O Compos superou ao Bergantiños nos cuartos de final da Copa Deputación nun partido marcado polas imprecisións e a igualdade durante os noventa minutos. Os goles, que chegaron no segundo tempo, puxeron aínda máis emoción a un xogo entre dous dos grandes da categoría e que volverán a medir as súas forzas ao longo do campionato.
Miki Villar e Brais Abelenda, ámbolos dous entrando no segundo tempo, foron as pezas fundamentais á hora de desfacerse dun Bergantiños que levou moito perigo á portería defendida por Lorenzo. Pola súa parte, o ex branquiazul Borja Facal fixo o único gol carballés co que empataba o resultado.
Respecto e igualdade.
Os primeiros corenta e cinco minutos foron de igualdade sobre o terreo de xogo coa posesión da pelota, en moitos momentos, para os nosos co Bergantiños ben ordeado en defensa e case imparable á contra, con Rubén Rivera incapaz de superar a un David Uña que non parece estar en pretempada co seu gran estado de forma, sendo un muro que se gaña a titularidade á forza.
Sobre a portería contraria, Aythami non foi quen de superar ao gardamallas, malia contar con boas oportunidades para facelo. Tamén Marcos Remeseiro, que de novo foi unha peza fundamental na vitoria, e Alex Ares, que volvía ao once, tiveron nas súas botas un gol que non chegaría ata o segundo tempo.
Trocos fundamentais.
O segundo tempo comezou co Compos buscando a portería de Buggi. Non obstante, o mellor chegou coa entrada ao verde de Miki Villar e Brais Abelenda, os autores dos goles. O primeiro chegou con só cinco minutos dende o troco cun gran disparo coa punteira que entrou por debaixo das pernas do gardamallas. Hai que destacar tamén que Remeseiro foi o autor dunha gran asistencia coa que deixar so ao de Nigrán.
Non obstante, as boas novas non duraron nin cinco minutos. Borja Facal, lateral que sempre se deixa todo no campo cando xoga ante a Esedé, precisou tres rexeites para superar no man a man a Lorenzo cun disparo por baixo.
A esperanza é o último que se perde.
Co Bergantiños buscando perder algo de tempo cos penaltis en mente, chegou a sorpresa final. No engadido, Brais Abelenda transformou á perfección un roubo e asistencia de Mon cun disparo cruzado aumentando aínda máis unha conta particular que demostra o gran acerto á hora de facerse cos seus servizos.
Agora toca preparar a semifinal, de novo a domicilio, contra un Negreira dirixido por Cabrejo e que superou ao Boiro na quenda de penaltis.
ALIÑACIÓN: Lorenzo; Sergio Pereira, Casas, Uña, Naveira; Samu (Mon, min. 66), Remeseiro; Josiño (Ube, min. 69), Alex Ares (Miki Villar, min. 56), Rubén (Saro, min. 74); e Aythami (Brais Abelenda, min. 56).
CARTÓNS: -.
GOLES: 1-0 61' Miki Villar, 1-1 65' Borja Facal, 2-1 92' Brais Abelenda.
CAMPO: San Lázaro.
Ningún comentario:
Publicar un comentario