Primeira cita importante

Os dous primeiros clasificados da Terceira da pasada campaña volverán verse as caras este mércores en San Lázaro con, nada máis e nada menos que, unha semifinal en xogo. A Copa Deputación, torneo que os nosos buscan gañar por terceira vez, terá outro gran encontro entre dous dos equipos que pelexarán polo máis alto do fútbol galego dende dentro de vinte días, cando dea comezo a tempada regular. 

Catro partidos nunha semana.

O Compos segue collendo forma na pretempada e o fai cunha gran acumulación de partidos. Para ser máis exactos, catro en oito días con tres deles na mesma competición. Ademais, cabe destacar, que o equipo está demostrando un bo nivel coas fichaxes sendo protagonistas grazas ao protagonismo gañado a base de bo fútbol e goles. 

Arrincando esta serie de partidos o mércores na Pobra do Caramiñal, con goleada, a segunda cita supuxo a primeira derrota dos nosos neste verán a mans dun Pontevedra que non se amosou superior sobre o terreo de xogo mais si na efectividade e a terceira foi, de novo, para dar un paso adiante na competición de verán fronte ao Noia. Tres partidos que remataron, ademais, con 3-0 no marcador.

Brais Abelenda, o dono do gol. 

O Compos suma, en cinco partidos contando os do triangular, sete goles con Brais Abelenda autor de tres deles. Sete goles que levan a sinatura das novas fichaxes co ex xogador do Racing de Ferrol sendo a peza máis importante de cara a gol no que vai de competición estival. Ademais, Miki Villar suma dous logo de ser o primeiro mentres que Remeseiro e Josiño levan un. 

Gañadores do derbi carballés.

Bergantiños e Laracha enfrontáronse este domingo nas Eiroas nun partido onde os locais, pola mínima, conseguiron facerse co premio final grazas a un gol de Diego Fernández. Un partido igualado entre dous equipos que se verán de novo as caras o vindeiro curso na categoría e que deixa para o vindeiro mércores a mellor cita posible. 

Un precedente positivo.

Compos e Bergantiños xa se viron as caras nesta mesma competición, naquela ocasión en Carballo, hai tres anos. Un partido que supoñía o pase dos nosos aos cuartos de final e no que houbo que superar un gol inicial de Gerard no primeiro tempo. Non obstante, o bo traballo branquiazul tivo os seus froitos e con goles de Borja Facal e Chiño, este no último minuto de partido, conseguiuse o obxectivo. 

Iso se falamos da pretempada xa que hai escasos seis meses, o Bergantiños fíxose cos tres puntos en San Lázaro grazas a unha vitoria en liga pola mínima que aumentaba a emoción na loita pola primeira posición do campionato. 

Santi e Piscu non estarán. 

Expulsado contra o Noia por dobre amoestación, Santi non estará neste encontro onde si poderían volver homes coma Alex Ares, ausente o domingo por precaución, mentres Piscu terá que seguir esperando para estrearse en partido oficial xa que aínda non recibiu o transfer. 

Mesmo horario.

San Lázaro abrirá as súas portas o mércores ás 20 horas, repetindo o horario do enfrontamento contra o Noia. Para esta cita, importante, as entradas terán un prezo de 5 euros para maiores de 14 anos e de balde para menores. 

Quen, por contra, non poida achegarse ao teatro branquiazul, poderá seguir o encontro a través das diferentes redes sociais da Curva Branquiazul, Facebook e Twitter, ademais de no perfil oficial do clube en Twitter.