O Compos mete a directa

Terceira victoria consecutiva e... xa en promoción de ascenso! Unha fin de semana completa con resultados favorables para o Compos. Caen o Pontevedra e o Alondras e empata o Somozas... e, como non, o Compos volve a gañar en San Lázaro. Terceira victoria consecutiva nunha boa racha da Esedé que agardemos que non remate así. Ademais, por enriba, o segundo posto está a unha soa victoria. En canto ao partido, Joselu queda xa sen adxectivos posibles e Mariño remata unha victoria que non correu ningún perigo. Adrián, de novo, tivo unha boa tarde sen traballo grazas á boa actuación da defensa e do centro do campo. 

O Compos saíu a dominar o partido dende o comezo. Ante un equipo que pouco máis puido que defender, os de Fredi tiveron o dominio case total do esférico nos primeiros corenta e cinco minutos. Sen embargo, a defensa do Céltiga impediu que o Compos puidera chegar con perigo. Chegadas pola banda de Borja Facal, ocasións por parte de Franqueira e un bo disparo de Joselu. Pouco máis se puido ver no primeiro tempo por parte.

Pola súa parte, o Céltiga case non tivo o esférico e o gardameta tivo que facer algunha boa estirada para evitar o primeiro dos nosos. Sen embargo, chegaron sen problemas ao tempo de lecer sen encaixar ningún gol... e sen crear ocasións sobre a portería defendida por Adrián.

Na segunda metade todo foi igual. O Compos meteu ao rival case na súa área. As ocasións comezaron a sucederse sobre a portería defendida por Vila e en oito minutos chegou o primeiro gol. Pase de Mariño, que fixo un partido completo, e Joselu, despois de sacarse de enriba a dous rivais, dispara e abre o marcador. Un gol máis para un dianteiro que está a un gol de superar os 14 que fixo Roberto Piñeiro na pasada tempada en Preferente, conta que xa igualou. 

E só dous minutos máis tarde volveu a aparecer Mariño, esta vez para marcar. Córner que bota Gonzalo, que fixo un bo partido no centro do campo, e gol do santiagués para facer o primeiro na súa conta esta tempada e pechar o partido. 

Na última media hora, o Compos puido facer algún máis ante un equipo que foi a menos. Sen problemas para a defensa branquiazul, o colexiado non pitou un penalti na área rival, o que puido significar o terceiro gol. 

Cos tres puntos xa na casa, toca pensar no Narón, próximo rival do Compos fóra da casa. Visita ao último clasificado para sumar a cuarta victoria consecutiva, a segunda lonxe de San Lázaro e, se os resultados acompañan escalar un ou dous puntos e recortar, se é posible, terreo ao Racing de Ferrol, líder da categoría.

ALIÑACIÓN: Adrián; Borja Facal, Manuel Castiñeiras, Rendo, Jimmy (Bautista, min. 75); Gonzalo, Mariño; Manu Rodríguez (Nogueira, min. 62), Jacobo Tato, Franqueira (Kolman, min. 81); e Joselu.

CARTÓNS: Amarelo para Gonzalo.

GOLES: 1-0 53' Joselu, 2-0 55' Mariño.

ESTADIO: San Lázaro. Case 1.000 persoas.