Terceira Final do ano

Despois de dúas finais para pechar a pasada tempada, a pretempada terá a súa penúltima cita cunha gran Final entre dous dos favoritos para loitar polo primeiro posto na Terceira galega, que arrincará en menos de dúas semanas. Compos e Racing de Ferrol, que chegaron ata aquí despois de superar a tódolos seus rivais sen case complicacións, terán que pelexar por un novo título do campionato estival que os ferroláns gañaron en seis ocasións mentres que os santiagueses o fixeron en tres.

Dende o día de Galiza.
O 25 de xullo deu comezo a trixésima edición deste torneo de verán coa primeira fase previa, na que o Olímpico superou ao Carral. Así se estreaba esta nova Copa Deputación da Coruña que este martes chegará ao seu fin.
Non obstante, Compos e Racing de Ferrol, os finalistas, entraron a competir na terceira rolda, a comezos do mes de agosto. Con Puebla e O Val como rivais, daba comezo unha competición na que os dous equipos se viron as caras nos últimos anos en máis dunha ocasión, mais nunca nunha Final malia sumar 16 finais entre ámbolos dous conxuntos.

11 goles a favor e 1 en contra.
Puebla, Noia, Bergantiños e Negreira. Tres equipos que pelexarán o vindeiro curso no grupo 1 da Preferente e outro que apunta a pelexar por un posto na promoción de ascenso á Segunda B. E todos eles caeron aos pés dun Compos cun ataque case imparable e unha defensa que só se puido superar nunha ocasión.
Co 3-0 como resultado máis repetido, en tódolos partidos agás contra os carballeses, o Compos anotou 11 goles con Brais Abelenda e Miki Villar como máximos goleadores do equipo con catro e tres goles respectivamente. A eles hai que engadir que Aythami, Mon, Remeseiro e Josiño tamén viron porta na competición.

Maior igualdade.
O Racing de Ferrol comezou a competición cunha goleada contra O Val. Unha gran goleada que foi a maior do que levamos de campionato e coa que superaron a primeira proba. Non obstante, as cousas complicáronse para os ferroláns coa visita á Grela, onde só puideron bater ao Silva pola mínima. Por un gol máis, conseguiron derrotar ao Paiosaco mentres que, en Curtis, volveron a gañar por un tanto ao Boimorto conseguindo o pase á Final.

Vellos coñecidos.
Tanto nas filas do Compos coma nas do Racing hai xogadores con pasado no outro equipo. Con Catú e Joselu como titulares nas filas dos ferroláns e Abelenda asinando bos goles branquiazuis, os 'ex' serán pezas moi importantes nesta nova cita, inédita.

Por primeira vez.
Entre os dous equipos suman presenzas en máis da metade das Finais da Copa Deputación desputadas ata o momento. Co Racing de Ferrol presente en 12 e o Compos noutras 4, foron protagonistas, por separado, das últimas seis edicións sendo o Racing o vixente campión despois de tres finais consecutivas perdidas. Son, ademais, os únicos que poden presumir de superar ao Deportivo nunha final do torneo.
O Compos estreouse nunha Final, con derrota, alá polo verán de 1989 contra o Deportivo en Riazor, mesma sede e mesmo rival que un ano antes derrotara aos ferroláns na primeira final da historia do torneo. Non obstante, despois de dous títulos para os coruñeses, a Esedé repetiu final gañando en 1990 e o Racing de Ferrol fixo o propio un ano despois, ámbalas dúas finais en Riazor contra un Depor que mandaría ao Fabril a xogar o resto de anos.
Logo desa vitoria en 1990, houbo que agardar ata 2012 para ver aos da capital noutra Final, gañada contra o Fabril no Roxo, e repetindo ese bo facer un verán despois contra o Somozas na Malata.
Con menos sorte conta o Ferrol, que gañou en seis ocasións o trofeo, contra Depor, Ordes en dúas ocasións, Betanzos, As Pontes e Noia, o pasado curso, e o perdeu noutras tantas co Somozas como principal culpable, con dous títulos en dous derbis.

Menos de 48 horas.
O Roxo acollerá esta gran Final o martes ás 20 horas na que será a terceira edición consecutiva que remate en Cerceda, cuarta en seis anos. Para dito encontro, coma ata o de agora, as entradas terán un prezo de 5 euros mentres que os nenos menores de 14 anos pasarán de balde.
Para quen non poida achegarse ao Roxo, o partido poderá seguirse a través das diferentes redes sociais da Curva Branquiazul, Facebook e Twitter, así como no perfil oficial do clube en Twitter.