Manu Rodríguez, xogador que leva na Esedé desde Preferente, seguirá un ano máis defendendo as cores do equipo da capital. Por cuarta tempada consecutiva, o centrocampista de Moraña formará parte do novo proxecto que levará a cargo Iñaki Alonso desde o banco, decisivo na continuidade de Manu evitando a súa saída, para a que soaba o Avilés.
Procedente do Estradense e con gran experiencia na Terceira, Manu Rodríguez xogará a súa segunda tempada na Segunda división B. 31 partidos de 36 posibles a tempada pasada nos que o morañés firmou tres goles. Ademais, apunta a imprescindible ao igual que foi con Fredi e Anxo.
No capítulo de altas, Marcos Rodríguez podería ser o seguinte en chegar. Centrocampista do Cartaxena con experiencia na categoría de bronce, chegou a xogar a promoción de ascenso a Segunda co equipo murciano e co Tenerife. O de Marín, ademais, estivo nas filas do Lugo entre 2009 e 2011 coincidindo co Compos na Segunda B.
Pola súa parte, a cesión de Lemos parece estar parada xa que, a pesar de que o xogador prefire ao equipo da súa cidade, ao Depor gústalle máis a opción do Racing de Ferrol. E xunto ao santiagués, podería chegar outro do Fabril. Marc Martínez apunta á portería de San Lázaro tras o seu paso polos filiais do Depor, Elche e Racing de Santander ademais das categorías inferiores do Barcelona.
Ningún comentario:
Publicar un comentario