Compos e Negreira loitarán este domingo por un posto na Final da Copa Deputación da Coruña 2018. Unha Final que sería a quinta para os nosos e a segunda para un Negreira cun vello coñecido no posto de adestrador, que tomou o mando do primeiro equipo hai escasas semanas. Un encontro entre dous equipos que a pasada tempada militaron na Terceira galega, con resultados moi diferentes.
Catro títulos entre os dous.
Entre ámbolos dous conxuntos suman, a día de hoxe, cinco Finais da competición e só unha derrota, a encaixada polos nosos alá polo ano 1989 a mans do Deportivo en Riazor na quenda de penaltis. Dous bos equipos a nivel histórico e que este ano non pasan por camiños tan semellantes. E é que malia aparecer os dous conxuntos como equipos da Terceira, os negreireses pelexarán durante a vindeira campaña por volver á cuarta categoría do fútbol español, mentres que os nosos pelexarán por un novo ascenso ao fútbol nacional.
O lado difícil do cadro.
Os nosos chegaron a esta semifinal despois de superar ao Puebla e ao Noia por 3-0 nos dous encontros mentres que os problemas para bater ao Bergantiños foron maiores, chegando a vitoria no engadido grazas a un gol de Abelenda. Un camiño duro no que apareceron como protagonistas as novas fichaxes branquiazuis.
Pola súa parte, o Negreira tivo que chegar á quenda de penaltis para superar ao Bastavales na súa estrea. Uns penaltis que conseguiron evitar contra o Dubra grazas a un gol de Uxío co que pechaban o 1-2 definitivo. E de novo, en cuartos, houbo que decidir ao semifinalista logo dos noventa minutos regulamentarios co Boiro como equipo perdedor logo de empatar un gol de Cea. Un gran camiño tomado polos de Cabrejo, novo adestrador principal, que non van poñer as cousas nada doadas.
O gol chegou no mercado.
Das escasas fichaxes feitas pola directiva da Esedé, cubrindo as baixas, hai que asegurar que o traballo está moi ben feito sobre todo de cara a gol. E é que catro desas novas pezas leváronnos a este punto grazas aos goles. Catro de Brais Abelenda, que marcou en tódalas eliminatorias, dous de Miki Villar e un de Remeseiro e Josiño.
De feito só Anxo, porteiro titular diante do Noia, Piscu, que aínda non puido debutar en partido oficial, e Aythami quedan sen marcar, ademais dos xogadores que se manteñen dende o ano pasado, que non son quen de igualar ás novas pezas neste sentido.
Volve Santi.
Para esta cita importante, Santi estará de novo dispoñible se Yago Iglesias o precisa. O dianteiro, reconvertido a mediapunta, non puido estar por sanción diante do Bergantiños mais si podería ter minutos en Negreira. Pola súa parte, Piscu segue á espera de que chegue o seu transfer e poder debutar coa Esedé en partido oficial.
Cambio de campo.
Durante o verán moitos clubes melloran as súas instalacións e campos. Iso é o que pasa co García Calvo, que non estará listo aínda para acoller o encontro deste domingo. Por iso, o partido será o domingo ás 19.30 horas no Campo Municipal de Cepelo, tamén en Negreira.
As entradas, coma sempre na competición, terán un prezo de 5 euros para maiores de 14 anos e de balde para menores. Non obstante, quen non poida asistir poderá seguir o encontro en directo a través das diferentes redes sociais da Curva Branquiazul, Facebook e Twitter, así como no perfil oficial do clube en Twitter.
Ningún comentario:
Publicar un comentario