A mala xeira aumenta

O Compos non está moi ben esta segunda volta e hoxe volveuse demostrar en Abegondo. Partido intenso, con ocasións nas dúas porterías e, sobre todo, mala actuación arbitral. Un novo partido, e xa van tres seguidos, no que os nosos rematan cun home menos. Esta vez o que non puido rematar o encontro por dobre amonestación foi Tachi, que deixou o equipo con dez cando xa case non quedaba nada para o remate e o resultado xa era definitivo.

A Esedé tivo o esférico durante gran parte do encontro pero a velocidade foi a gran protagonista do encontro. Así que o partido pode resumirse en que o Compos mantivo o seu xogo de toque con calma e buscando a Joselu sempre que foi posible mentres que os locais limitáronse a buscar as ocasións polas bandas gañando en velocidade tanto a Jimmy como a Borja Facal. 

De feito, pola banda de Jimmy chegaron as mellores ocasións do Fabril xa que Álvaro Lemos superou ao lateral branquiazul en velocidade en varias ocasións durante todo o partido. E así chegou o primeiro gol do partido a cinco minutos do fin do primeiro tempo. Un gol que chegou tras unha falta moi mal defendida que o xogador local aproveitou para gañar en carreira e superar a Adrián cun bo disparo. 

Na segunda metade o partido perdeu intensidade debido a tódalas interrupcións debido tanto ás actuacións dos xogadores locais como dende a grada. Actuacións que custaron numerosos cartóns para xogadores do Compos, algún que outro inmerecido. 

Entre interrupción e interrupción chegou o segundo gol do Fabril. De novo pola banda chegou unha nova xogada, un centro dende a dereita e Dani Iglesias superou a Adrián a falta de media hora. Media hora na que Joselu intentou todo o que estivo na súa man por remontar o partido aínda que sen a puntería que tivo durante toda a primeira volta.

E xa co partido sentenciado, unha man de Tachi dentro da área desembocou no penalti que Víctor transformou firmando o 3-0 definitivo. 

Así chegou a derrota máis abultada do Compos nesta tempada nunha xeira moi mala de resultados na que só puidemos ver unha victoria, a semana pasada na casa contra o Betanzos, no que vai de segunda volta. O único bo e que mantense o terceiro posto pero unha derrota contra o Rápido de Bouzas podería custar un posto na promoción de ascenso. 

ALIÑACIÓN: Adrián; Borja, Castiñeiras, Tachi, Jimmy; Gonzalo, Mariño; Marcos Suárez (Franqueira, min. 64), Peláez (Rendo, min. 88), Jacobo (Jordan, min. 54); e Joselu.

CARTÓNS: Amarelos para Mariño, Peláez, Gonzalo, Tachi e Adrián. 

GOLES: 1-0 39' Lemos, 2-0 60' Dani Iglesias, 3-0 87' Víctor.

ESTADIO: O Mundo do Fútbol. 1.200 persoas.