O Compos non puido pechar a súa preparación para o novo curso con vitoria logo dun empate no tempo regulamentario e unha derrota dende os once metros contra un Langreo doutra categoría. Bo partido dos nosos, destacando o primeiro tempo, Tamén hai que salientar a entrada no segundo tempo de Cachi e Yago Torrente, xogadores do xuvenil branquiazul.
Boa primeira metade.
Durante o primeiro tempo, o cadro galego amosou unha lixeira superioridade sobre o terreo de xogo contra un Langreo que soubo defenderse das importantes acometidas branquiazuis sobre a portería defendida por Imanol. Por contra, os asturianos tiveron dúas oportunidades sobre a portería de Anxo sen chegar a poñer en perigo o resultado.
Na área rival, Aythami comeza a crear aínda máis perigo mais sen conseguir ver porta con facilidade, algo que terá que arranxar de cara ao arrinque da tempada a vindeira fin de semana. Ademais, Josiño tivo un man a man co gardamallas no que non foi quen de adiantar aos nosos mantendo o empate sen goles ata o tempo de lecer.
Segunda parte sen ocasións.
O paso por vestiarios deixou moitos trocos nos dous equipos e un segundo tempo sen oportunidades perigosas en ningunha das dúas porterías levando a vitoria, pouco a pouco, á quenda de penaltis. De feito, só Brais Abelenda foi quen de provocar algo de perigo sobre a porta asturiana cun disparo que mandou o gardamallas directo a córner.
Unha segunda parte onde se puido vivir a estrea neste curso doutros dous xogadores da base compostelanista. Yago Torrente e Cachi tiveron dez minutos de xogo máis engadido nos que non puideron tampouco evitar unha nova pelexa por un trofeo dende os once metros.
Na quenda de penaltis, o Langreo demostrou ser superior sobre todo baixo paus con Adrián Torre, gardamallas durante o segundo tempo, parando dous tiros dos nosos mentres que Lorenzo non puido facer o propio.
ALIÑACIÓN: Anxo (Lorenzo, min. 46); Saro, Piscu, Uña (Casas, min. 46), Pereira (Naveira, min. 46); Mon (Ube, min. 46), Remeseiro (Samu, min. 46); Josiño (Santi, min. 46), Ares (Cachi, min. 80), Abelenda (Yago Torrente, min. 80); e Aythami.
CARTÓNS: -.
GOLES: 0-0.
PENALTIS: 2-4.
CAMPO: Pepe Barrera (Ribadeo).
Ningún comentario:
Publicar un comentario