O Compos sumou, na Escravitude, a súa primeira derrota da pretempada. Na primeira cita dunha longa fin de semana, con dous encontros en 24 horas, o cadro dirixido por Yago Iglesias pouco, ou máis ben nada, puido facer diante dun Pontevedra que se amosou superior durante os noventa minutos, sobre todo de cara á porta.
Pensando algo máis no encontro de mañá, que supón ademais a estrea do novo equipo en San Lázaro, o equipo saltou coa novidade de Piscu no once titular. Xunto a el, outras tres das novas incorporacións que tampouco foron quen de facer fronte a un Pontevedra que se adiantou aos seis minutos grazas a un gol de Churre logo dunha falta lateral botada por Javi López.
A superioridade granate levouse, sobre todo, á efectividade. E é que só chegaron á porta defendida por Anxo, que se enfrontaba contra o seu ex equipo, en dúas ocasións durante os primeiros corenta e cinco minutos marcando dous goles, o segundo cun disparo potente dende fóra da área de Kevin Presa ante o que puido facer o gardamallas branquiazul.
Durante a segunda metade as oportunidades foron para os nosos, que non foron quen de bater ao porteiro pontevedrés. E quen perdoa as acaba pagando. De novo os erros custaron unha oportunidade para os nosos que recibiron o golpe definitivo das botas de Romay logo dunha boa xogada individual de Kevin Presa.
E mañá máis e mellor. Ás 20 horas recibiremos en San Lázaro ao Noia nos oitavos de final da Copa Deputación sendo, ademais, á primeira ocasión na que se poida ver ao equipo en Santiago despois de tres citas.
ALIÑACIÓN: Anxo; Saro, Queiruga, Piscu, Sergio Pereira; Samu, Ube; Josiño, Vilariño, Rubén; e Aythami. Tamén xogaron: Mon, Santi, Uña, Casas, Naveira, Remeseiro, Abelenda e Miki.
CARTÓNS:
GOLES: 0-1 6' Churre, 0-2 29' Kevin Presa, 0-3 84' Romay.
CAMPO: Novo Campo do Doce.
Ningún comentario:
Publicar un comentario