Un punto máis ou dous menos?

O Compos non puido sumar a vitoria máis importante da tempada, coa que quedar a dous puntos da promoción de ascenso, ante o Coruxo. Mal partido da Esedé despois do primeiro gol, onde a relaxación puido saír moi cara. Un gol de Quim Araújo, do mellor unha vez máis, serviu para sumar un punto máis despois do empate de Rubén Rivera, 

A Esedé foi de máis a menos ante un rival que chegou a San Lázaro buscando a salvación matemática da categoría. O Coruxo saiu ao terreo de xogo buscando a portería de Ramón, moi ben en cada ocasión dos vigueses. Un dominio alterno na primeira metade que obtivo os seus froitos superado o cuarto de hora coa primeira chegada importante sobre a porta rival, obra de Yacine, antesala do primeiro tanto só un minuto máis tarde.

Pouco a pouco, os de Iñaki Alonso intensificaron o xogo ofensivo ata meter a todo o Coruxo no seu campo. Así foi como superados os vinte minutos chegou o primeiro tanto. Chegada de Fondevila pola banda e pase ao corazón da área para que Quim, chegando desde atrás, marque. Erro da defensa á hora de non despexar o balón que aproveitou o catalán á perfección. 

O Compos mantívose firme ante os vigueses moi preto da área rival. Con Yacine como xogador máis adiantado, as ocasións chegaron pouco a pouco e con algunha dificultade, xa que o xogo polas bandas non parecía ser o mesmo de sempre con imprecisións á hora de poñer centros á área.

Pola súa parte, o Coruxo parecía estar agardando para saír á contra ou buscar perigo a balón parado ante unha defensa que, unha vez máis, permitiu moi pouco. E na primeira clara non quixeron perdoar. Saque de esquina que remata ben Rubén Rivera coa testa sen que Ramón puidera facer nada. Un gol nun mal momento e ante o que non souberon reaccionar na segunda metade.

Na segunda metade o Coruxo saiu a por todas. Posesión de balón e intentos de provocar perigo sobre a porta de Ramón. Sen embargo, os segundos corenta e cinco minutos foron unha constante perda de tempo por parte dos xogadores visitantes, conformes co empate. Ademais, os trocos pararon o partido cando mellor parecían estar sobre o terreo de xogo os homes de Iñaki Alonso, que non lle perderon a cara ao encontro.

En definitiva, o Compos deixouse dous puntos moi importantes ante un rival que fixo todo o posible por saír vivo de San Lázaro. Agora toca pensar no Somozas e na milagre necesaria para poder rematar a tempada entre os catro primeiros clasificados. 

ALIÑACIÓN: Ramón; Josu, Alcañiz, Catú, Jimmy; Marcos Rodríguez; Quim (Borja Navarro, min. 62), Jordan (Lemos, min. 62), Fondevila, Teles (Moreira, min. 78); e Yacine.

CARTÓNS: Amarelos para Marcos Rodríguez e Catú.

GOLES: 1-0 21' Quim, 1-1 42' Rubén Rivera.

ESTADIO: San Lázaro.