O Compos terá este sábado a súa derradeira proba de pretempada. Será, unha vez máis, lonxe de Santiago mais cun prestixioso trofeo de verán en xogo. A preparación do curso, que ata o de agora foi máis que boa, rematará coa pelexa polo trofeo Emma Cuervo, torneo que organiza o Ribadeo dende hai o ano 1952 de maneira ininterrompida e que os nosos xogarán por quinta vez na súa historia, gañando un ata o de agora.
Diante estará o UP de Langreo mantendo esas finais entre equipos galegos e asturianos na que será a primeira participación do cadro azulgrana, recén ascendido á Segunda división B hai dous meses. Ademais, como dato, é o equipo onde se estreou e deixou anos despois o fútbol profesional o ex do Compos Ángel Lekumberri.
67 edición.
O segundo torneo de verán máis antigo de España, só superado polo Teresa Herrera que o Deportivo organiza dende 1946, chega este ano á súa 67ª edición. Creado polo Ribadeo e xogado no Pepe Barrera, conta cun total de 18 campións diferentes ao longo dos anos entre os que destaca o Real Oviedo, con 16 títulos en 38 participacións. Equipos como Depor e Celta pechan un podio que demostra un gran nivel do campionato.
Outros equipos de primeiro nivel coma Betis, Zaragoza, Valladolid ou Sporting de Xixón tamén foron quen de facerse, polo menos unha vez, cun título ao igual que o Compos no ano 1995, superando así ao Sporting nunha das 51 finais entre galegos e asturianos convertindo este clásico do verán galego nun clásico entre veciños.
Unha de catro.
Ata en catro ocasións participou o Compos na loita polo Emma Cuervo. Dende a súa primeira vez alá polo ano 1992 contra o Real Oviedo e ata 1998, cando o fixo por última vez, o cadro santiagués conseguiu traer un trofeo cara Santiago. Foi en 1995, contra o Sporting de Xixón, grazas a un gol de Eraña no primeiro tempo.
En canto ás derrotas, o Real Oviedo foi o outro protagonista en dúas das caídas mentres que o Racing de Santander superou aos nosos en 1998 pola mínima cun tanto na segunda metade, obra de Sánchez Jara.
Enfrontamento de Segunda B.
Compos e Langreo non será a primeira vez que se vexan as caras. De feito, hai ata 16 precedentes de partidos entre ámbolos dous conxuntos co Langreo como claro gañador no total con 8 triunfos. Os nosos gañaron en 3 ocasións, nas tres últimas visitas dos asturianos a Santiago, mentres que as outras 5 remataron con reparto de puntos.
Rubén, baixa segura.
Durante toda a pretempada só houbo que lamentar unha baixa, que se presume máis longa e dura do que semellaba nun primeiro momento. Chegou ao vestiario cun golpe nun xeonllo e podería ter unha lesión máis grave que nos vindeiros días saberemos canto tempo o podería ter fóra dos terreos de xogo.
Tarde de sábado.
O partido será o sábado 18 ás 18.30 horas no Pepe Barrera de Ribadeo. O prezo das entradas é de 10 euros mentres que os menores de 15 anos poderán entrar de balde. Unha cita importante e interesante para coñecer, aínda máis, ao equipo que arrincará a liga unha semana despois no Ceao contra o Polvorín.
Por contra, quen non poida asistir ao encontro poderá seguilo a través das diferentes redes sociais da Curva Branquiazul, Facebook e Twitter, ademais do perfil oficial do clube en Twitter.
Ningún comentario:
Publicar un comentario