Seguimos adiante

O Compos superou ao Noia nun partido onde os nosos foron superiores. Unha cita marcada pola vaga de calor unha vez máis provocando que os primeiros minutos de partido foran máis igualados, sen ocasións de perigo e con entradas importantes, ás que engadir problemas para controlar o xogo por parte do colexiado. Xa co partido baixo o mando branquiazul, os locais mandaron sobre o verde ata deixar o resultado pechado. 

A nivel individual, destaca a actuación de Brais Abelenda, autor de dous goles, Miki Villar, que asinou o primeiro, e Uña, sendo de novo unha peza fundamental en defensa. A nota negativa púxoa Santi, expulsado no segundo tempo despois de dúas únicas faltas nunha boa actuación.

De menos a máis. 

O encontro arrincou espeso, con moita igualdade, faltas e xogo no centro. De feito, agás algún disparo illado dende fóra da área, houbo que agardar media hora para ver as primeiras oportunidades con claridade sobre a portería defendida por Pajarillo. O ex gardamallas do Negreira, entre outros, por contra, non foi quen de frear o disparo de Miki Villar, que fixo o segundo na súa conta nesta pretempada a pase de Santi. 

Co resultado a prol dos nosos, os porteiros cobraron máis importancia antes do tempo de lecer. Pajarillo evitou o segundo gol parando un disparo de Abelenda logo dunha gran xogada con Remeseiro. Mais, porén, o Noia respondeu na derradeira oportunidade do primeiro tempo cunha dobre ocasión na que Anxo amosou os seus reflexos. 

Cinco minutos máxicos. 

Os cinco primeiros minutos logo do tempo de lecer serviron para pechar o encontro de xeito definitivo con Abelenda deixando clara a súa capacidade de cara a gol. E é que o ex do Racing de Ferrol fixo o seu primeiro gol cunha fermosa vaselina ante a saída de Pajarillo mentres que o segundo, terceiro para o equipo, chegou cun disparo dende fóra da área directo á escadra. Un golazo co que, ademais, quedou pechada a vitoria branquiazul. 

Con máis de media hora de partido por diante, o partido entrou nunha dinámica moito máis tranquila, con dominio total do esférico por parte dos nosos e escasos intentos de chegadas. Por contra, si que houbo que sufrir algunha que outra entrada perigosa, sempre castigadas con cartón amarelo. 

Superado o Noia, en cuartos espera o Bergantiños. Nova cita da Copa Deputación, contra un rival sempre duro, e que de novo será en San Lázaro, con horario aínda por confirmarse.

ALIÑACIÓN: Anxo; Saro, Casas, Uña, Naveira (Sergio Pereira, min. 46); Samu (Mon, min. 62), Remeseiro (Ube, min. 72); Miki (Rubén, min. 72), Santi, Brais Abelenda (Josiño, min. 76); e Aythami. 

CARTÓNS: Amarelo para Uña. Expulsado Santi por dobre amoestación.

GOLES: 1-0 31' Miki, 2-0 46' Brais Abelenda, 3-0 50' Brais Abelenda.

CAMPO: San Lázaro.