O equipo vai collendo forma

Polo de agora, coñecemos dous xogadores máis que confirmaron a súa presenza no equipo de cara á vindeira tempada. Son xa catro as pezas que terá Yago Iglesias seguro baixo o seu mando e, de momento, coñecemos o nome de Lucas, Ube, Cardeñosa e Alberto, que seguen para reforzar defensa e centro do campo.

Experiencia en defensa. 

O central de 30 anos foi unha das pezas importantes nos plans do adestrador a pasada tempada. Un dos veteranos do equipo e que seguirá dando leccións no centro da defensa un ano máis. De feito, esta tempada foi un dos homes máis utilizados polo adestrador en defensa sumando un total de 1.933 minutos e anotando 3 goles.

Os problemas físicos evitaron que o defensa da Pobra do Caramiñal puidera desfrutar de máis minutos nas filas da Esedé. De feito, estreouse en partido oficial en Abegondo, na derrota ante o Deportivo B, xogando o primeiro tempo. Mancouse nese primeiro partido e non puido reaparecer ata dous meses e medio despois ante o Racing Vilalbés, xogando só os últimos nove minutos. A partir de aí, sumou un total de 25 partidos, 23 como titular e completando 19. 9 cartóns amarelos e un vermello aos que engadir os goles ante Negreira, Castro e Barbadás, que serviron para sumar 7 dos 9 puntos en xogo. 

Outro canteirán no equipo.

Alberto volverá ao primeiro equipo logo de media tempada nas filas do Bertamiráns. O centrocampista de Negreira non conseguiu facerse un oco no equipo o pasado ano e volverá logo de coller algo máis de experiencia nunha Rexional Preferente na que puido desfrutar dos minutos suficientes.

Estreouse nas filas da Esedé co primeiro equipo a pasada tempada en pretempada ante Paiosaco e Boiro, ambos en partido de Copa Deputación. En partido oficial contou con algo menos de 140 minutos no Compos mentres que participou nun total de 13 partidos co Bertamiráns anotando dous goles ante Soneira e Noia.

No seu caso, a diferenza do central, xa tiña contrato asinado dende a primeira volta ata 2019 e que se confirmou esta mesma mañá.