A pola cuarta!

O Compos estará na súa quinta Final da Copa Deputación onde se enfrontará ao Racing de Ferrol nunha final inédita entre dous equipos que encadean un total de 9 trofeos nesta mesma competición, sendo os ferroláns os que máis veces o gañaron. Unha Final á que os nosos chegan despois de superar, con goleada e sen apenas dificultades, ao Negreira no Campo de Cepelo, esceario que non deixou moi boas sensacións. 

Clara superioridade.

Nesta nova cita, nun campo pequeno e non en moi boas condicións, o Compos foi superior a un Negreira que pouco puido facer para evitar o xa esperado. Os homes de Yago Iglesias saíron a por todas, sen arriscar a dúas semanas para o comezo da liga, e as ocasións chegaron sen parar dende os quince minutos de xogo, cando Rubén probou por primeira vez a Jose. 

O ex do Arosa, que protagonizou a mala nova do encontro retirándose mancado no segundo tempo, foi o primeiro en probar sorte mais foi Aythami, que se estrea co seu novo equipo, o encargado de abrir o marcador cun bo testarazo a un centro de Mon. O primeiro amosou, ademais, o camiño á porta negreiresa. 

Co paso dos minutos, logo de só dúas chegadas na primeira media hora, o equipo medrou sobre o verde a nivel ofensivo con catro oportunidades máis para poñer algo de distancia no marcador. Un segundo gol que non chegou antes do tempo de lecer. 

Sen opcións.

O segundo tempo comezou cunha dobre ocasión branquiazul que nin Brais Abelenda nin Ube foron quen de materializar. E se en cuestión de segundos chegaron dúas oportunidades de gol, mellores foron os primeiros vinte minutos deste segundo acto con numerosas chegadas perigosas pero que non se puideron materializar ata pasar a hora de xogo. 

Ata o momento, ningún xogador renovado puido marcar un gol nesta pretempada e quen mellor que o capitán para rematar con este curioso dato? Ube gaña un balón nunha desputa e cáelle a Mon, que non perdoa cunha fermosa volea. Un gran gol do capitán para poñer un pé na Final da Copa Deputación. 

Co segundo tanto xa no marcador, o ritmo baixou mais cos nosos mandando sen problemas. De feito, do Negreira non se soubo nada ata o treito final, xa sen tempo para reaccionar, con dúas chegadas sobre a portería defendida por Anxo que non puxeron en perigo unha diferenza que aumentou xa no engadido cun novo gol de Miki Villar para aumentar a súa conta particular convertíndoo no máximo artilleiro deste verán. 

Agora toca preparar unha nova semana, a derradeira da pretempada, con dous partidos importantes: o primeiro polo trofeo da Copa Deputación contra o Racing de Ferrol con horario e sede aínda por determinar e o segundo co Trofeo Emma Cuervo en xogo o sábado en Ribadeo co Langreo como rival. 

ALIÑACIÓN: Anxo; Saro, Casas, Uña, Naveira; Mon, Ube; Rubén (Sergio Pereira, min. 59), Santi (Samu, min. 76), Abelenda; e Aythami (Miki, min. 50).

CARTÓNS: Amarelo para Ube.

GOLES: 0-1 19' Aythami, 0-2 64' Mon, 0-3 90' Miki Villar.

CAMPO: Municipal de Cepelo.