Por sétimo ano consecutivo, Samu defenderá as cores do Compos. Un dos capitáns, que chegou da man de Yago alá por 2016, seguirá vestindo a elástica branquiazul unha tempada máis convertíndose no xogador con máis campañas seguidas no clube despois da baixa de Saro. O centrocampista, que suma case 150 partidos oficiais, quere seguir sumando no equipo co que xa acadou un ascenso.
Samu chegou ao Compos no verán de 2016 procedente do Noia, da man de Yago e acompañado de Saro. Nun equipo de transición, sumou os seus 20 primeiros partidos na primeira campaña, sendo aínda sub 23, e asinou 2 goles. Mesmo número de goles pero en 30 partidos na segunda tempada, superando os 2.000 minutos sobre o verde. Na terceira, 25 partidos e algo máis de 1.800 minutos. Sería no curso do ascenso que xogaría en case todos os partidos, 27 de 29, quedando ás portas dos 2.000 minutos e anotando outros 2 goles para a súa conta. E 16 partidos na Segunda B con menos de 1.000 minutos sendo o curso con menos participación do dubrés.
A pasada tempada, con Rodri no banco, xogou un total de 27 partidos, sobrepasando os 1.200 minutos. Ademais, sería na que maior cifra goleadora sumou, con 3 tantos que significaron un empate e dúas vitorias.
Agora, despois de 145 partidos e 9.400 minutos, o mariscal de Bembibre, seguirá dando boas leccións de fútbol ás ordes de Fabiano.
Ningún comentario:
Publicar un comentario