O Compos debe gañar este domingo ao único equipo que ata o de agora gañou aos de Iñaki Alonso por máis de dous goles de diferenza. O Atlético Astorga visitará San Lázaro coa mente posta na permanencia ante un equipo que soña coa promoción de ascenso pero que loita, polo momento, por un posto na próxima edición da Copa do Rei. Para calqueira dos dous obxectivos é obrigatorio sumar os tres puntos este sábado.
O Atlético Astorga chegará por primeira vez a San Lázaro ocupando a décima posición, posto moi meritorio tendo en conta que son novos na categoría. Con 37 puntos están na zona tranquila da clasificación grazas ás 8 vitorias e os 13 empates, equipo que máis partidos rematou con reparto de puntos, ademais das só 9 derrotas. Quinto equipo máis goleador con 45 tantos ao seu favor e o terceiro máis goleado con tamén 45 en contra, unha media de 1,5 goles tanto anotados como encaixados por partido ata este momento. A nivel individual hai que ter en conta a Borja Martín, máximo goleador do equipo con 13 dianas.
O equipo astorgano visitará a un Compos que sumou en La Eragudina a derrota máis abultada da tempada. O equipo de Iñaki Alonso chegaba nun bo momento despois de sumar 8 de 12 puntos posibles pero os casteláns baixaron os fumes aos galegos cun contundente 4-1 no partido que, despois de mancarse, chegou un troco na portería que se mantivo ata fai quince días. Víctor Gordón, Ivi Vales e David Bandera por partida dobre foron os autores dos tantos locais mentres que Quim quixo manter con vida ao equipo santiagués cun gol na primeira metade.
En canto á semana pasada, os dous equipos asinaron un bo resultado. O Compos chega de empatar en Murcia nun gran partido en defensa onde Ramón foi o máis importante. Pola súa parte, o Atlético Astorga venceu a un Tropezón en caída libre cos goles de Víctor e Bandera, por partida dobre.
En canto ás baixas, Iñaki recupera a Marcos Rodríguez mentres que non poderá contar con Jimmy nin Fondevila, os dous por sanción. Pola súa parte, o equipo astorgano chegará a Santiago sen baixas, con todo o equipo e unha viaxe organizada para a súa afección.
O encontro será este sábado en San Lázaro ás 18 horas.
Ningún comentario:
Publicar un comentario