); Brais Abelenda, Alex Ares, Rubén (Josiño, min. 46); e Santi.

CARTÓNS:

GOLES: 1-0 11' Manu Mosquera, 2-0 41' Iago Parga, 3-0 51' Guedes, 3-1 64' Alex Ares, 4-1 68' Guedes, 5-1 80' Iago Novo. 

CAMPO: Municipal de Laracha.

Semana importante

O Compos arrinca este domingo unha semana un tanto diferente e, sobre todo, importante. Os de Yago Iglesias terán que pelexar en ata tres partidos en cousa de oito días, algo que non pasaba dende o arrinque do curso, co equipo aínda vivo na Copa do Rei. Tres partidos de liga nos que se podería pechar o primeiro obxectivo, que non é outro que a clasificación para a promoción de ascenso de xeito matemático, e buscar o segundo, que é revalidar o campionato da Terceira división.

Esta nova serie de tres partidos arrinca o domingo no Municipal de Laracha. O Laracha, segundo filial do Deportivo, é xa equipo de Preferente logo do descenso do Fabril, buscará pechar a súa presenza na Terceira cun triunfo diante dun Compos coa única intención de recuperar o camiño da vitoria lonxe do Vero Boquete de San Lázaro.

Os primeiros en descender.

O Laracha, equipo con convenio de filialidade co Deportivo, asinou o seu descenso administrativo á Preferente galega hai xa dúas semanas. Un equipo que estaba a facer un bo curso ocupando a día de hoxe o 16º posto na táboa. Sen xa nada en xogo, un equipo que quere pechar o curso deixando unha boa lembranza aos seus afeccionados.

Con 36 puntos logo de 33 partidos xogados, o cadro larachés asinou un total de 9 triunfos, boa parte deles na casa, e outros tantos empates. Un equipo que puxo contra as cordas aos grandes da categoría, conseguindo empatar contra equipos coma Bergantiños, Arosa ou UD Ourense entre outros e gañando, no Municipal de Laracha, a un Choco que foi de menos a máis ao longo da tempada. Por outro lado, 15 derrotas totais cun 3-0 en contra na Senra que supuxo a súa derrota máis avultada. En canto a goles, anotaron un total de 34 tantos sendo un dos conxuntos con menos acerto de cara a porta pero compensando isto cos só 39 goles en contra, que o sitúan no sétimo posto de equipos con mellor defensa só superados polos catro primeiros e os dous conxuntos da cidade de Ourense.

No Municipal de Laracha, os de Óscar Gilsanz conseguiron unha boa parte dos seus puntos. Ata 23 puntos quedaron no feudo larachés grazas a 6 triunfos, entres os que destacar o 3-0 contra o Arenteiro sendo a vitoria con mellor resultado con outros 4 pola mínima, e 5 empates, con só un partido sen goles e o resto repetindo o empate a un gol. Por outro lado, un total de 5 derrotas, todas elas pola mínima.

A nivel individual, Adrián está a sobresaír no equipo a base de goles. O canteirán do Depor suma 7 tantos e dous deles nas dúas últimas xornadas, buscando o seu terceiro tanto consecutivo e chamar ás portas do Fabril de cara á vindeira campaña.

Tres de oito.

Esta será a novena saída do Compos neste 2019. Oito saídas atrás que se pecharon con só 3 triunfos, 2 empates e 3 derrotas conseguindo puntuar por última vez fóra do vero Boquete hai máis dun mes, no Couto contra a UD Ourense e sendo a única vitoria a domicilio dende febreiro. Ao anterior hai que engadir que os nosos só puideron anotar 2 goles nas 4 últimas citas lonxe de Santiago.

Un Compos moi diferente ao que xoga diante da súa afección e que non só non foi quen de superar con crecer os últimos encontros, sen perder en toda a segunda volta, senón que, ademais, non recibiu ningún gol nas tres últimas citas. 

Pola súa parte, o Laracha leva puntuando nas dúas últimas xornadas, gañando ao Silva e empatando sen goles diante do Céltiga. Un equipo que, no Municipal, conseguiu 8 puntos de 21 posibles perdendo ata en tres ocasións sempre pola mínima, incluíndo un 2-3 contra o Bergantiños con dous goles dos carballeses nos quince últimos minutos. 

Volta á vitoria?

O Compos buscará este domingo volver ao camiño do triunfo a domicilio recuperando as boas sensacións perdidas en Santa Mariña. E é que o equipo de Yago Iglesias non encadea dúas vitorias consecutivas dende que gañou a Racing de Ferrol, UD Ourense e Porriño Industrial en marzo. E despois do triunfo, con máis acerto que bo xogo, contra o Arenteiro, o equipo quere seguir polo bo camiño. 

Pola súa parte, o Laracha quere encadear a terceira xornada seguida sen perder diante da súa afección por segunda vez, logo de catro vitorias consecutivas na casa dende o mes de setembro e ata outubro convertindo ao equipo nunha sorpresa importante no primeiro treito do campionato colocándose na sexta praza con once xornadas xogadas.

O Municipal, campo complicado. 

Ata en catro ocasións visitou o Compos o Municipal de Laracha nos últimos anos. Un territorio onde se asinou unha gran goleada alá polo ano 2007 mais que se foi complicando nas recentes campañas. Dun 3-6 ata a vitoria pola mínima do pasado curso pasando por un partido sen goles nun campo complicado para os homes de Yago Iglesias, os cales conseguiron os tres puntos o ano pasado grazas a un gol de Róber.

En canto á primeira volta, no Vero Boquete, a Esedé abriu a lata cun gol de Iago en propia porta mentres que Aythami asinou o segundo e Brais Abelenda pechou a vitoria co terceiro xa no segundo tempo. Mosquera, xa co encontro pechado, fixo o único gol dos laracheses. 

Domingo, mércores, domingo.

O Compos terá que enfrontar ata tres partidos de liga en cuestión de oito días. Unha semana que pode marcar o treito final para un equipo que pode seguir pelexando pola primeira posición, pechando a súa clasificación para a promoción conseguida xa de xeito virtual, ou ben perder as opcións de seguir a estela do Racing de Ferrol e ocupar as cinco xornadas que restan ata o final do curso para preparar un posible novo ascenso á categoría de bronce do fútbol español.

Comezando esta lista co Laracha, o mércores pasará polo Vero Boquete un Racing Vilalbés que case se pode dicir que non pelexará por máis que dar unha boa nova á súa afección no 'Día do traballador'. A semana rematará coa visita branquiazul á Senra para visitar a un Ribadumia inmerso na pelexa pola permanencia, con Tomás nas súas filas.

Casas volve. Miki e Samu, caen.

Logo da estrea de Alberto no centro do campo a pasada xornada diante do Arenteiro, Yago Iglesias conta a día de hoxe con só dúas baixas. E é que recupera tamén a Álvaro Casas para o centro da defensa mentres que perderá, unha semana máis, a Miki, aínda esperando o alcance da súa lesión sufrida contra o Choco en Santa Mariña, e a Samu. Podería volver tamén ao equipo Álvaro Naveira despois dunha xornada de sanción e chegando a este partido sen apercibidos que se puideran perder o enfrontamento contra o Racing Vilalbés do vindeiro mércores.

Horario xa habitual. 

O Laracha-Compos terá lugar este domingo no Municipal de Laracha ás 18 horas. Un bo partido para o que as entradas terán un prezo de 10 euros para os afeccionados branquiazuis que queiran desprazarse. 

Por contra, quen non poida asistir, poderá seguirse a través das contas de Twitter tanto da Curva Branquiazul coma do clube. Ademais, poderá verse en directo a través da TVG. 

Rompendo barreiras

O Compos superou ao Arenteiro nun duro partido no Vero Boquete onde o equipo carballiñés puxo as cousas moi difíciles defendendo con todo e buscando a portería de Lorenzo, sen premio. No outro lado, un gol de Aythami para manter a súa efectividade na casa, Brais Abelenda e Mon nun partido que quedará marcado pola volta aos terreos de xogo de Alberto, que se estreou este curso portando o brazalete de capitán logo de superar unha pubalxia que o obligou a pasar por quirófano hai uns meses. 

Moito con pouco. 

Catro días despois da derrota en Santa Mariña, o Compos saltou ao terreo de xogo con intención de non arriscar ningún balón. Fronte a un Arenteiro que se limitou a defender con todo e saír á contra, os de Yago Iglesias non puideron probar sorte contra o gardamallas ata superados os 45 minutos do tempo regulamentario no primeiro tempo. 

Cun plantexamento moi defensivo, cunha barreira case insuperable, o Arenteiro baseou o seu xogo en balóns en longo para Hugo Sanmartín. De feito, ata por tres ocasións estivo a piques de saír ben o traballo de Gelucho na primeira parte con tres contraataques cos que superaron as costas da defensa mais non así a un Lorenzo moi serio baixo paus. 

Dando a volta ao guión habitual nos partidos dos nosos, foi o Compos o que soubo aproveitar ben os erros do Arenteiro de cara a gol. Polas bandas, única maneira de poñer en problemas á zaga carballiñesa, chegou un primeiro gol que arrincou nas botas de Marcos Remeseiro, pasou polas de Rubén, poñendo un gran centro á área, e rematou con Aythami empurrando a pelota ao fondo das redes. Un gol no engadido e que supuxo un golpe anímico para os visitantes con todo o segundo tempo por diante. 

Sentenza sen opcións. 

A segunda metade foi un dominio total dun Compos que mantivo o seu asedio polas bandas, con Rubén protagonizando os mellores centros para que Aythami e compañía puideran ampliar diferenzas nun partido con algo de trampa. 

O segundo gol, co que poñer algo de tranquilidade no marcador, tivo de novo como protagonistas a Remeseiro, arrincando a xogada, e Rubén, como asistente, mentres que nesta ocasión o encargado de materializar a ocasión foi un Brais Abelenda que entrara ao terreo de xogo dous minutos antes, marcando no primeiro balón que tocou. 

Con pouco máis conto e xa sen Rubén sobre o verde, foi Alex Ares o que se puxo a camisola de asistente. De novo pola banda, o eumés puxo un centro ao corazón da área e alí apareceu Mon para, cun testarazo imparable, pechar unha goleada que rematou con Alberto como capitán na súa estrea. 

De novo a cero. 

A diferenza do que está a pasar a domicilio, o Compos pechou o seu terceiro encontro consecutivo na casa deixando a portería a cero. Agás as ocasións de Hugo Sanmartín nos primeros compases do xogo, Lorenzo non tivo grandes problemas para manter a portería imbatida nunha nova vitoria dos nosos, comezada de novo dende unha forte defensa. 

ALIÑACIÓN: Lorenzo; Saro, Piscu, Chechu, Sergio Pereira; Mon, Remeseiro; Santi (Brais Abelenda, min. 60), Alex Ares (Alberto, min. 82), Rubén (Josiño, min. 71); e Aythami. 

CARTÓNS: Amarelo para Mon.

GOLES: 1-0 45' Aythami, 2-0 63' Brais Abelenda, 3-0 79' Mon. 

CAMPO: Vero Boquete de San Lázaro. 

Santo fútbol

A Semana Santa déixanos dúas cousas: vacacións e fútbol. E é que o xoves, case sen tempo para asimilar a dura derrota colleitada en Santa Mariña, abrirá de novo as súas portas o Vero Boquete de San Lázaro para recibir ao Arenteiro nun partido entre dous equipos con aspiracións moi diferentes e que queren encamiñar, cando antes, os seus obxectivos.

Un Compos que buscará seguir sumando de tres na casa, con resultados cada vez mellores, e esquecer a derrota diante do Choco e un Arenteiro que depende de si mesmo para asinar a permanencia na Terceira por segundo ano consecutivo.

Pendentes do arrastres.

O Arenteiro está a facer unha boa tempada co obxectivo de manterse, por segundo ano consecutivo, na Terceira división. Regulares tanto na casa coma a domicilio, pecharon boa parte dos seus partidos con empates, sendo o equipo que máis rematou con reparto de puntos. 

Ocupando a 14ª posición da clasificación, o cadro do Carballiño conseguiu un total de 38 puntos grazas a 9 triunfos e 11 empates, asinando case os mesmos puntos tanto na casa coma a domicilio. Ademais, 12 derrotas do equipo dirixido por Gelucho perdendo 6 veces en Espiñedo e outras tantas fóra. En canto aos goles, trátase dun equipo que fai valer cada gol despois de anotar 34 goles e que só 5 quedaran sen valor. Por contra, recibiron outros 43 goles deixando a súa porta a cero ata en 7 ocasións incluíndo o empate sen goles entre Arenteiro e Compos en Espiñedo na primeira volta. 

Lonxe de Espiñedo conseguiron un total de 18 puntos, dous menos que na casa. 4 triunfos, entre o que destaca o conseguido no Couto diante do Ourense CF, e 6 empates, co 2-2 como resultado máis repetido, avalan a un equipo moi perigoso e que basea o seu xogo na defensa aínda máis cando sae do Carballiño. Ademais, 6 derrotas, 4 delas pola mínima, asinando a última no mes de febreiro na Senra contra o Ribadumia de Tomás Abelleira. 

A nivel individual, nun equipo liderado polo ex branquiazul Portela, está a destacar Hugo Sanmartín. O dianteiro vigués mantén ben situado ao equipo a base de goles logo de asinar 13 goles facendo un total de 4 dobretes e anotar 7 tantos a domicilio. 

No Vero Boquete é outra cousa. 

O Compos está a ter problemas para puntuar a domicilio nas últimas xornadas. A derrota da pasada fin de semana, coa que perdeu unha ocasión inmellorable para achegarse ao máis alto, en Santa Mariña non foi o primeiro pau recibido polos nosos lonxe do Vero Boquete. E é que a Esedé só asinou 1 dos últimos 9 puntos en xogo fóra de Santiago. Uns datos moi diferentes ao conseguido na casa, onde só asinou un empate fronte ao Paiosaco nun partido que se definiu no engadido. A iso hai que engadir os 21 goles a favor nos 5 últimos xogos como local. 

Pola súa parte, o Arenteiro chega de sumar de tres en Espiñedo contra o Paiosaco nun xogo que se definiu no segundo tempo. Un equipo que quere sacar de Santiago os tres puntos despois de 3 saídas sen perder. 

En canto ao partido da primeira volta, o resultado foi de empate sen goles. Espiñedo non puido gozar dunha boa tarde de fútbol nun partido onde mandaron os nosos sobre o verde mais no que ningún equipo soubo materializar as ocasións, escasas e sen perigo real. 

Precedentes positivos.

Os enfrontamentos entre Compos e Arenteiro remataron con moi bos resultados en Santiago, tanto en Santa Isabel e no Vero Boquete. Os nosos conseguiron un total de 5 vitorias e 1 empate que data de 1986. Partidos que remataron con importantes goleadas dos nosos entre as que destacar un 5-0 e un 4-0 na última visita do equipo carballiñés á capital galega, a pasada tempada, con goles de Alex Ares, Primo, Róber e Ube. 

En liña ascendente. 

Dende a visita do Racing de Ferrol a Santiago, os resultados dos nosos na casa foron en aumento. Catro goles diante do cadro verde, outros cinco diante do Porriño e seis para pechar o triunfo contra o Boiro. Tres goleadas consecutivas e dúas xornadas, as dúas últimas, nas que nin sequera houbo goles en contra. 

Ao anterior hai que engadir o gran momento polo que pasa Aythami. O dianteiro canario foi autor de 3 goles contra o Boiro, 4 contra o Porriño, 1 contra o Racing, Alondras, Ourense CF, Ribadumia, Laracha, Choco e Céltiga. Un dos máximos artilleiros do campionato que medra diante da súa afección. 

Naveira cae da lista.

Á lista de baixas por lesión, que ocupan Alberto, Chechu e Samu, hai que engadir outra ausencia importante para este xoves. Naveira, dono da banda esquerda, non poderá estar contra o Arenteiro despois de ver o quinto cartón amarelo en Santa Mariña. 

Xoves de festa. 

Por mor da Semana Santa e con intención de dar uns días de lecer ao equipo para afrontar mellor o treito final do curso, esta xornada adiántase ao xoves. Un xoves no que o Vero Boquete abrirá as súas portas para dar comezo ao partido ás 18 horas. Un gran xogo no que as entradas terán un prezo de 10 euros para non aboados mentres que será de balde para aboados e menores de 18 anos. 

Quen por contra non se poida achegar ao teatro dos soños branquiazul poderá seguir o encontro a través das contas de Twitter tanto da Curva Branquiazul coma do clube. Ademais, poderá escoitarse en directo a través da 'Esedé Radio', na web oficial. 

Nova ocasión desaproveitada

Xuntáronse dúas cousas este domingo en Santa Mariña. Un Compos incapaz de deixar boas sensacións a domicilio e a derrota do Bergantiños na tarde do sábado no Couto. Unha ocasión inmellorable para achegarse ao máis alto da clasificación e, como xa ven sendo habitual nos últimos anos, oportunidade desaproveitada polos homes de Yago Iglesias. Vitoria para un Choco que segue invicto na casa contra un rival que deixou unha moi mala imaxe sen poñer en perigo a porta defendida por Cortegoso ata os vinte minutos finais, cando pareceron espertar xa sen opcións de sacar algo positivo. 

Efectividade total. 

O partido en Redondela arrincou con gran igualdade e sen ocasións. Un partido pechado, sen moito fútbol e sen ocasións ata superar a media hora de xogo. Co Compos practicamente desaparecido sobre o verde, o pouco fútbol púxoo un Choco que aproveitou as dúas ocasións que tiveron nos noventa minutos para facerse cos tres puntos. 

O primeiro dos redondeláns, aínda no primeiro tempo, foi obra de Antón Vilas logo de gañar un balón dividido por alto a Piscu, protexer a posesión e poñela fóra do alcance de Lorenzo. Un gran gol que supuxo a inauguración do marcador en Santa Mariña contra unha Esedé que nin sequera foi quen de reaccionar. 

Ante esa falta de reacción, tanto nos intres finais do primeiro tempo coma nos iniciais do segundo, o Choco non quixo desaproveitar para poñer a que sería a sentenza no luminoso. Un segundo gol que comezou cun saque de Lorenzo que caza Comis e que remata, de novo con acerto, Félix Rial ante o gardameta padronés. 

A reacción, xa sen tempo.

Cunha vantaxe difícil de igualar, e máis aínda vendo como estaba a ser o encontro, chegaron dous trocos que pareceron mellorar a imaxe branquiazul. A entrada de Santi e Alex Ares supuxo que os homes de Yago Iglesias gozara un pouco máis da posesión do esférico e as ocasións sobre a portería de Cortegoso chegaran.

Comezando cun centro de Naveira que non foi quen de rematar Miki, hai que salientar un man a man errado de Josiño, unha posible ocasión de Aythami que tapou ben un contrario e un disparo de falta de Alex Ares ante o que o gardamallas tivo que facer unha gran estirada para evitar que os nosos puideran, xa tarde, meterse no partido.

Agora, o Compos terá moi pouco tempo para preparar a visita do Arenteiro ao Vero Boquete o xoves. A oportunidade para recuperar as boas sensacións, a boa imaxe e os resultados positivos no campo onde só o Paiosaco puido puntuar na segunda volta. 

ALIÑACIÓN: Lorenzo; Sergio Pereira, Piscu, Uña, Naveira; Mon, Remeseiro (Santi, min. 63); Miki (Rubén, min. 78), Josiño, Brais Abelenda (Alex Ares, min. 63); e Aythami. 

CARTÓNS: Amarelos para Naveira e Santi.

GOLES: 1-0 39' Antón Vilas, 2-0 49' Félix.

CAMPO: Santa Mariña. 

Campo imposible?

A día de hoxe só quedan dous campos en toda a categoría nos que ninguén foi quen de gañar no que vai de curso. Un é A Malata, onde os nosos conseguiron un punto logo dun xogo sen goles e con ocasións de serio perigo entre moito respecto. O outro é Santa Mariña, campo do que saíron con empate a metade dos equipos que por alí pasaron pero no que ninguén puido sumar de tres con Bergantiños, Barco e UD Ourense, entre outros, sufrindo incluso para facer un punto.

Por outro lado, un Compos que na casa vai a golpe de goleada nas últimas datas e que quere non só ser o primeiro en gañar en Redondela senón, ademais, conseguir a cuarta vitoria a domicilio deste ano 2019.

O dobre de puntos na casa.

Un dos grandes equipos cando xoga diante da súa afección, con números semellantes aos feitos polos equipos da parte alta da táboa, pero con rexistros a domicilio que o poderían situar entre os postos de serio perigo neste final de liga. O Choco, agora mesmo na zona media da clasificación, quere aínda manterse nunha loita pola cuarta posición aínda sen dono e con ata cinco equipos con opcións pechando esta lista o cadro redondelán, a 5 puntos da UD Ourense. Un equipo que, ademais, pechou na Porta Santa unha xeira de 15 xornadas consecutivas sen perder.

47 puntos manteñen ao equipo dirixido por Gonzalo Fernández na oitava posición da táboa nunha segunda volta con moito aínda en xogo tanto na parte alta coma na baixa. Un equipo que, en total, asinou 12 vitorias, 11 empates e 8 derrotas sendo, xunto co Arenteiro, o equipo con máis repartos de puntos da categoría. Por outro lado, trátase dun equipo con gol logo de anotar 48 tantos sendo o cuarto equipo con máis acerto, mentres que en defensa ata once equipos recibiron menos dos 39 encaixados polos redondeláns.

Diante da súa afección, trátase dun dos equipos máis fortes do campionato, cunha forte defensa e un gran acerto de cara a portería. É así que o Choco non encaixou ningunha derrota en Santa Mariña no que vai de tempada mais, non obstante, asinaron un total de 7 empates contra rivais coma Bergantiños, UD Ourense ou Barco, repetindo o empate a 2 nas citas contra os dous conxuntos da provincia ourensá. Por outro lado, 8 vitorias entre as que destacan as goleadas fronte Racing Vilalbés e Céltiga, facendo cinco e seis goles respectivamente.

A nivel individual, é inevitable non destacar a Félix. O vigués, autor do único gol do Choco na Porta Santa, suma un total de 14 goles supoñendo outros tantos puntos para os seus. Non obstante, é un dianteiro que só puido facer 6 deses tantos diante da súa afección acertando máis a domicilio.

Dende abril.

15 de abril de 2018. Nada en xogo en Redondela. Choco e Ribadumia medían forzas a estas alturas do campionato a pasada tempada. O Ribadumia, con Josiño no once titular, adiantouse superado o cuarto de hora de xogo grazas a un gol de Miguel. Unha vitoria que arrincaba así e que remataba, non sen sufrir, cun gol de Rubén Cerqueiras para os visitantes nos intres finais do tempo regulamentario.

Dende esa derrota, hai case un ano, o Choco non volveu caer na casa en partido de liga. Pecharon o pasado curso cun empate fronte ao Racing Vilalbés e unha vitoria contra o Barbadás acabando coas opcións de permanencia do cadro dos Carrís e comezaron o presente cun empate sen goles diante do Arenteiro. A partires de aí, o que xa se comentou antes. Sen derrotas e cunha vitoria máis ca empates.

15 xornadas sen perder.

Dende o 2 de decembro, cando non puideron sacar nada positivo fronte ao Racing de Ferrol, e ata a derrota na Porta Santa a pasada fin de semana, o Choco estivo catro meses sen perder. 7 vitorias e 8 empates avalan a un equipo que, por contra, pechou a súa gran xeira de resultados contra o Paiosaco nun partido no que chegaron con vitoria ao treito final, onde os laracheses, con dous goles de Iván Amor, conseguiron darlle a volta ao resultado.

Por contra, o Compos chega de golear a un Boiro que non tivo opción, por debaixo no marcador dende os minutos iniciais do encontro. Un novo triunfo cunha gran exhibición de Aythami, que suma 8 goles nos 3 últimos partidos xogados no Vero Boquete, mentres que a domicilio non o fai dende hai mes e medio.

Historia branquiazul.

Compos e Choco enfrontáronse nun total de 11 ocasións ata o momento cun claro ton branquiazul nos resultados. De feito, o Choco só foi quen de gañar aos nosos nunha ocasión: en San Lázaro o pasado ano con goles de Gabi e Chiqui. A parte, 6 triunfos para os nosos e 4 empates sempre con goles deixando claro que aos nosos non se lles dá nada mal ver portería contra os redondeláns.

En Redondela, 2 vitorias e 3 empates, sempre con goles dos dous equipos. De feito, o primeiro triunfo dos nosos diante do Choco, alá por 1963, chegou con goleada por 1-7 mentres que o segundo foi en decembro de 2017 grazas aos goles de Tomás e Primo nun partido que rematou con gol de Pablo Couñago xa no engadido.

Falando do último partido entre Compos e Choco, no Vero Boquete na primeira volta, a vitoria quedou na capital galega. Un triunfo con goleada incluida e que quedou practicamente sentenciado aos quince minutos cos goles de Brais Abelenda, Alex Ares e Aythami. Xa no segundo tempo anotou o cuarto Mon e Félix fixo o tanto da honra para os seus minutos máis tarde.

Tres ausencias importantes.

Para este domingo, Yago Iglesias contará coa baixa xa máis que coñecida dun Alberto que xa comeza a adestrar co resto dos seus compañeiros pensando no treito final do campionato. Ao centrocampista hai que engadir as ausencias doutros dous xogadores que xa non puideron estar diante do Boiro e que supoñen dúas baixas moi importantes. Samu e Chechu, ámbolos dous pendentes de evolución ao longo da semana, apuntan a que terán que ver o partido dende a bancada de Santa Mariña.

Primeiro en cinco días.

O Compos arrincará en Redondela este domingo o primeiro partido en cinco días xa que o xoves, día festivo, terá que recibir no Vero Boquete ao Arenteiro. En Santa Mariña, o encontro dará comezo ás 17 horas e as entradas terán un prezo de 13 euros para os afeccionados branquiazuis.

Para quen non poida asistir ao encontro, poderá seguirse a través das contas de Twitter tanto da Curva Branquiazul coma do clube.

Set e partido

O Compos asinou a maior goleada do campionato contra un Boiro que, malia o que poida indicar o resultado, non puxo as cousas nada doadas. Un partido no que Aythami volveu deixar mostras da súa facilidade de cara a gol con outros tres tantos na súa conta particular, e unha asistencia para o cuarto da tarde. Josiño, Remeseiro e Santi completaron unha goleada na que, ademais, a volta de Lorenzo á porta branquiazul rematou sen goles recibidos. 

Aythami, un gran acerto. 

O partido arrincou do mellor xeito posible. Un Compos que se quixo mostrar superior dende o comezo buscando evitar un susto como o recibido en Calabagueiros e para iso, contra un rival ben colocado, a primeira ocasión, e gol, chegou a balón parado. Centro de Marcos Remeseiro e Aythami, no segundo pau, non perdoa. A pelota sácaa Rodri mais xa traspasara a liña. 

Co primeiro no marcador, a cousa foi algo máis doada contra un Boiro que case non puido facer máis que defenderse. Non obstante, malia ter a posesión do esférico e pasar gran parte do tempo en campo visitante, as ocasións non chegaron con claridade agás, unha vez máis, dende a esquina. E de novo repítense os protagonistas con Marcos Remeseiro poñendo a pelota na área, Rodri fallou na saída e Aythami só tivo que poñer a punteira da bota para encamiñar un novo triunfo. 

Ao igual que diante do Porriño Industrial, o canario non quixo desaproveitar a oportunidade de aumentar un novo balón á súa colección. Aínda así, o 'hat trick' fíxose de rogar con dúas oportunidades perdoadas, a segunda salvada no último momento por Cardeñosa, mentres que á terceira, logo doutro erro defensivo, non perdoou. O sétimo tanto do canario nas dúas últimas citas no Vero Boquete chegou, neste caso, despois dun rexeite a un tiro de Brais Abelenda.

Moita tranquilidade. 

Co partido xa finiquitado, o segundo tempo non foi máis que un mero trámite. Con moita tranquilidade, os goles seguiron chegando sobre a portería defendida por Rodri. O cuarto da tarde, con só dez minutos dende a reanudación, levou de novo o selo de Aythami, aínda que neste caso como asistente. O canario desfíxose do gardamallas e só tivo que poñer a pelota para que Josiño a empurrara a porta baleira. 

Xa sen o canario sobre o verde, retirado por precaución despois de dúas entradas perigosas, os protagonistas pasaron a ser outros. Marcos Remeseiro, asistente nos dous primeiros goles, quixo participar tamén no quinto dando a pelota a Brais Abelenda na xogada que remataría co ex racinguista no chan e unha pena máxima para materializar un novo gol. E foi o propio centrocampista coruñés quen, dende os once metros, enganou ao gardamallas para asinar o quinto e mellorar, aínda máis, unha gran cita. 

Unha gran goleada que tivo un mellor fin. O sexto, co que se pechou o 'set', foi obra dun Santi que viu porta case dous meses despois. O de Navia recibiu a pelota de Miki, controlou e sen moverse nin un paso puxo a pelota na escadra, fóra das posibilidades de Rodri. O gran gol do partido e da xornada para un xogador que aproveitou á perfección os seus minutos aparecendo dende o banco de suplentes. 

Agora toca pensar xa nun encontro sempre complicado en Redondela pensando en aproveitar o máis mínimo erro para ascender algún posto na clasificación. 

ALIÑACIÓN: Lorenzo; Sergio Pereira, Piscu, Uña, Naveira; Mon, Remeseiro; Miki (Alex Ares, min. 71), Josiño, Brais Abelenda (Saro, min. 64); e Aythami (Santi, min. 58). 

CARTÓNS: Amarelos para Miki e Mon. 

GOLES: 1-0 3' Aythami, 2-0 25' Aythami, 3-0 39' Aythami, 4-0 55' Josiño, 5-0 62' Remeseiro, 6-0 70' Santi. 

CAMPO: Vero Boquete de San Lázaro.

Puntos vitais

Rematado o 'Tourmalet', lonxe do mellor resultado posible, toca a parte máis dura do campionato. A liga regular está na súa fase final, onde xa se definen tanto os postos pola parte máis alta do campionato como pola parte baixa. E nada mellor para demostrar a necesidade de gañar tanto por facerse co posto máis privilexiado da táboa ou ben por saír dos postos de descenso á Preferente que un partido no Vero Boquete entre o terceiro clasificado e o penúltimo nunha loita que se presume máis igualada do que realmente di a clasificación.

Con opcións.

O Boiro ven de facer unha segunda volta para esquecer. Os agora adestrados por Luis Santiago, que se sentará no banco boirense por segunda vez dende a súa fichaxe, non gañan dende hai máis de mes e medio, cando o fixeron en Barraña fronte ao Somozas, e a domicilio dende xaneiro, no Municipal da Laracha pola mínima. Dúas vitorias ás que sumar outros tres empates chegando a esta cita con 9 dos últimos 33 puntos en xogo. Unha xeira que sitúa ao equipo nos postos de descenso mais con aínda opcións de salvar unha categoría na que suman a súa segunda tempada consecutiva logo dun descenso administrativo.

28 puntos sitúan ao cadro boirense só por enriba do Porriño Industrial e a 4 puntos dun Céltiga que, a día de hoxe e sen ter en conta posibles arrastres, marca os postos de permanencia. Un Boiro que pechou a primeira volta fóra dos postos de descenso caendo en picado acumulando un total de 6 xornadas sen conseguir a vitoria. En total, 7 vitorias e outros tantos empates sacando algo positivo da Lomba e As Eiroas, ademais de conseguir un punto contra os nosos, e gañando todos os seus encontros pola mínima. Ao anterior hai que engadir outras 16 derrotas. En canto a goles, 28 a favor e 53 en contra que os colocan como o segundo equipo con menos acerto e o terceiro que máis encaixa.

Un equipo sempre difícil en Barraña e que xa puido dar máis dunha dor de cabeza a domicilio. Conquistado o Candocia, A Cheda e o Municipal de Laracha, os de Luis Santiago empataron na Magdalena, A Lomba, As Eiroas, A Senra e O Couto. Por outro lado, en canto ás derrotas, 7, chegaron sempre despois de recibir 2 ou máis goles con só 2 pola mínima.

Presidente e o máximo goleador. Changui, que cumprirá 42 anos nuns días, segue perforando porterías cando non se encarga de dirixir un Boiro cuxo mando tomou a escasas horas da máis que posible desaparición dun histórico do fútbol galego hai case 2 anos. A día de hoxe, despois de 28 partidos xogados polo ex dianteiro da Esedé, suma un total de 10 goles sendo, de lonxe, o máximo artilleiro boirense e o xogador con máis calidade das filas dun equipo que non se lle dá de todo ben ao Compos.

Vellos coñecidos.

Se xa na primeira volta había que contar ata catro defensas no Boiro con pasado do Compos e un dianteiro, agora hai que contar unha peza máis ás ordes de Luis Santiago que coñece ben ao seu rival deste domingo así como o terreo de xogo onde se xogará moito.

Paco e Pablo Vidal polas bandas e Cardeñosa e Ander no centro da zaga buscan evitar os goles rivais mentres que Changui, no ataque, ocúpase de manter con vida a un equipo en horas baixas. Entre uns e outro hai outra peza importante no centro do campo. Ube, que volverá á Esedé de cara á vindeira tempada, xa duplicou os minutos xogados cos nosos durante a primeira volta sen conseguir aínda ver portería.

Ata o final.

Se hai algo que está a marcar os partidos do Compos son os minutos finais. Os 15 últimos minutos de cada partido aumentan os nervios na familia branquiazul e cada xogada supón unha gran oportunidade de recibir un gol e, en moitas ocasións, estragar o feito ata o momento. Un guión que se repetiu en partidos importantes coma o do Bergantiños ou o da pasada fin de semana en Calabagueiros, onde o equipo fixo unha boa segunda metade perdoando as mellores ocasións.

Pola súa parte, o Boiro é todo o contrario. O equipo do Barbanza supón un gran perigo nos intres finais logo de anotar un total de 7 goles nos 5 últimos minutos. O último sen tempo de reacción chegou a pasada fin de semana para empatar en Barraña contra o Paiosaco logo de ir perdendo 0-2 no minuto 77, con ata dous goles de Xacobe para facer un punto importante contra un rival directo.

Un rival sempre complicado.

Compos e Boiro levan véndose as caras dende 1986, cando o noso equipo visitou o Barbanza por primeira vez. Dende aquela cita, un total de 13 enfrontamentos entre a Terceira e a Preferente, da que ascenderon da man en 2012. Un emparellamento que non deixou moi bos resultados no Vero Boquete dende hai 29 anos, cando o Compos conseguiu a segunda vitoria diante dos boirenses despois de facer o propio en Santa Isabel tres anos antes.

No que vai de século, un empate e unha derrota en San Lázaro para os nosos, que buscarán repetir o feito en Barraña o pasado ano grazas a dous goles de Primo e un de Santi. Ademais, na primeira volta repetiuse o empate co 1-1 no luminoso, resultado máis repetido entre os dous, con tantos de Casas en propia porta e Piscu.

Aythami volve á casa.

Aythami fixo un bo partido fronte ao Barco mais sen conseguir ver porta, malia intentalo. O canario, máximo goleador do equipo e situado xa entre os tres xogadores con máis goles do grupo, volve á casa, onde adoita celebrar a meirande parte dos seus goles. 

Catro goles contra o Porriño e un contra Racing, Alondras, Ourense CF, Ribadumia, Laracha, Choco e Céltiga. 11 dos seus 17 tantos totais foron nun Vero Boquete que non se cansa de celebrar os seus goles. Un xogador que anotou en tódolos partidos que xogou en Santiago dende que en novembro non puido facelo na vitoria pola mínima contra o Barco. 

Rubén, baixa segura. 

Para esta cita importante, Yago Iglesias contará con só unha baixa segura, a de Rubén, mentres que Alberto xa está adestrando buscando recuperarse da súa lesión que o ten apartado do resto do equipo dende o arrinque do curso obrigado a pasar por quirófano hai case dous meses. A parte, non haberá baixas por sanción con Sergio Pereira xa 'limpo' de amoestacións mentres que Naveira chega con 4 e non podería estar fronte ao Choco en Santa Mariña. 

Domingo de tarde. 

Un día despois de que no Vero Boquete se xogue o segundo encontro da 'Rolda élite' do Europeo feminino sub-19 coa selección española como protagonista, Compos e Boiro pisarán o verde para un partido que dará comezo ás 18 horas. As entradas para o enfrontamento terán un prezo de 10 euros para non aboados mentres que será de balde tanto para aboados branquiazuis coma para menores de 18 anos. 

Para quen non poida achegarse ao feudo branquiazul, poderá seguirse o partido a través das contas de Twitter tanto da Curva Branquiazul coma do clube. Tamén se poderá escoitar en directo na 'Esedé Radio', na web oficial do clube.