Comezamos!

O Compos, que adestra en Conxo dende o pasado luns, terá este sábado a súa primeira proba nesta pretempada nun triangular que xa está a ser un fixo nos plans do cadro branquiazul. Pontevea acollerá un ano máis, na súa novena edición, aos nosos nun torneo onde se medirán a Arosa e Coruxo, outro dos fixos neste triangular organizado polo Praíña Sporting Clube.

Un amor de verán.
Por quinta vez, a Esedé participará nun torneo que está a ser un fixo nos plans de verán para preparar as tempadas e dar a coñecer as novas caras preto da capital. Os de Yago Iglesias estiveron por primeira vez alá polo verán de 2012, cando se enfrontaron a Fabril e Pontevedra sen conseguir máis que dous empates, nunha edición na que non houbo triunfos e que se levou o cadro granate grazas á diferenza de goles.
En 2014, con Iñaki Alonso no banco, os rivais neste triangular foron Cerceda e Coruxo e, de novo, os nosos non foron quen de conseguir o triunfo nos 45 minutos asinando outros dous empates, e a vitoria dende os once metros fronte aos do Roxo.
Por contra, o noso equipo non puido estar en 2015 nun triangular no que estaba convidado mais ao que non axudaron as datas. A Copa Deputación, cuxa segunda rolda coincidía coa visita ao Campo de Reis, fixo que os nosos non se puideran medir a Coruxo e Somozas.
Fronte os mesmos equipos aos que se enfrontaría o ano anterior, en 2016 o Compos volveu a Pontevea para gañar en penaltis ao Somozas, despois dun empate nos 45 minutos regulamentarios, e perder pola mínima fronte ao Coruxo pensando unha vez máis na Copa Deputación.
E chegamos a 2017. Unha tempada para o recordo que comezou cos nosos enfrontándose a Céltiga e Cerceda e que nos deixou un bo sabor de boca neste triangular, gañado polos nosos. 2-0 fronte aos dous equipos e unha imaxe inmellorable dos de Yago Iglesias con Sobrido anotando un gol por partido e demostrando a súa fame de cara a gol.

Un vello coñecido.
No verán no que algúns ex branquiazuis están a voltar á terra, hai que falar dunha das incorporacións do Arosa co que buscarán mellorar o feito o pasado curso. Trátase de Manu Rodríguez, centrocampista que deixou moi boas sensacións nos catro anos que vestiu a camisola branquiazul e coa que acadou dous ascensos consecutivos, chegando en Preferente e marchando en Segunda B para voltar meses despois coa intención de evitar un descenso máis que esperado.

Os vigueses chegan mellor. 
Hai quince días que o Coruxo arrincou a súa pretempada sumando xa tres citas nas que os resultados non foron o mellor. Comezaron con derrota en Melgaço, Portugal, fronte ao Boavista, da máxima categoría do fútbol luso, e puideron mellorar o rumbo nun triangular no que superaron ao Caselas a penaltis e ao Celta B no tempo regulamentario facéndose co primeiro posto. De volta ao camiño da derrota, non puideron superar ao Ourense CF, que gañou pola mínima grazas a un gol de Tomás dende os once metros.
Pola súa parte, o Arosa chegará tamén sen minutos de xogo logo de arrincar os adestramentos o pasado luns.

Horarios e prezo.
O sábado, o Juan Amado de Pontevea, antes coñecido coma Campo de Reis, abrirá as súas portas para acoller un triangular que comezará ás 18:30 horas co enfrontamento entre Compos e Arosa. Os vilagarciáns pecharán a súa participación unha hora máis tarde, diante do Coruxo, e os nosos volverán ao campo ás 20:30 horas para medirse ao equipo vigués. A entrega de trofeos será ás 21:30.
O prezo das entradas será de 6 euros por persoa e o 10% dos cartos recaudados irá para a Fundación sen ánimo de lucro ASPAMITE.
Quen, por contra, non poida achegarse á vila teense, poderá seguir o triangular nas diferentes redes sociais da Curva Branquiazul, Facebook e Twitter.

Outra cita confirmada.
Presente no 'I Torneo Vila de Padrón' no que os nosos se enfrontaron ao Negreira o pasado verán, o Compos estará tamén na segunda edición na que se medirá ao Pontevedra o sábado 4 de agosto ás 19 horas. De novo será na Escrativude, no Novo Campo do Doce, e será a terceira cita branquiazul logo da estrea na Copa Deputación ante un rival aínda por coñecerse.