Calor e fútbol

Nesta vaga de calor que estamos a pasar en Galiza, nada mellor para combatilo que ver fútbol. De feito, para esta fin de semana temos dobre cita co Compos contra dous rivais de bo nivel que de seguro obrigarán aos nosos a dar o mellor sobre o verde.

O sábado, para abrir a fin de semana do mellor xeito, 'II Torneo Vila de Padrón' na Escravitude contra o Pontevedra mentres que o domingo teremos unha nova cita coa Copa Deputación no primeiro encontro dos nosos en San Lázaro contra un Noia que chega logo de golear na pasada eliminatoria. Dobre agasallo para preparar unha tempada que se presume moi complicada.

Outro Segunda B.

Despois de superar ao Coruxo en 45 minutos, no Triangular de Praíña, toca superar outra proba importante contra un rival de superior categoría, nesta ocasión en noventa minutos. Diante, un rival que chega despois de tres citas de gran nivel con rivais de, como mínimo, Segunda división B.

Arrincaron os amigables de pretempada o 21 do pasado mes de xullo, dous días antes de que os nosos comezasen a traballar, en Avilés contra o Sporting de Xixón, partido que empataron a un gol diante dun rival que loitou ata o final polo ascenso á Primeira división a pasada tempada. Días despois, coincidindo co Día de Galiza, recibiron en Pasarón ao Lugo nun encontro que, de novo, rematou con empate a un gol decidíndose o trofeo na quenda de penaltis, onde gañaron os granates. E a última cita ata o momento foi un triangular contra Celta B e Rápido de Bouzas no que gañaron aos primeiros e empataron contra os segundos.

Segunda cita no torneo.

O Compos xa sabe o que é pisar o campo do Doce, na Escravitude, para xogar o 'Torneo Vila de Padrón', que este ano presenta a súa segunda edición. Na primeira, os de Yago Iglesias superaron sen apenas problemas ao Negreira con goles de Álvaro Casas, Alex Ares, Mon, Primo e Ube superando ata dous resultados adversos.

Estrea con goleada.

Cambiando de rival e día, o Noia estreouse con goleada a pasada fin de semana na Copa Deputación. Despois da derrota fronte ao Ribadumia e a goleada ao Cordeiro, chegou a quenda do Flavia. O equipo padronés non foi rival para os noieses caendo por 2 goles a 6 grazas ao acerto de Quintairos, autor de tres tantos, Nando con outros dous e Ander, que pechou a goleada.

Estamos a falar, ademais, do equipo que deixou aos nosos fóra da competición á primeira de cambio. Con só noventa minutos de xogo na Copa Deputación, un gol de Adrián Abelenda no minuto 1 de partido foi suficiente para eliminar a un equipo que remataría o curso de xeito inmellorable.

Dobre ración.

O sábado comezamos a fin de semana co encontro ante o Pontevedra no Campo do Doce, na Escravitude. As entradas terán un prezo de 5 euros para os socios do clube padronés mentres que serán 8 euros para o resto de afeccionados. Dará comezo ás 19 horas e o cadro anfitrión anunciou sorpresas, motivo polo que non se poderá perder esta nova cita dos nosos.

Por contra, o domingo volve o fútbol a San Lázaro. O teatro branquiazul abrirá as súas portas por primeira vez dende a derrota contra o Salmantino. O encontro será ás 20 horas e o prezo das entradas será de 5 euros para maiores de 18 anos, mentres que os menores terán a entrada ao partido de balde.