Primeira proba máis que superada

O Compos volveu de Pontevea como campión do Triangular de Praíña por segundo ano consecutivo. O equipo de Yago Iglesias, que superou ao Arosa dende os once metros, dominou totalmente o segundo encontro fronte ao Coruxo gañando pola mínima cun equipo formado por todas as novas incorporacións, sendo un posible equipo titular de cara á vindeira tempada. 

Os penaltis rachan a igualdade. 

Co Arosa algo máis atacante, con Sylla como xogador máis destacado, o Compos non puido case pasar dun centro do campo onde se pasou gran parte dos corenta e cinco minutos. Ademais, quedou claro que Uña segue en plena forma salvando todos e cada un dos intentos dos vilagarciáns por poñer en perigo a portería defendida por Lorenzo.

O primeiro encontro, no que non houbo ocasións de perigo en ningunha das dúas porterías, destacou sobre todo pola presenza no terreo de xogo de Queiruga, Víctor Vilariño e Marcos Mella acompañando a xogadores xa coñecidos coma Rubén ou Alex Ares, autor do primeiro gol de penalti. 

Dende os once metros, un ex branquiazul foi unha das pezas importantes para acadar o primeiro triunfo. E é que, despois de dous penaltis marcados por cada equipo, Manu Rodríguez estreouse coa camisola arlequinada na súa segunda etapa perdoando ante Lorenzo. Non obstante, Uña tampouco foi quen de atinar co seu lanzamento e tivo que ser o porteiro padronés o que rematase coa igualdade parando a quinta pena máxima arousá.

ALIÑACIÓN: Lorenzo; Sergio Pereira, Uña, Queiruga, Víctor Vilariño; Ube, Mon; Alex Ares, Marcos Mella, Rubén; e Santi. 

O Coruxo, moi superior.

O Coruxo non precisou máis de vinte minutos para desfacerse do Arosa no segundo partido do triangular. O equipo vigués, coas súas mellores figuras sobre o terreo de xogo, non perdoou nada ata poñerse no marcador cunha vantaxe de tres goles. Superiores en tódalas liñas do terreo de xogo, baixaron o ritmo xa sen risco de perder o encontro. Aínda así, o Arosa seguiu sendo inferior ao cadro verde, que mantivo a diferenza importante ata o final. 

Imaxe inmellorable. 

E só minutos despois de golear aos de Vilagarcía, o Coruxo, cun equipo totalmente diferente, caeu fronte a un Compos con só cinco días dende o primeiro adestramento e un equipo inédito ata o momento, coa seis incorporacións sobre o terreo de xogo ás que engadir a Queiruga, que repetiu no once titular xogando varios minutos dando entrada a Uña para manter o marcador contra un rival case incapaz de poñer en problemas a Anxo. 

Con maior poder no terreo de xogo ca no primeiro encontro, o gol chegou cun pase en profundidade de Brais Abelenda, dono da zona de creación. A pelota chegoulle a Miki Villar e este non perdoou coa zurda ante a saída do gardamallas. Un gol para estrearse o de Nigrán e que, media hora despois, suporía a consecución dun novo trofeo.

ALIÑACIÓN: Anxo; Saro, Álvaro Casas, Queiruga (Uña), Naveira; Samu, Remeseiro; Miki Villar, Josiño Filgueira, Abelenda; e Aythami.
GOLES: 1-0 13' Miki Villar.

Superada a primeira proba para os nosos, na tarde do domingo coñeceremos ao seguinte rival nesta pretempada. Bertamiráns ou Puebla recibirán aos nosos o vindeiro mércores nos oitavos de final da Copa Deputación da Coruña, na estrea dos nosos na competición.