Este mércores teremos unha nova cita importante á par que interesante en San Lázaro. O noso equipo seguirá a súa preparación neste curso cun novo amigable, nesta ocasión xa co curso máis que comezado, fronte a un rival de categoría superior. O Pontevedra, contra o que se repetirá amigable esta tempada, será o rival no 'III Memorial Antonio Bermúdez' sucedendo a Deportivo e Lugo, convidados nas anteriores edicións deste xa habitual torneo na capital galega.
Ás portas do ceo.
O Pontevedra visitará San Lázaro nun gran momento de forma. O equipo granate ocupa a sexta praza no grupo I da Segunda división B a só tres puntos dos postos de promoción de ascenso, algo que semella ser o obxectivo do cadro galego mellor situado a día de hoxe na categoría de bronce cuns bos 16 puntos.
Fortes en Pasarón, onde non perderon ningún partido, só perderon 2 encontros, contra Unionistas e Internacional de Madrid, a domicilio coa última hai máis dun mes. Non obstante, contaron tamén con complicacións á hora de sumar de tres con catro triunfos e outros tantos empates. A iso hai que engadir un total de 9 goles a favor e 7 en contra, contando coa cuarta mellor defensa da categoría.
Nun equipo onde a parte defensiva destaca por enriba do resto, hai que salientar tamén o gran papel que está a facer o experimentado Arruabarrena. O dianteiro vasco está a completar o seu 16º ano no fútbol senior con 4 goles en 9 partidos oficiais na súa estrea en terras do Lérez.
Segunda ocasión.
Compos e Pontevedra vanse ver as caras por segunda vez en menos de tres meses logo do enfrontamento amigable na Escravitude que se levou o equipo visitante por un contundente 0-3 levándose así o 'II Torneo Vila de Padrón'.
Por contra, en partido oficial, os dous equipos enfrontáronse nun total de 18 ocasións cun total de 10 empates, con seis deles sen goles, mentres que 5 remataron con vitoria branquiazul e outros 3, pontevedresa. Unha boa rivalidade con cor de bronce e poucos precedentes na Terceira galega.
Terceira edición.
Hai dous anos, Antonio Bermúdez deixounos aos 68 anos logo dunha reunión en San Lázaro. Un gran afeccionado branquiazul e un dos mellores xornalistas que pasaron pola radio santiaguesa, cubrindo os deportes da capital ata o día da súa morte, compartindo traballo con Toño Bermúdez, que segue á perfección os pasos do seu pai.
Logo do repentino falecemento, o clube co que traballaba, o Compos, púxose mans á obra para organizar un Memorial co que homenaxear a súa perda. Un Memorial que chega á súa terceira logo dos enfrontamentos contra Deportivo en 2016 e Lugo en 2017, partidos con resultados negativos para os nosos mandando o trofeo cara A Coruña e Lugo respectivamente.
Baixas, e rotacións?
Ás baixas xa máis que coñecidas de Rubén, Alberto e David Uña poderían unirse diferentes rotacións pensando tamén no partido de liga do domingo no que haberá que recibir ao Centro de Deportes Barco en San Lázaro.
Cita imperdible.
Mañá mércores, véspera de festivo, teremos unha boa cita na nosa casa. San Lázaro abrirá as súas portas ás 20h. Ademais, ata esa hora, a xente que queira poderá pasar polas oficinas para retirar ademais as dúas invitacións por abono para o encontro do domingo. Para éste, os aboados pasan de balde, ao igual que os menores de 18 anos, mentres que os que non o sexan terán que pagar 5 euros na billeteira do estadio.
Por contra, quen non poida asistir ao partido, poderá seguirse nas diferentes redes sociais da Curva Branquiazul, Facebook e Twitter, así como no perfil oficial do clube en Twitter.
Ningún comentario:
Publicar un comentario