Crer crea realidades

O Vero Boquete marcará este domingo as diferenzas no partido de volta entre Compos e Alavés B. Un partido importante no que os homes de Yago Iglesias terán que traballar para darlle a volta a un resultado negativo no camiño á Segunda B. Unha cita para a historia cun guión semellante ao do Terrassa do ano pasado, buscando o primeiro gol dende antes do comezo, cun recibimento ao equipo máis que merecido.

A defensa, importante a domicilio.

Se o Alavés B demostrou a pasada fin de semana ser un equipo algo forte na casa, facendo valer o campo pequeno e o seu fútbol directo, ao longo do curso deixou claro que a domicilio non ten tanta capacidade para sacar bos resultados. De feito, lonxe de Ibaia non puideron facer máis de 24 puntos, moi lonxe dos 42 asinados na casa. 5 triunfos e 9 empates avalan ao equipo de Iñaki Alonso fóra da súa casa, onde non perde dende a chegada do actual adestrador alá polo mes de marzo encaixando 5 derrotas.

Sodupe, Zamudio, San Pedro, Pasaia e Bermeo, equipos da zona media baixa da táboa, non puideron sequera puntuar nas ocasións nas que recibiron ao filial babazorro. Non obstante, o mesmo número é o de equipos que si puideron sacar o triunfo da visita do terceiro clasificado do grupo vasco. Somorrostro, Portugalete, Balmaseda, Santurtzi e Deusto si puideron facer o que buscará este domingo o noso equipo con só un resultado válido neste caso para a Esedé. Por outro lado, media liga pechando as súas excursións con empate con 3 sen goles para ningún dos dous equipos, aos que engadir outros 2 encontros nos que non puideron volver a casa cun gol no casilleiro.

O Vero Boquete sempre marca as diferenzas.

Un ano máis, o equipo dirixido por Yago Iglesias terá que darlle a volta a un resultado adverso. Xa pasou hai un ano, naquel momento na segunda eliminatoria, e este ano, o Vero Boquete, volverá ser un factor chave para seguir soñando co ascenso. E é que o feudo branquiazul fai que os partidos se fagan longos e duros aos rivais e máis aos que están habituados a traballar en terreos inferiores. A iso hai que engadir que, malia non estar pegados ao campo, os afeccionados, que responderán ben ante unha nova cita importante, serán o xogador número 12.

O segundo mellor equipo xogando como local. Un Compos que terá este domingo unha vantaxe única e que esta tempada o fixo sumar ata 41 puntos asinando 10 resultados válidos para asinar este domingo o pase á segunda rolda e 1 máis que levaría a cita á prórroga. 10 triunfos máis que importantes e suficientes para acadar o pase conseguidos contra rivais coma o Lugo B, Choco, Alondras ou Somozas.

En defensa, hai que reforzar algo máis a intensidade dalgún que outro partido. Contra Paiosaco e Racing de Ferrol tamén se conseguiron resultados moi importantes mais sufrindo unha remontada un tanto inesperada contra os primeiros, pasando de dous goles de vantaxe ao empate, e case pedindo a hora contra os ferroláns despois de chegar ao minuto 75 con tres tantos de diferenza no marcador. Por outro lado, hai que destacar que o equipo só recibiu 3 goles nos 5 últimos partidos na casa, anotando un total de 18.

Ataque contra defensa.

Se hai algo que chamou a atención do Compos durante todo o curso foi o bo traballo en ataque. Cunha boa zona de creación, con homes coma Mon, Samu e Remeseiro, a parte máis ofensiva do equipo contou con diferentes opcións debido ao tipo de xogadores dispoñibles. E é que con Miki e Josiño entran as ocasións polas bandas a base de velocidade e centros ao corazón da área para que alí non perdoe Aythami, xogador que merece mención a parte. Ademais, se fai falta outra cousa, Alex Ares e Brais Abelenda poden dar máis físico ao ataque acompañados por Santi na media punta e o dianteiro canario.

É Aythami, sen dúbida, unha parte fundamental do ataque branquiazul. O nome do canario soou en numerosas ocasións nos altofalantes do Vero Boquete grazas ao seu bo facer de cara a gol. Logo dun arrinque un tanto lento, contra o Choco fixo o seu segundo gol na casa. Dende outubro e ata o de agora, 15 goles en 11 partidos quedando só sen ver o camiño á porta na derrota contra o Racing Vilalbés.

Pola súa parte, a defensa do Alavés B destaca pola súa fortaleza, algo que xa demostrou no partido de ida. Sen balón, o equipo babazorro é un perigo constante grazas ao seu bo facer atrás e, cos balóns en longo para Lupu, pode dar máis dunha dor de cabeza á zaga compostelanista, que podería estar formada por 4 xogadores, con Saro ou Sergio Pereira e Naveira nas bandas, ou ben por 3 centrais reforzando o xogo na zona de creación.

A segunda parte, exemplo a seguir.

Sen dúbida, a segunda metade da ida será o camiño a seguir este domingo. Despois dun primeiro tempo que puido chegar unha vantaxe superior ao equipo local, os nosos superaron as complicacións logo do paso por vestiarios. As chegadas sucedéronse contra unha defensa que non puido facer máis que salvar un empate merecido con Alex Ares coma peza máis importante nos segundos corenta e cinco minutos e Anxo salvando unha diferenza superior logo do gol de Lupu antes dos vinte minutos. 

Agora si, todos dispoñibles.

Despois da ausencia de Santi no partido de ida, no que non puido sequera viaxar por ter que presentarse no colexio electoral. Con isto, Yago terá que realizar dous descartes antes do xogo para realizar unha convocatoria final de 18 xogadores, mesmo número de pezas que poden estar dispoñibles na Segunda B, a diferenza da Terceira división. 

Festas da Ascensión. 

En plenas festas da Ascensión en Santiago, o Compos terá este primeiro domingo de xuño unha cita para a historia que dará comezo ás 17:45 horas coa convocatoria á afección para o recibimento ao equipo e darlle folgos na porta 1 do estadio. O encontro dará comezo ás 19:30 horas no Vero Boquete e as entradas, dispoñibles dende hai unha semana, poderán adquirirse tanto mañá coma o día do partido a un prezo de 5 euros para aboados, que terán que presentar o abono na porta do campo xunto coa entrada, e 10 euros para público xeral en Preferencia logo de esgotarse as entradas para Tribuna dispoñibles, para onde se poden adquirir entradas dende o pasado martes en diferentes locais da cidade. 

Por contra, para quen non poida asistir ao Vero Boquete, o partido poderá seguirse en directo a través das contas de Twitter tanto da Curva Branquiazul coma do clube. Tamén se poderá escoitar en 'Esedé Radio' e verse en directo na TVG2 e pola web da CRTVG. 

O treito final do camiño

Chega o máis duro e, á vez, o máis emocionante. O Compos terá este domingo o seu primeiro obstáculo diante dun filial por segundo ano consecutivo. Nesta ocasión, o rival será o Alavés B que buscará medir as forzas contra os nosos na primeira eliminatoria xogando dende xa as súas cartas coa elección do campo onde se xogará e un horario que complica a viaxe a Vitoria dun grupo reducido, ante o escaso aforo dispoñible, de seareiros branquiazuis. Un primeiro partido a domicilio que seguro non será coma a visita á Cidade Deportiva Dani Jarque o pasado ano, onde os nosos caeron nesta mesma rolda por goleada contra outro filial da Primeira división

Poucos precedentes positivos.

Ao longo da presente tempada o Alavés B asinou resultados máis que positivos en Ibaia. Nun grupo sempre complicado coma é o vasco, os agora adestrados por Iñaki Alonso conseguiron pechar o curso nunha terceira posición que semella ser a primeira para os equipos do nivel da categoría, por debaixo de Portugalete e Sestao River. Unha posición que vén a demostrar o gran nivel do segundo equipo vitoriano, fonte do conxunto revelación da Primeira división.

Pechando de xeito matemático a terceira praza na derradeira xornada de liga, o filial alavesista asinou un total de 66 puntos. 18 vitorias e 12 empates para un dos equipos con menos derrotas da categoría, con só 8 enfrontamentos perdidos. O terceiro equipo con máis acerto de cara a gol con ata 69 tantos a favor mais, por contra, cunha defensa que deixou que desexar con 44 goles recibidos.

De Ibaia poucos puideron sacar algo positivo. Só 1 punto saiu dende o pasado mes de marzo mentres que, ao longo de todo o curso, só fuxiron 12 puntos en forma de triunfos de Balmaseda, Sestao e Lagun Onak mentres que Santurtzi, Pasaia e Amurrio non conseguiron pasar do empate. En canto aos goles, só quedaron sen ver portería en 3 citas, que remataron en 2 derrotas e 1 empate.

A nivel individual, durante o curso destacou a base de goles Andrei grazas aos 18 tantos asinados ao longo da tempada. Un equipo cunha media de idade por debaixo dos 22 anos e cun gran número de pezas chegadas ao equipo no pasado verán, logo dun pau na pasada promoción de ascenso.

Terceiro ano consecutivo.

O Alavés B xogará a súa terceira fase de ascenso consecutiva logo de non poder volver a unha categoría de bronce que deixou en 2006. De feito, pódeselle engadir unha edición máis na que non puideron pasar sequera da primeira rolda en 2014.

Alá por 2014, os vitorianos mediron forzas co Teruel. En Mendizorroza, o partido acabou con empate a un gol mentres que terras aragonesas foron os locais os que se levaron o triunfo deixando ao filial branquiazul fóra da loita á primeira. Algo máis de sorte, superando unha eliminatoria contra o Laredo, tiveron o pasado ano grazas a unha goleada en Ibaia que servía para superar a primeira fase e enfrontarse na segunda ao Cádiz B, equipo que si foi quen de gañar en terras vascas.

A mellor promoción de ascenso, quedando ás portas da Segunda B, chegou para os alaveses hai dous anos. Caeron na fase de campións contra o Formentera e os penaltis apareceron tanto na semifinal, onde superou ao Cristo Atlético de Palencia coma na Final, perdendo dende os once metros contra o Ontinyent.

Pola nosa parte, o Compos será a segunda vez consecutiva que busque volver á Segunda división B e segunda na que se enfronte a un filial na primeira rolda. O Espanyol B foi o primeiro obstáculo dos nosos empatando no Vero Boquete e gañando en terras catalás. A segunda visita á provincia de Barcelona chegou co Terrassa caendo de novo a domicilio e goleando na casa. Non obstante, a rolda máis importante foi a final na que a Esedé empatou en Salamanca e caeu, nun partido moi igualado e físico, en Santiago dando o ascenso aos castelán leoneses.

Un precedente contra o filial.

Os enfrontamentos entre santiagueses e vitorianos sucedéronse entre a Segunda B e a Copa do Rei. Primeiro equipo e filial mediron forzas cos nosos cun resultados que non son todo o bos que podería gustar na capital galega. Pero, como se di, as estadísticas están para rachalas.

Contra o filial babazorro, na tempada 2001/02, repetiuse o resultado tanto no Vero Boquete, onde os nosos gañaron por 3-1 con goles de Arquero por partida dobre e Juanito, coma en Ibaia, onde os alavesistas non deixaron opción asinando outro 3-1, onde Sergio Gómez fixo o gol branquiazul.

Por outro lado, contra o primeiro equipo do Alavés os precedentes non deixan tan bos recordos. E é que, malia quedarse preto, os nosos nunca gañaron dito enfrontamento nin en Santiago, Santa Isabel e San Lázaro, nin en Mendizorroza, onde nin sequera se puido sacar ningún resultado positivo encaixando algunha que outra goleada.

Despedidas diferentes.

Compos e Alavés B pecharon a tempada regular de maneiras moi diferentes. Unha vitoria e unha derrota que, non obstante, non cambiaron as súas posicións na táboa, cos dous equipos xa clasificados matematicamente para esta fase de ascenso.

O Compos puxo punto e final á liga no Couto. Un Ourense CF que non puido facer realidade o seu soño de chegar ata aquí, conseguiu ganar un enfrontamento no que os nosos non saíron a por todas coa única intención de chegar a este treito final do curso con todos os xogadores dispoñibles e listos para o máis duro.

Pola súa parte, o Alavés B non podía arriscar a perder o partido e, con el, o terceiro posto. Contra o Bermeo, o filial alavesista gañou pola mínima grazas aos goles de Héctor e Bengo. Nos locais non perdoou Ispizua xa sen opcións de conseguir un resultado positivo para un equipo que estará a vindeira tempada unha categoría por debaixo.

Preparación en sintético.

Cinco adestramentos ao longo da semana e unha curiosidade. O Compos adestra catro veces no anexo do Vero Boquete mentres que o sábado o fará, antes de viaxar cara Vitoria, en Santa Isabel. Un adestramento en herba artificial para preparar a posibilidade de xogar unha vez máis nun terreo sintético. 

Con catro campos na cidade deportiva vitoriana, existe a posibilidade de que o partido se xogue en campo de herba artificial. Non obstante, non sería nin de lonxe a primeira vez que a Esedé teña que traballar este ano nun terreo no que non se lle deron de todo ben as cousas, sobre todo nos últimos meses. De feito, 4 dos 8 enfrontamentos dos nosos remataron con triunfo branquiazul con só 1 neste 2019.

O Silvestre Carrillo de La Palma, O Morrazo e A Porta Santa viron aos nosos gañando na primeira volta, non sen problemas, nun campo moi diferente ao que están acostumados os homes de Yago Iglesias mentres que se conseguiu o propio na Grela na segunda volta. Tamén neste 2019 chegaron os dous empates, na Cheda contra o Lugo B e nas Eiroas, sufrindo un gol en contra no treito final, e as dúas derrotas, dolorosas cun xogo pobre dos nosos en Santa Mariña e o Municipal de Laracha.

Todos á disposición de Yago.

Ao igual que na visita a Ourense, Yago terá á súa disposición aos 20 xogadores. Ademais, non conta con apercibidos de sanción que poidan perigar para o partido de volta xa que, rematada a liga púxose o contador a cero. Neste caso, as sancións chegarán despois de dous cartóns amarelos nos seguintes seis partidos, sempre e cando consigamos un posto na gran final.

O Alavés mete o primeiro gol.

Co campo e o horario do encontro da ida, o Alavés xa meteu o primeiro gol. O partido xogarase na Cidade Deportiva José Luis Compañón, en Ibaia, nun campo que aínda se descoñece se será de herba natural ou artificial, sen bancadas e cun aforo moi limitado, algo que complicará moito a presenza de afeccionados branquiazuis. Outra cousa que complica a presenza de seareiros é o horario. Dará comezo este domingo ás 12 horas obrigando á saída de afeccionados, xa sen viaxe organizada polo clube por falta de xente, o día anterior ou ben pasando a noite na estrada. As entradas, que só se poderán adquirir nas oficinas do Vero Boquete, terán un prezo de 10 euros e só haberá dispoñibles un total de 100. 

Para quen non poida asistir ao encontro, poderase seguir a través das contas de Twitter tanto da Curva Branquiazul coma do clube. Ademais, non haberá televisión.

Punto e seguido

Chega o fin da tempada regular. O último partido do curso no que os nosos non se xogarán nada. Ás portas dunha promoción de ascenso ilusionante, a Esedé terá que conquistar, por segunda vez este curso, O Couto. Diante estará un dos catro equipos que aínda quere pelexar pola cuarta posición na derradeira xornada, un Ourense CF que está a facer unha segunda volta para enmarcar conseguindo meterse no máis alto da táboa no momento máis axeitado.

Un obxectivo aínda posible.

O Ourense CF está a facer unha gran tempada, a mellor da súa historia, situándose na sexta praza a falta dunha xornada con só un punto menos que un Alondras que depende de si mesmo para pelexar, por segundo ano consecutivo, polo ascenso de categoría. Un equipo que foi de menos a máis con xogadores moi importantes na Terceira galega e que superou, con moita diferenza, o feito nunha primeira volta na que quedaron en terra de ninguén, moi lonxe da situación actual.

Sextos con 61 puntos, os homes de Fran Justo conseguiron xa máis puntos nesta segunda metade do campionato converténdose nun dos rivais máis duros do grupo, algo que xa deixaron claro na súa visita ao Vero Boquete na xornada que inauguraba o 2019. 17 triunfos, superando aos equipos punteiros da categoría agás o Racing de Ferrol a asestando a maior goleada do curso con ata oito goles de diferenza contra o Céltiga no Salvador Otero, e 10 empates, entrando teste caso o cadro verde, aos que engadir outras 10 derrotas, caendo pola mínima sempre agás diante do Racing Vilalbés no Couto. Uns datos que se completan cun total de 50 goles a favor mentres que recibiron un total de 24, cifra que demostra que contan coa mellor defensa do campionato.

Un equipo moi forte a domicilio, conseguindo boa parte dos seus puntos lonxe do Couto, e que buscará pechar o curso cunha vitoria na casa, onde fixo 26 puntos. Polo Couto pasaron xa todos os equipos agás o Compos e só 6 equipos puideron marchar coa vitoria asinando a súa última caída na casa hai case dous meses, cando o Racing Vilalbés conquistou o campo ourensán. Por outro lado, 5 conseguiron sacar un punto repetíndose o 1-1 e o xogo sen goles ata en dúas ocasións cada un. No positivo, conseguiron un total de 7 triunfos, 5 deles nesta segunda volta e un menos de xeito consecutivo.

A nivel individual, hai que ter moi en conta ao gardamallas Diego García, que encaixou 6 goles en toda a segunda volta, así como a defensa ourensá. Non obstante, tamén fan falta goles e aí aparecen Raly Cabral con 9 goles no seu casilleiro e o ex branquiazul Róber con 8.

Un 2019 de ensoño.

Despois de case tres semanas de parón, a primeira volta puxo punto e final no Vero Boquete nun enfrontamento que medía as forzas de Compos e Ourense CF. Un partido que chegou ao tempo de lecer con vitoria local e que rematou cunha remontada importante para os visitantes. Unha vitoria que inauguraba un ano para o recordo dos de Fran Justo. Despois, unha serie de empates e só 1 derrota ata marzo, cando houbo un cambio de dinámica moi importante que o deixa, a día de hoxe, con 8 triunfos consecutivos recibindo neste tempo só 1 gol en contra, a pasada fin de semana na Porta Santa.

Malia non sumar unha xeira tan importante, os de Yago Iglesias chegan xa co obxectivo de clasificarse para a promoción máis que conseguido, asinado no partido da Senra contra o Ribadumia. Isto chegou logo dun segundo tempo no que, a domicilio, complicáronse as cousas máis do esperado con só 4 triunfos e 2 empates lonxe do Vero Boquete. Ao anterior hai que engadir que os nosos só anotaron 5 goles nas últimas 6 saídas.

Un campo sempre difícil.

Por segunda vez na historia, Compos e Ourense CF pelexarán pola vitoria en liga na cidade das Burgas. Un campo onde os nosos xa puideron gañar nesta segunda volta fronte ao outro equipo da cidade e no que o pasado ano non puideron pasar do empate.

Ata tres equipos recibiron á Esedé no Couto nestes últimos anos. O CD Ourense, equipo histórico da cidade, recibiu aos nosos nun total de 15 ocasións. Só 1 o fixeron UD Ourense e Ourense CF con resultados un tanto negativos para os nosos xa que só puideron saír do feudo ourensán con 4 vitorias e 3 empates mentres que outras 10 citas remataron con triunfo local, todas elas conseguidas polo equipo xa extinto.

Esta tempada, a visita á UD Ourense rematou con triunfo branquiazul grazas aos goles de Brais Abelenda e Rubén, ambos os dous no treito final de cada tempo. Por outro lado, a última visita ao Ourense CF, o pasado curso, rematou con empate grazas aos goles de Edu Otero para os locais e Alex Ares para os nosos.

Unha xornada positiva.

A Esedé pechou a parte regular na casa cun triunfo contra o Somozas que, a parte dos tres puntos, deixou unhas moi boas sensacións malia as rotacións feitas por Yago. Unha actuación sobresaínte de Miki, con ata tres asistencias, e os goles de Rubén, por partida dobre, e Santi serviron para darlle un triunfo a un equipo que chegará á promoción de ascenso nun gran momento. 

Máis problemas para conseguir tres puntos de ouro tivo o Ourense CF na Porta Santa contra o Paiosaco. Raly Cabral inaugurou a conta nos primeiros intres do primeiro tempo mentres que Josiño, a quince minutos para o final, asinou o tanto que daba a igualada aos locais. Non obstante, Iago Beceiro non quixo perder a oportunidade de manter as opcións dos ourensáns por entrar na promoción facendo o que podería ser un dos goles máis importantes da historia do clube. 

Mirando a terceiros. 

Co traballo rematado, os de Yago Iglesias terán que ir mirando cara os outros grupos para coñecer ao posible rival contra o que se medirá a seguinte fin de semana na primeira rolda da promoción de ascenso. Unha lista de 17 posibles rivais e entre os que só se coñecen, a falta dunha xornada, 3 equipos confirmados. 

Por outro lado, o Ourense CF depende doutros partidos para poder pechar o curso na cuarta posición. Para facerse con ese premio, nin Alondras, nas Eiroas fronte a un Bergantiños xa sen nada polo que pelexar, nin tampouco o Barco, que visitará Espiñedo contra o Arenteiro tamén xa salvado. Os empates dos dous equipos xunto coa vitoria dos ourensáns os clasificaría para a promoción. 

Todos dispoñibles. 

Por raro que pareza, e se nada sae mal de aquí ao domingo, Yago Iglesias terá á súa disposición a todo o equipo para a visita ao Couto. Unha cita importante para mellorar as sensacións de cara á parte máis dura e importante do curso. Non obstante, Álvaro Casas podería ter en perigo a súa presenza na ida da primeira eliminatoria de ver un cartón amarelo este domingo, xa que chega apercibido de sanción. 

Tingamos O Couto. 

O Couto abrirá as súas portas para acoller o derradeiro partido de liga este domingo ás 18 horas, de novo en horario unificado. Un partido onde haberá moito en xogo e a oportunidade perfecta para dar o último alento aos nosos antes da promoción. Para isto, as entradas terán un prezo de 10 euros para os afeccionados branquiazuis que se despracen ata a cidade termal.

Por outro lado, para quen non poida asistir á derradeira cita do curso regular, poderase seguir o encontro a través das diferentes redes sociais tanto da Curva Branquiazul coma do clube. 

É o momento

Último partido de liga no Vero Boquete, penúltima xornada do campionato regular e o obxectivo xa cumprido. Chega o momento máis esperado e, sobre todo, máis importante. O momento onde afección e equipo teñen que ser un nestas portas da promoción de ascenso. Nada en xogo por parte dos nosos pero todo o contrario para un Somozas que aínda non é quen de pechar a súa permanencia na Terceira división, pasando por serios problemas e, a día de hoxe, ocupando unha desas posicións coas que depender doutros equipos para non volver a unha categoría que deixou hai once anos.

Moi preto do inferno.

En 2008, o Somozas conseguiu volver á Terceira división nove anos despois de descender. Un gran regreso que convertiu máis cedo que tarde ao equipo nun dos grandes da categoría. Cinco anos entre a zona media da clasificación e un curso ás portas da promoción para, en 2014, asinar o mellor curso da súa historia quedando campións de grupo e ascendendo á Segunda B, na que coincidiría cos nosos, logo de superar ao Tenerife B na final da promoción. Agora, despois de tres anos na categoría de bronce e case dous na Terceira, o equipo loita por non caer aos infernos da Preferente.

Con 43 puntos, ocupan a 16ª posición da táboa, un posto que despois do descenso do Fabril e moi posiblemente o do Rápido de Bouzas podería converterse nun dos que rematen en descenso de categoría, dependendo sempre dalgún ascenso para evitalo. Un posto ao que chegan despois de 11 vitorias e 10 empates conseguindo as mellores goleadas contra Racing e Compos, ámbalas dúas na primeira volta. Ademais, 15 derrotas para un equipo que anotou 43 goles e encaixou 49.

Se no Candocia conseguiron derrotar aos grandes, a domicilio quedaron ás portas de conseguir bos resultados. 4 triunfos diante de equipos da zona baixa da clasificación conseguindo a última hai xa tres meses, e 7 empates que se completan con outras 7 derrotas encaixando as peores, con tres goles de diferenza, no Couto contra o Ourense CF e na Grela hai só semana e media.

A nivel individual, un ano máis destaca a figura de Gerardo. O dianteiro asturiano volve a ser o referente no ataque somocense con 11 goles ata o momento, cifra que poderá aumentar na derradeira xornada xa que non poderá estar no Vero Boquete por sanción. Situado algo máis atrás, unha peza importante con pasado branquiazul e que segue a dar leccións de fútbol na Terceira división. Gonzalo, titular indiscutible chegando aos 3.000 minutos de xogo.

Nada e moito.

Un partido importante para recuperar as boas sensacións nos nosos e para manterse con vida nos somocenses a falta dunha xornada de liga. Co terceiro posto asegurado e sen opcións de mellorar, os de Yago Iglesias buscarán pechar a derradeira cita como local no campionato regular. Por outro lado, os da Ferrolterra terán que evitar o perigo diante dos nosos e, no encontro final, fronte a un Arosa case sen opcións de asaltar o cuarto posto. A parte, como xa é sabido, a perda de categoría dependería de diferentes factores. 

Moita igualdade.

Compos e Somozas comparten categoría por sexto ano ao longo da historia. Dende que en 2008 os nosos visitaran Pardiñas por primeira vez na historia en partido de liga, a Terceira e a Segunda división B viron xogos importantes nos que os nosos conseguiron un total de 5 vitorias mentres que os verdibrancos só 2, unha en cada campo. 

En Santiago, xogando sempre no Vero Boquete, os nosos só permitiron saír 4 puntos en forma de 1 vitoria somocense grazas a un único gol de Antón De Vicente e 1 empate con goles de Joselu para os nosos e de Carlos García para os visitantes xa no tempo engadido. 

En canto á primeira volta, o enfrontamento rematou coa maior vantaxe a prol dos homes de Manolo García. Gerardo, ausente este domingo, e Alex Ares marcaron no primeiro tempo mentres que, no segundo, Alex e Daniel aproveitaron os erros defensivos dos nosos para devolver a vitoria ao equipo que superou por primeira vez ao Compos no Candocia. 

Xornada chave.

A pasada fin de semana os dous equipos tiñan unha xornada chave que saldaron de maneiras moi diferentes. E é que os nosos pecharon o seu primeiro obxectivo do curso mentres que os somocenses caeron contra un rival directo na casa nunha cita na que contaban coa posibilidade de deixar a súa salvación practicamente asegurada. 

Despois de dúas derrotas, o Compos fixo un gran primeiro tempo na Senra para deixar sen opcións a un Ribadumia que buscará unha milagre para salvar a categoría. Un gol de Aythami e outro de Miki foron suficientes para matar un xogo no que os visitantes recurtaron diferenzas cun tanto de Rubén Cerqueiras.

Por outro lado, o Somozas chegou ao tempo de lecer por diante no marcador contra o Paiosaco grazas a un gol de Joseja. Josiño e Eloy, por partida dobre, conseguiron remontar o partido no segundo tempo co último gol xa no engadido sen opcións para os locais. Un triunfo que deixa moi ben situado aos laracheses. 

Aythami, un partido fóra. 

Chega o momento de poder facer rotacións e facer chegar en forma á promoción a todo o equipo. Sen nada polo que loitar máis que por dar unha boa imaxe, Yago Iglesias contará con só unha baixa importante: a de Aythami. O dianteiro canario foi expulsado na Senra por dobre amoestación e terá que estar unha fin de semana vendo ao equipo dende a bancada. Con el estará tamén Manuel Castiñeiras, que foi tamén expulsado por protestar e non poderá estar no banco nos seguintes 5 partidos. Por outro, Samu xa está recuperado e poderá volver ao verde mentres que Álvaro Casas chega a esta cita apercibido de sanción, polo que podería forzar o seu quinto cartón e estar si ou si na primeira rolda da promoción.

Todos xuntos. 

A promoción á volta da esquina e chega a oportunidade perfecta de xuntar afección e equipo. Este domingo ás 18h no Vero Boquete despedimos a liga na casa, á falta do encontro no Couto, nun enfrontamento onde demostrar aos nosos que estamos con eles. Un partido de balde para aboados e con entradas a 10 euros para non aboados maiores de idade e de balde para menores.

Quen, por contra, para quen non poida achegarse ao templo branquiazul poderá seguirse a través das contas de Twitter da Curva Branquiazul e do clube. Tamén se poderá escoitar en directo en 'Esedé Radio', na web oficial do clube. 

Sen tempo para pensar

Chega o momento máis importante do campionato. Logo de dúas derrotas, perdendo as boas sensacións, o equipo buscará na Senra volver ao camiño do bo xogo e da vitoria. Diante, un Ribadumia que quere esgotar ata ao final as súas opcións de manter a categoría estando, a día de hoxe e dependendo de terceiros, a catro puntos dos postos de permanencia con nove aínda por xogarse. Un partido entre dous equipos necesitados de vitorias neste treito final do campionato con moito aínda por decidirse. 

Última bala. 

O Ribadumia quere poñer punto e final ao campionato cunha nova permanencia na Terceira galega por quinto ano consecutivo. Non obstante, o conxunto sanxenxino pasa polo seu peor momento dende que chegaron á categoría alá polo ano 2014. Con pé e medio na Preferente, están obrigados a sumar de tres este domingo se queren seguir pelexando un ano máis na máxima división do fútbol galego. 

Ocupando a 18ª praza da clasificación con 35 puntos noutras tantas xornadas, pelexan por ocupar o posto que arestora é do Laracha, unha posición que daría a permanencia de haber algún ascenso galego á Segunda B e sempre e cando non descenda o Rápido de Bouzas, obrigando así a que haxa dous ascensos evitando así arrastres máis alá do do Laracha, segundo filial do Deportivo. Un equipo que só puido gañar en 8 ocasións, gran parte na casa, mentres que no capítulo de empates trátase do cadro que máis veces repartíu os puntos, cun total de 11 igualadas. En canto a goles, sumaron a día de hoxe un total de 37 mentres que encaixaron 60 sendo o cuarto equipo que máis recibe. 

No capítulo da Senra, os resultados son algo máis positivos. 23 puntos en 17 enfrontamentos grazas a 6 vitorias e 5 empates caendo equipos coma o Barco ou o Choco e no que o Bergantiños non puido pasar do empate. Un campo no que sempre houbo goles, no que non hai un empate a cero dende hai ano e medio. 

A nivel individual, contan cun bo equipo dende a portería, cuberta con Pazos e Ángel, que apunta titular, e rematando nunha dianteira con grandes xogadores do fútbol galego coma Hugo Soto, que será baixa por sanción, e Fran Fandiño, que tivo que retirarse mancado no partido contra o Paiosaco. Ademais, nas filas do cadro ribadumiense está o ex futbolista branquiazul Tomás Abelleira, que non gozou de sorte na primeira volta no Ourense CF e, dende xaneiro, busca a súa oportunidade nas filas do Ribadumia, onde fixo dous goles ata o momento gozando de minutos en todos os partidos da segunda volta, agás do que tivo que perderse por sanción. 

Promoción e descenso. 

Na Senra os dous equipos pelexarán por algo moi importante. Dous obxectivos que pasan pola vitoria e que, de conseguilo un dos dous, poderían deixar ao outro moi tocado ou, no caso dos locais, descendido. Un partido que, por ese motivo, aumenta a emoción e a importancia do xogo entre o terceiro e o antepenúltimo. 

Despois de dúas derrotas, o Compos quere pechar de xeito matemático a súa clasificación para a promoción de ascenso. Fóra da pelexa pola primeira praza e sen case opcións de ser segundo, algo que pasa por gañar todo e que o Bergantiños non puntúe de aquí ao final da liga, o obxectivo pasa a ser o de asegurar a terceira posición. E con 4 puntos máis ca o Alondras, o primeiro obxectivo e deixar fóra desta pelexa aos principais perseguidores. Para iso, haberá que sumar tres puntos de aquí ao final. 

Pola súa parte, o Ribadumia chama á milagre. Catro puntos os separan do Laracha, equipo que marca a permanencia. Un obxectivo, o da salvación, que non puideron conseguir nin Porriño Industrial nin Boiro, descendido o pasado mércores, e que podería rematar para os do Salnés se non consiguen os tres puntos e si o fai o conxunto larachés. 

Un mal momento no peor momento. 

Por terceira vez neste curso, o Compos suma dúas derrotas consecutivas. Non obstante, a peor xeira da segunda volta chega no peor momento con problemas para realizar o xogo habitual que o levou ao máis alto e grandes problemas para facer goles lonxe do Vero Boquete. É así que, ademais da derrota fronte ao Racing Vilalbés, hai que sumar outras 4 das últimas 5 saídas nas que non foron quen de puntuar marcando só 1 gol. Ao anterior hai que engadir que os nosos só fixeron 4 dos últimos 18 puntos a domicilio este curso. 

As derrotas en Santiago contra os chairegos e no Municipal de Laracha serviron para demostrar serios problemas á hora de facer un bo xogo. Contra os vilalbeses, o primeiro tempo mantivo o guión do feito en terras carballesas mentres que o segundo, por debaixo no marcador, serviu para mellorar mais sen a fortuna suficiente para sacar algo positivo. 

A mesma sorte apartou ao Ribadumia de rematar cunha xeira de 10 saídas sen perder. A visita dos homes de Luis Carro á Porta Santa deixou un triunfo importante para un Paiosaco que se achega un pouco máis á permanencia. Tres goles locais, con dous erros graves, e as expulsións de Javi Domingo e Hugo Soto, ás que engadir a lesión de Fran Fandiño, deixan un moi mal recordo do enfrontamento. 

Precedentes favorables. 

Compos e Ribadumia veñen enfrontándose cada curso nos tres últimos anos con Yago Iglesias como gañador total no banco. E é que de 5 precedentes, os nosos non se deixaron ningún punto nin no Vero Boquete nin tampouco na Senra, onde, aínda con dificultades, sacaron os puntos de partidos cheos de emoción.

Imos ao 2017. En xaneiro, na segunda xornada da segunda volta do campionato, Diego Rey fixo o primeiro gol branquiazul ao filo do tempo de lecer. Unha boa vantaxe coa que se chegou ao treito final, cando Tomás asinou o segundo xa sen tempo posible para reaccionar os locais.

Mesmo ano pero na segunda xornada do campionato seguinte. Nova visita dos de Yago Iglesias á Senra e aínda máis problemas para gañar nun xogo no que se chegou ao tempo de lecer sen goles. No segundo tempo, Rubén e Primo non precisaron máis de cinco minutos para poñer unha boa vantaxe que entre Santi e Hugo Soto conseguiron igualar en menos tempo. Non obstante, a tolemia foi a máis co gol de Mon e a resposta inmediata de Fran Fandiño deixando seis goles en algo máis de vinte minutos. A sentenza, con só cinco minutos para o final do xogo, chegou cun gol de Róber pechando unha vitoria pola mínima nun enfrontamento con ata sete goles en corenta minutos. 

Samu, baixa importante.

Samu segue sen poder estar a disposición do adestrador ribeirense sendo a única baixa para este partido. Por outro lado, Piscu e Alex Ares, que xogaron con molestias contra o Vilalbés, poderían estar sen problemas na Senra nun partido moi importante para este final do campionato permitindo pensar xa na promoción de ascenso. 

Todos xuntos. 

Neste momento tan complicado, clube e afección deben estar xuntos para levar ao equipo á Segunda división B. O primeiro paso é estar ao lado dos xogadores este domingo na Senra. En Ribadumia, na Senra, o enfrontamento dará comezo ás 19 horas pechando a xornada 36. As entradas terán un prezo de 10 euros. 

Por contra, para quen non poida achegarse ao pobo do Salnés, poderá seguirse a través das contas de Twitter tanto da Curva Branquiazul coma do clube. Ademais poderá verse a través da segunda canle da TVG no Carrusel da Terceira do En Xogo. 

O momento máis importante

Chegamos ao treito final do campionato. Co segundo posto aínda en xogo, o Compos terá que afrontar o seu segundo encontro desta semana nun mércores onde os nosos precisarán do apoio da afección branquiazul para deixar atrás o resultado de Laracha. Diante estará o Racing Vilalbés, un dos mellores equipos desta segunda volta e que chegará ao Vero Boquete sen nada polo que loitar máis que o orgullo, logo de salvar a categoría sen correr ningún risco.

Sen riscos.

Con 29 puntos conseguidos en 15 xornadas, os de Vilalba son os que máis puntos conseguiron dende que arrincou a segunda volta. E é que logo de rematar a primeira volta, de maneira sorprendente, nos postos de descenso, os lugueses están agora salvados a catro xornadas para o final do campionato, sen pasar ningún tipo de risco a diferenza do que se puido pensar na primeira metade do torneo.

Con 46 puntos, os de Simón Lamas ocupan a undécima posición da táboa superando ao Paiosaco en 8 puntos mentres que son xa 12 os que o afastan dos postos de promoción de permanencia, quedando sen ningunha opción malia facer unha gran segunda volta. 12 triunfos avalan a un equipo forte a domicilio e que conseguiu outros 10 empates. Ademais, con 12 derrotas, é o equipo con menos partidos perdidos da metade baixa da clasificación. En canto a goles, anotaron e recibiron o mesmo número de goles: 42.

Outro dato curioso dos vilalbeses é que conseguiron o mesmo número de puntos tanto na Magdalena coma a domicilio: 23. Fóra da casa, gañaron ata 7 enfrontamentos sacando os tres puntos de campos coma Calabagueiros ou A Lomba mentres que só conseguiron empatar no Candocia e na Senra, un por volta. Uns grandes datos aos que engadir a xeira de 6 saídas consecutivas sen perder, sufrindo o último pau no Lourambal na primeira xornada desta segunda volta.

A nivel individual, contan nas súas filas con ex xogadores branquiazuis coma o central Taboada e os centrocampistas Make e Diego Rey. Ademais, o dianteiro Alex Pérez, baixa por lesión para este mércores, é o máximo anotador do equipo con 9 tantos mentres que Javi Pita, baixo paus, é unha das pezas fundamentais do gran momento que pasan.

Unha segunda volta para non esquecer.

O Racing Vilalbés está a facer unha segunda volta case inigualable. 29 puntos de 45 posibles con unicamente dúas derrotas, unha a domicilio, en Porriño, e outra en Vilalba, contra un Lugo B que suma o mesmo número de puntos que os seus veciños chairegos.

Os da Terra Chá, que encadean 4 vitorias consecutivas, son sen dúbida os mellores dunha segunda volta na que asinaron un total de 22 goles mentres que en contra recibiron só 12, con 4 nas dúas últimas citas. Unha segunda volta na que só quedaron sen marcar no derbi lugués mentres que foron quen de deixar a súa porta a cero en 6 citas.

3 de 3.

O Racing Vilalbés pisou o verde do Vero Boquete ata en tres ocasións e lonxe de sacar algún bo resultado, marchando con tres derrotas, nin sequera foron quen de marcar. Un dato que se compensa coas catro visitas dos nosos á Magdalena sen conseguir gañar nunca, asinando dous empates.

Con dous triunfos pola mínima, o mellor resultado para os de Yago Iglesias chegou a pasada campaña cunha vitoria con tres goles branquiazuis obra de Alex Ares, Tomás e Diego Rey, todos eles na segunda volta. Unha gran vitoria nun xogo igualado e coa promoción en xogo por parte dos dous conxuntos, aínda no comezo da segunda volta do curso.

Por outro lado, na primeira volta, o resultado en Vilalba foi de empate grazas aos goles de Ballesteros e un Aythami moi en forma e que este mércores buscará marcar na casa por décimo encontro consecutivo, chegando un tanto máis descansado que o resto de compañeiros despois de quedar fóra da convocatoria para o xogo contra o Laracha sendo o descarte de última hora.

Cara e cruz.

A pasada xornada deixou un novo triunfo para os vilalbeses mentres que o Compos encaixou a peor goleada dende que Yago Iglesias está no banco branquiazul. Dous partidos xogados o pasado domingo e que deixaron unha cousa en común: os goles.

O Compos recibiu unha derrota tan dolorosa coma avultada. Cinco goles en contra con diversos erros en defensa sobre un campo artificial que non está a deixar boas sensacións aos nosos este ano. Na outra portería, Alex Ares fixo o único tanto dos nosos xa case sen opcións de remontar.

O Racing Vilalbés puido poñer terra de por medio en cousa de dez minutos contra un Paiosaco que igualou a contenda antes do tempo de lecer con dous goles de Otero. No segundo tempo, Villares fixo o terceiro para os locais e o segundo na súa conta particular asinando tres puntos que os achegan á permanencia xa case de xeito matemático.

Recuperando efectivos. 

Malia poder acusar o cansazo logo do partido do domingo en Laracha, Yago Iglesias terá á súa disposición a case todos os xogadores para recibir ao Racing Vilalbés. O ribeirense recuperará para o partido a Miki, Piscu e Aythami, que caeu da última convocatoria xusto antes do partido por enfermidade. Por contra, seguirá unha semana máis fóra dos terreos de xogo Samu, cuxa volta podería estar moi preto. 

Calor e fútbol.

Mércores festivo e con previsión de calor nun Vero Boquete que podería presentar unha boa imaxe logo da iniciativa posta en marcha polo clube pola cal cada aboado puido retirar, ata hoxe, dúas invitacións. Por outro lado, as entradas nas billeteiras terán un prezo de 10 euros mentres que os menores de 18 anos pasan de balde.

Quen non poida asistir ao encontro poderá seguilo a través das contas de Twitter tanto da Curva Branquiazul coma do clube así como escoitalo en directo a través de 'Esedé Radio', na web oficial do clube. 

Semana importante

O Compos arrinca este domingo unha semana un tanto diferente e, sobre todo, importante. Os de Yago Iglesias terán que pelexar en ata tres partidos en cousa de oito días, algo que non pasaba dende o arrinque do curso, co equipo aínda vivo na Copa do Rei. Tres partidos de liga nos que se podería pechar o primeiro obxectivo, que non é outro que a clasificación para a promoción de ascenso de xeito matemático, e buscar o segundo, que é revalidar o campionato da Terceira división.

Esta nova serie de tres partidos arrinca o domingo no Municipal de Laracha. O Laracha, segundo filial do Deportivo, é xa equipo de Preferente logo do descenso do Fabril, buscará pechar a súa presenza na Terceira cun triunfo diante dun Compos coa única intención de recuperar o camiño da vitoria lonxe do Vero Boquete de San Lázaro.

Os primeiros en descender.

O Laracha, equipo con convenio de filialidade co Deportivo, asinou o seu descenso administrativo á Preferente galega hai xa dúas semanas. Un equipo que estaba a facer un bo curso ocupando a día de hoxe o 16º posto na táboa. Sen xa nada en xogo, un equipo que quere pechar o curso deixando unha boa lembranza aos seus afeccionados.

Con 36 puntos logo de 33 partidos xogados, o cadro larachés asinou un total de 9 triunfos, boa parte deles na casa, e outros tantos empates. Un equipo que puxo contra as cordas aos grandes da categoría, conseguindo empatar contra equipos coma Bergantiños, Arosa ou UD Ourense entre outros e gañando, no Municipal de Laracha, a un Choco que foi de menos a máis ao longo da tempada. Por outro lado, 15 derrotas totais cun 3-0 en contra na Senra que supuxo a súa derrota máis avultada. En canto a goles, anotaron un total de 34 tantos sendo un dos conxuntos con menos acerto de cara a porta pero compensando isto cos só 39 goles en contra, que o sitúan no sétimo posto de equipos con mellor defensa só superados polos catro primeiros e os dous conxuntos da cidade de Ourense.

No Municipal de Laracha, os de Óscar Gilsanz conseguiron unha boa parte dos seus puntos. Ata 23 puntos quedaron no feudo larachés grazas a 6 triunfos, entres os que destacar o 3-0 contra o Arenteiro sendo a vitoria con mellor resultado con outros 4 pola mínima, e 5 empates, con só un partido sen goles e o resto repetindo o empate a un gol. Por outro lado, un total de 5 derrotas, todas elas pola mínima.

A nivel individual, Adrián está a sobresaír no equipo a base de goles. O canteirán do Depor suma 7 tantos e dous deles nas dúas últimas xornadas, buscando o seu terceiro tanto consecutivo e chamar ás portas do Fabril de cara á vindeira campaña.

Tres de oito.

Esta será a novena saída do Compos neste 2019. Oito saídas atrás que se pecharon con só 3 triunfos, 2 empates e 3 derrotas conseguindo puntuar por última vez fóra do vero Boquete hai máis dun mes, no Couto contra a UD Ourense e sendo a única vitoria a domicilio dende febreiro. Ao anterior hai que engadir que os nosos só puideron anotar 2 goles nas 4 últimas citas lonxe de Santiago.

Un Compos moi diferente ao que xoga diante da súa afección e que non só non foi quen de superar con crecer os últimos encontros, sen perder en toda a segunda volta, senón que, ademais, non recibiu ningún gol nas tres últimas citas. 

Pola súa parte, o Laracha leva puntuando nas dúas últimas xornadas, gañando ao Silva e empatando sen goles diante do Céltiga. Un equipo que, no Municipal, conseguiu 8 puntos de 21 posibles perdendo ata en tres ocasións sempre pola mínima, incluíndo un 2-3 contra o Bergantiños con dous goles dos carballeses nos quince últimos minutos. 

Volta á vitoria?

O Compos buscará este domingo volver ao camiño do triunfo a domicilio recuperando as boas sensacións perdidas en Santa Mariña. E é que o equipo de Yago Iglesias non encadea dúas vitorias consecutivas dende que gañou a Racing de Ferrol, UD Ourense e Porriño Industrial en marzo. E despois do triunfo, con máis acerto que bo xogo, contra o Arenteiro, o equipo quere seguir polo bo camiño. 

Pola súa parte, o Laracha quere encadear a terceira xornada seguida sen perder diante da súa afección por segunda vez, logo de catro vitorias consecutivas na casa dende o mes de setembro e ata outubro convertindo ao equipo nunha sorpresa importante no primeiro treito do campionato colocándose na sexta praza con once xornadas xogadas.

O Municipal, campo complicado. 

Ata en catro ocasións visitou o Compos o Municipal de Laracha nos últimos anos. Un territorio onde se asinou unha gran goleada alá polo ano 2007 mais que se foi complicando nas recentes campañas. Dun 3-6 ata a vitoria pola mínima do pasado curso pasando por un partido sen goles nun campo complicado para os homes de Yago Iglesias, os cales conseguiron os tres puntos o ano pasado grazas a un gol de Róber.

En canto á primeira volta, no Vero Boquete, a Esedé abriu a lata cun gol de Iago en propia porta mentres que Aythami asinou o segundo e Brais Abelenda pechou a vitoria co terceiro xa no segundo tempo. Mosquera, xa co encontro pechado, fixo o único gol dos laracheses. 

Domingo, mércores, domingo.

O Compos terá que enfrontar ata tres partidos de liga en cuestión de oito días. Unha semana que pode marcar o treito final para un equipo que pode seguir pelexando pola primeira posición, pechando a súa clasificación para a promoción conseguida xa de xeito virtual, ou ben perder as opcións de seguir a estela do Racing de Ferrol e ocupar as cinco xornadas que restan ata o final do curso para preparar un posible novo ascenso á categoría de bronce do fútbol español.

Comezando esta lista co Laracha, o mércores pasará polo Vero Boquete un Racing Vilalbés que case se pode dicir que non pelexará por máis que dar unha boa nova á súa afección no 'Día do traballador'. A semana rematará coa visita branquiazul á Senra para visitar a un Ribadumia inmerso na pelexa pola permanencia, con Tomás nas súas filas.

Casas volve. Miki e Samu, caen.

Logo da estrea de Alberto no centro do campo a pasada xornada diante do Arenteiro, Yago Iglesias conta a día de hoxe con só dúas baixas. E é que recupera tamén a Álvaro Casas para o centro da defensa mentres que perderá, unha semana máis, a Miki, aínda esperando o alcance da súa lesión sufrida contra o Choco en Santa Mariña, e a Samu. Podería volver tamén ao equipo Álvaro Naveira despois dunha xornada de sanción e chegando a este partido sen apercibidos que se puideran perder o enfrontamento contra o Racing Vilalbés do vindeiro mércores.

Horario xa habitual. 

O Laracha-Compos terá lugar este domingo no Municipal de Laracha ás 18 horas. Un bo partido para o que as entradas terán un prezo de 10 euros para os afeccionados branquiazuis que queiran desprazarse. 

Por contra, quen non poida asistir, poderá seguirse a través das contas de Twitter tanto da Curva Branquiazul coma do clube. Ademais, poderá verse en directo a través da TVG. 

Santo fútbol

A Semana Santa déixanos dúas cousas: vacacións e fútbol. E é que o xoves, case sen tempo para asimilar a dura derrota colleitada en Santa Mariña, abrirá de novo as súas portas o Vero Boquete de San Lázaro para recibir ao Arenteiro nun partido entre dous equipos con aspiracións moi diferentes e que queren encamiñar, cando antes, os seus obxectivos.

Un Compos que buscará seguir sumando de tres na casa, con resultados cada vez mellores, e esquecer a derrota diante do Choco e un Arenteiro que depende de si mesmo para asinar a permanencia na Terceira por segundo ano consecutivo.

Pendentes do arrastres.

O Arenteiro está a facer unha boa tempada co obxectivo de manterse, por segundo ano consecutivo, na Terceira división. Regulares tanto na casa coma a domicilio, pecharon boa parte dos seus partidos con empates, sendo o equipo que máis rematou con reparto de puntos. 

Ocupando a 14ª posición da clasificación, o cadro do Carballiño conseguiu un total de 38 puntos grazas a 9 triunfos e 11 empates, asinando case os mesmos puntos tanto na casa coma a domicilio. Ademais, 12 derrotas do equipo dirixido por Gelucho perdendo 6 veces en Espiñedo e outras tantas fóra. En canto aos goles, trátase dun equipo que fai valer cada gol despois de anotar 34 goles e que só 5 quedaran sen valor. Por contra, recibiron outros 43 goles deixando a súa porta a cero ata en 7 ocasións incluíndo o empate sen goles entre Arenteiro e Compos en Espiñedo na primeira volta. 

Lonxe de Espiñedo conseguiron un total de 18 puntos, dous menos que na casa. 4 triunfos, entre o que destaca o conseguido no Couto diante do Ourense CF, e 6 empates, co 2-2 como resultado máis repetido, avalan a un equipo moi perigoso e que basea o seu xogo na defensa aínda máis cando sae do Carballiño. Ademais, 6 derrotas, 4 delas pola mínima, asinando a última no mes de febreiro na Senra contra o Ribadumia de Tomás Abelleira. 

A nivel individual, nun equipo liderado polo ex branquiazul Portela, está a destacar Hugo Sanmartín. O dianteiro vigués mantén ben situado ao equipo a base de goles logo de asinar 13 goles facendo un total de 4 dobretes e anotar 7 tantos a domicilio. 

No Vero Boquete é outra cousa. 

O Compos está a ter problemas para puntuar a domicilio nas últimas xornadas. A derrota da pasada fin de semana, coa que perdeu unha ocasión inmellorable para achegarse ao máis alto, en Santa Mariña non foi o primeiro pau recibido polos nosos lonxe do Vero Boquete. E é que a Esedé só asinou 1 dos últimos 9 puntos en xogo fóra de Santiago. Uns datos moi diferentes ao conseguido na casa, onde só asinou un empate fronte ao Paiosaco nun partido que se definiu no engadido. A iso hai que engadir os 21 goles a favor nos 5 últimos xogos como local. 

Pola súa parte, o Arenteiro chega de sumar de tres en Espiñedo contra o Paiosaco nun xogo que se definiu no segundo tempo. Un equipo que quere sacar de Santiago os tres puntos despois de 3 saídas sen perder. 

En canto ao partido da primeira volta, o resultado foi de empate sen goles. Espiñedo non puido gozar dunha boa tarde de fútbol nun partido onde mandaron os nosos sobre o verde mais no que ningún equipo soubo materializar as ocasións, escasas e sen perigo real. 

Precedentes positivos.

Os enfrontamentos entre Compos e Arenteiro remataron con moi bos resultados en Santiago, tanto en Santa Isabel e no Vero Boquete. Os nosos conseguiron un total de 5 vitorias e 1 empate que data de 1986. Partidos que remataron con importantes goleadas dos nosos entre as que destacar un 5-0 e un 4-0 na última visita do equipo carballiñés á capital galega, a pasada tempada, con goles de Alex Ares, Primo, Róber e Ube. 

En liña ascendente. 

Dende a visita do Racing de Ferrol a Santiago, os resultados dos nosos na casa foron en aumento. Catro goles diante do cadro verde, outros cinco diante do Porriño e seis para pechar o triunfo contra o Boiro. Tres goleadas consecutivas e dúas xornadas, as dúas últimas, nas que nin sequera houbo goles en contra. 

Ao anterior hai que engadir o gran momento polo que pasa Aythami. O dianteiro canario foi autor de 3 goles contra o Boiro, 4 contra o Porriño, 1 contra o Racing, Alondras, Ourense CF, Ribadumia, Laracha, Choco e Céltiga. Un dos máximos artilleiros do campionato que medra diante da súa afección. 

Naveira cae da lista.

Á lista de baixas por lesión, que ocupan Alberto, Chechu e Samu, hai que engadir outra ausencia importante para este xoves. Naveira, dono da banda esquerda, non poderá estar contra o Arenteiro despois de ver o quinto cartón amarelo en Santa Mariña. 

Xoves de festa. 

Por mor da Semana Santa e con intención de dar uns días de lecer ao equipo para afrontar mellor o treito final do curso, esta xornada adiántase ao xoves. Un xoves no que o Vero Boquete abrirá as súas portas para dar comezo ao partido ás 18 horas. Un gran xogo no que as entradas terán un prezo de 10 euros para non aboados mentres que será de balde para aboados e menores de 18 anos. 

Quen por contra non se poida achegar ao teatro dos soños branquiazul poderá seguir o encontro a través das contas de Twitter tanto da Curva Branquiazul coma do clube. Ademais, poderá escoitarse en directo a través da 'Esedé Radio', na web oficial. 

Campo imposible?

A día de hoxe só quedan dous campos en toda a categoría nos que ninguén foi quen de gañar no que vai de curso. Un é A Malata, onde os nosos conseguiron un punto logo dun xogo sen goles e con ocasións de serio perigo entre moito respecto. O outro é Santa Mariña, campo do que saíron con empate a metade dos equipos que por alí pasaron pero no que ninguén puido sumar de tres con Bergantiños, Barco e UD Ourense, entre outros, sufrindo incluso para facer un punto.

Por outro lado, un Compos que na casa vai a golpe de goleada nas últimas datas e que quere non só ser o primeiro en gañar en Redondela senón, ademais, conseguir a cuarta vitoria a domicilio deste ano 2019.

O dobre de puntos na casa.

Un dos grandes equipos cando xoga diante da súa afección, con números semellantes aos feitos polos equipos da parte alta da táboa, pero con rexistros a domicilio que o poderían situar entre os postos de serio perigo neste final de liga. O Choco, agora mesmo na zona media da clasificación, quere aínda manterse nunha loita pola cuarta posición aínda sen dono e con ata cinco equipos con opcións pechando esta lista o cadro redondelán, a 5 puntos da UD Ourense. Un equipo que, ademais, pechou na Porta Santa unha xeira de 15 xornadas consecutivas sen perder.

47 puntos manteñen ao equipo dirixido por Gonzalo Fernández na oitava posición da táboa nunha segunda volta con moito aínda en xogo tanto na parte alta coma na baixa. Un equipo que, en total, asinou 12 vitorias, 11 empates e 8 derrotas sendo, xunto co Arenteiro, o equipo con máis repartos de puntos da categoría. Por outro lado, trátase dun equipo con gol logo de anotar 48 tantos sendo o cuarto equipo con máis acerto, mentres que en defensa ata once equipos recibiron menos dos 39 encaixados polos redondeláns.

Diante da súa afección, trátase dun dos equipos máis fortes do campionato, cunha forte defensa e un gran acerto de cara a portería. É así que o Choco non encaixou ningunha derrota en Santa Mariña no que vai de tempada mais, non obstante, asinaron un total de 7 empates contra rivais coma Bergantiños, UD Ourense ou Barco, repetindo o empate a 2 nas citas contra os dous conxuntos da provincia ourensá. Por outro lado, 8 vitorias entre as que destacan as goleadas fronte Racing Vilalbés e Céltiga, facendo cinco e seis goles respectivamente.

A nivel individual, é inevitable non destacar a Félix. O vigués, autor do único gol do Choco na Porta Santa, suma un total de 14 goles supoñendo outros tantos puntos para os seus. Non obstante, é un dianteiro que só puido facer 6 deses tantos diante da súa afección acertando máis a domicilio.

Dende abril.

15 de abril de 2018. Nada en xogo en Redondela. Choco e Ribadumia medían forzas a estas alturas do campionato a pasada tempada. O Ribadumia, con Josiño no once titular, adiantouse superado o cuarto de hora de xogo grazas a un gol de Miguel. Unha vitoria que arrincaba así e que remataba, non sen sufrir, cun gol de Rubén Cerqueiras para os visitantes nos intres finais do tempo regulamentario.

Dende esa derrota, hai case un ano, o Choco non volveu caer na casa en partido de liga. Pecharon o pasado curso cun empate fronte ao Racing Vilalbés e unha vitoria contra o Barbadás acabando coas opcións de permanencia do cadro dos Carrís e comezaron o presente cun empate sen goles diante do Arenteiro. A partires de aí, o que xa se comentou antes. Sen derrotas e cunha vitoria máis ca empates.

15 xornadas sen perder.

Dende o 2 de decembro, cando non puideron sacar nada positivo fronte ao Racing de Ferrol, e ata a derrota na Porta Santa a pasada fin de semana, o Choco estivo catro meses sen perder. 7 vitorias e 8 empates avalan a un equipo que, por contra, pechou a súa gran xeira de resultados contra o Paiosaco nun partido no que chegaron con vitoria ao treito final, onde os laracheses, con dous goles de Iván Amor, conseguiron darlle a volta ao resultado.

Por contra, o Compos chega de golear a un Boiro que non tivo opción, por debaixo no marcador dende os minutos iniciais do encontro. Un novo triunfo cunha gran exhibición de Aythami, que suma 8 goles nos 3 últimos partidos xogados no Vero Boquete, mentres que a domicilio non o fai dende hai mes e medio.

Historia branquiazul.

Compos e Choco enfrontáronse nun total de 11 ocasións ata o momento cun claro ton branquiazul nos resultados. De feito, o Choco só foi quen de gañar aos nosos nunha ocasión: en San Lázaro o pasado ano con goles de Gabi e Chiqui. A parte, 6 triunfos para os nosos e 4 empates sempre con goles deixando claro que aos nosos non se lles dá nada mal ver portería contra os redondeláns.

En Redondela, 2 vitorias e 3 empates, sempre con goles dos dous equipos. De feito, o primeiro triunfo dos nosos diante do Choco, alá por 1963, chegou con goleada por 1-7 mentres que o segundo foi en decembro de 2017 grazas aos goles de Tomás e Primo nun partido que rematou con gol de Pablo Couñago xa no engadido.

Falando do último partido entre Compos e Choco, no Vero Boquete na primeira volta, a vitoria quedou na capital galega. Un triunfo con goleada incluida e que quedou practicamente sentenciado aos quince minutos cos goles de Brais Abelenda, Alex Ares e Aythami. Xa no segundo tempo anotou o cuarto Mon e Félix fixo o tanto da honra para os seus minutos máis tarde.

Tres ausencias importantes.

Para este domingo, Yago Iglesias contará coa baixa xa máis que coñecida dun Alberto que xa comeza a adestrar co resto dos seus compañeiros pensando no treito final do campionato. Ao centrocampista hai que engadir as ausencias doutros dous xogadores que xa non puideron estar diante do Boiro e que supoñen dúas baixas moi importantes. Samu e Chechu, ámbolos dous pendentes de evolución ao longo da semana, apuntan a que terán que ver o partido dende a bancada de Santa Mariña.

Primeiro en cinco días.

O Compos arrincará en Redondela este domingo o primeiro partido en cinco días xa que o xoves, día festivo, terá que recibir no Vero Boquete ao Arenteiro. En Santa Mariña, o encontro dará comezo ás 17 horas e as entradas terán un prezo de 13 euros para os afeccionados branquiazuis.

Para quen non poida asistir ao encontro, poderá seguirse a través das contas de Twitter tanto da Curva Branquiazul coma do clube.

Puntos vitais

Rematado o 'Tourmalet', lonxe do mellor resultado posible, toca a parte máis dura do campionato. A liga regular está na súa fase final, onde xa se definen tanto os postos pola parte máis alta do campionato como pola parte baixa. E nada mellor para demostrar a necesidade de gañar tanto por facerse co posto máis privilexiado da táboa ou ben por saír dos postos de descenso á Preferente que un partido no Vero Boquete entre o terceiro clasificado e o penúltimo nunha loita que se presume máis igualada do que realmente di a clasificación.

Con opcións.

O Boiro ven de facer unha segunda volta para esquecer. Os agora adestrados por Luis Santiago, que se sentará no banco boirense por segunda vez dende a súa fichaxe, non gañan dende hai máis de mes e medio, cando o fixeron en Barraña fronte ao Somozas, e a domicilio dende xaneiro, no Municipal da Laracha pola mínima. Dúas vitorias ás que sumar outros tres empates chegando a esta cita con 9 dos últimos 33 puntos en xogo. Unha xeira que sitúa ao equipo nos postos de descenso mais con aínda opcións de salvar unha categoría na que suman a súa segunda tempada consecutiva logo dun descenso administrativo.

28 puntos sitúan ao cadro boirense só por enriba do Porriño Industrial e a 4 puntos dun Céltiga que, a día de hoxe e sen ter en conta posibles arrastres, marca os postos de permanencia. Un Boiro que pechou a primeira volta fóra dos postos de descenso caendo en picado acumulando un total de 6 xornadas sen conseguir a vitoria. En total, 7 vitorias e outros tantos empates sacando algo positivo da Lomba e As Eiroas, ademais de conseguir un punto contra os nosos, e gañando todos os seus encontros pola mínima. Ao anterior hai que engadir outras 16 derrotas. En canto a goles, 28 a favor e 53 en contra que os colocan como o segundo equipo con menos acerto e o terceiro que máis encaixa.

Un equipo sempre difícil en Barraña e que xa puido dar máis dunha dor de cabeza a domicilio. Conquistado o Candocia, A Cheda e o Municipal de Laracha, os de Luis Santiago empataron na Magdalena, A Lomba, As Eiroas, A Senra e O Couto. Por outro lado, en canto ás derrotas, 7, chegaron sempre despois de recibir 2 ou máis goles con só 2 pola mínima.

Presidente e o máximo goleador. Changui, que cumprirá 42 anos nuns días, segue perforando porterías cando non se encarga de dirixir un Boiro cuxo mando tomou a escasas horas da máis que posible desaparición dun histórico do fútbol galego hai case 2 anos. A día de hoxe, despois de 28 partidos xogados polo ex dianteiro da Esedé, suma un total de 10 goles sendo, de lonxe, o máximo artilleiro boirense e o xogador con máis calidade das filas dun equipo que non se lle dá de todo ben ao Compos.

Vellos coñecidos.

Se xa na primeira volta había que contar ata catro defensas no Boiro con pasado do Compos e un dianteiro, agora hai que contar unha peza máis ás ordes de Luis Santiago que coñece ben ao seu rival deste domingo así como o terreo de xogo onde se xogará moito.

Paco e Pablo Vidal polas bandas e Cardeñosa e Ander no centro da zaga buscan evitar os goles rivais mentres que Changui, no ataque, ocúpase de manter con vida a un equipo en horas baixas. Entre uns e outro hai outra peza importante no centro do campo. Ube, que volverá á Esedé de cara á vindeira tempada, xa duplicou os minutos xogados cos nosos durante a primeira volta sen conseguir aínda ver portería.

Ata o final.

Se hai algo que está a marcar os partidos do Compos son os minutos finais. Os 15 últimos minutos de cada partido aumentan os nervios na familia branquiazul e cada xogada supón unha gran oportunidade de recibir un gol e, en moitas ocasións, estragar o feito ata o momento. Un guión que se repetiu en partidos importantes coma o do Bergantiños ou o da pasada fin de semana en Calabagueiros, onde o equipo fixo unha boa segunda metade perdoando as mellores ocasións.

Pola súa parte, o Boiro é todo o contrario. O equipo do Barbanza supón un gran perigo nos intres finais logo de anotar un total de 7 goles nos 5 últimos minutos. O último sen tempo de reacción chegou a pasada fin de semana para empatar en Barraña contra o Paiosaco logo de ir perdendo 0-2 no minuto 77, con ata dous goles de Xacobe para facer un punto importante contra un rival directo.

Un rival sempre complicado.

Compos e Boiro levan véndose as caras dende 1986, cando o noso equipo visitou o Barbanza por primeira vez. Dende aquela cita, un total de 13 enfrontamentos entre a Terceira e a Preferente, da que ascenderon da man en 2012. Un emparellamento que non deixou moi bos resultados no Vero Boquete dende hai 29 anos, cando o Compos conseguiu a segunda vitoria diante dos boirenses despois de facer o propio en Santa Isabel tres anos antes.

No que vai de século, un empate e unha derrota en San Lázaro para os nosos, que buscarán repetir o feito en Barraña o pasado ano grazas a dous goles de Primo e un de Santi. Ademais, na primeira volta repetiuse o empate co 1-1 no luminoso, resultado máis repetido entre os dous, con tantos de Casas en propia porta e Piscu.

Aythami volve á casa.

Aythami fixo un bo partido fronte ao Barco mais sen conseguir ver porta, malia intentalo. O canario, máximo goleador do equipo e situado xa entre os tres xogadores con máis goles do grupo, volve á casa, onde adoita celebrar a meirande parte dos seus goles. 

Catro goles contra o Porriño e un contra Racing, Alondras, Ourense CF, Ribadumia, Laracha, Choco e Céltiga. 11 dos seus 17 tantos totais foron nun Vero Boquete que non se cansa de celebrar os seus goles. Un xogador que anotou en tódolos partidos que xogou en Santiago dende que en novembro non puido facelo na vitoria pola mínima contra o Barco. 

Rubén, baixa segura. 

Para esta cita importante, Yago Iglesias contará con só unha baixa segura, a de Rubén, mentres que Alberto xa está adestrando buscando recuperarse da súa lesión que o ten apartado do resto do equipo dende o arrinque do curso obrigado a pasar por quirófano hai case dous meses. A parte, non haberá baixas por sanción con Sergio Pereira xa 'limpo' de amoestacións mentres que Naveira chega con 4 e non podería estar fronte ao Choco en Santa Mariña. 

Domingo de tarde. 

Un día despois de que no Vero Boquete se xogue o segundo encontro da 'Rolda élite' do Europeo feminino sub-19 coa selección española como protagonista, Compos e Boiro pisarán o verde para un partido que dará comezo ás 18 horas. As entradas para o enfrontamento terán un prezo de 10 euros para non aboados mentres que será de balde tanto para aboados branquiazuis coma para menores de 18 anos. 

Para quen non poida achegarse ao feudo branquiazul, poderá seguirse o partido a través das contas de Twitter tanto da Curva Branquiazul coma do clube. Tamén se poderá escoitar en directo na 'Esedé Radio', na web oficial do clube.

Fin do 'tourmalet'

O 'tourmalet' branquiazul toca ao seu fin este domingo para dar comezo ao treito final da tempada, no que os nosos buscarán certificar a súa clasificación para a promoción de ascenso por segundo ano consecutivo. Diante, un Centro de Deportes Barco que quere a súa segunda vitoria deste 2019 e a súa terceira xornada consecutiva sen perder, encamiñando o seu mellor momento en moito tempo. Dúas xeiras en xogo no que será o final do 'tourmalet' para a Esedé e o comezo para os de Valdeorras, aínda con opcións de entrar entre os catro primeiros.

De máis a menos.

O Barco foi na primeira volta un dos grandes equipos da categoría, ocupando o posto que a día de hoxe é para o Compos. Non obstante, nas 10 primeiras xornadas desta segunda volta, o equipo baixou o nivel e a intensidade do xogo con 5 empates e 4 derrotas, gañando só en Calabagueiros contra un Silva que tamén quere facerse co cuarto posto, único que a día de hoxe parece non ter un dono claro con ata cinco equipos que pelexarán por el ata o final de liga. Un histórico do fútbol galego que quere chegar por primeira vez na súa historia á categoría de bronce intentando superar o seu cuarto posto, insuficiente para ascender, en 1989.

Quintos clasificados, superando na táboa a equipos coma Alondras e Arosa, con 46 puntos e a só 3 dunha UD Ourense que pasa polo peor momento da súa exitosa historia. Un grande do fútbol ourensán que asinou un total de 13 vitorias, só 1 nesta segunda volta, 7 empates e 9 derrotas. O cuarto máximo goleador da categoría, con 45 tantos, e que recibiu tantos coma os nosos, 34, deixando a súa porta a cero en 10 ocasións.

Fortes na casa, sendo o quinto mellor local do grupo, media liga superan os seus números cando sae de Calabagueiros. Con 18 puntos de 42 posibles, gañaron nos campos dos equipos que pelexan por sobrevivir na Terceira ademais da Grela e no Couto, superando ao Ourense CF, sempre na primeira volta. Por outro lado, non asinaron o seu primeiro empate ata decembro repartindo puntos co Choco, Vilalbés e Paiosaco. Por contra, volveron sen nada de 6 citas, caendo por máis dun gol de diferenza na Malata e o Candocia, anotando un gol en ámbolos dous casos.

A nivel individual, no cadro valdeorrés destacan dous xogadores polo gran traballo feito en labores ofensivas. Juanito fixo un total de 13 tantos mentres que David Álvarez asinou un total de 11 sendo os dous uns fixos no once xogando gran parte dos minutos nos plans de Manolo Pérez.

O mellor momento.

Os dous equipos chegan a esta cita no mellor momento da segunda volta, polo menos a nivel de resultados. E é que os dous veñen de puntuar nas últimas semanas co Compos achegándose ao primeiro posto da clasificación, algo que parecía case imposible no arrinque da segunda volta. Tres triunfos consecutivos, e a mira posta no cuarto, fan que o equipo teña o máis alto a tiro. Pola súa parte, o Barco quere a súa terceira xornada consecutiva sen perder e a segunda vitoria en Calabagueiros.

A Esedé parecía contar con problemas en defensa nos minutos finais dos partidos recibindo goles xa sen tempo de reacción privándoos da vitoria fronte Paiosaco e Bergantiños. Uns erros que se arranxaron para superar ao Racing de Ferrol nun gran partido, malia recibir ata 3 goles, e que se mantivo nas vitorias contra a UD Ourense no Couto e o Porriño Industrial no Vero Boquete encadeando dúas xornadas consecutivas sen recibir gol por terceira vez esta tempada.

Pola súa parte, o Barco acabou cunha xeira de 10 xornadas sen gañar coa vitoria en Calabagueiros diante dun Silva que chegaba directo á loita pola cuarta posición. Menos sorte tiveron á hora de sacar algo positivo da Porta Santa, onde recibiron un gol no comezo do segundo tempo e tiveron que asinar o empate a vinte minutos para o final malia xogar cun home menos pola expulsión de Marchena.

Valdeorras, terra imposible.

Nun total de 13 ocasións mediron forzas Compos e Barco, 6 deses enfrontamentos con sede no Barco de Valdeorras. Un pobo onde, ao longo da historia, nunca gañou o equipo branquiazul. De feito, de 18 puntos posibles, só 2 chegaron a Santiago grazas aos últimos empates con Yago Iglesias no banco do equipo santiagués.

Despois de catro derrotas entre 1987 e 1990, a chegada do adestrador ribeirense supuxo tamén a consecución de dous empates consecutivos nun campo historicamente imposible para un Compos que segue sen ser quen de sumar de tres. Dous empates nos que se repetiu o 1-1 no marcador con goles de Diego Rey e Omar Navarro, neste caso en propia porta para igualar o resultado hai un ano con menos de cinco minutos para o final.

Máis sorte houbo para gañar no Vero Boquete na primeira volta despois de case 30 anos do último triunfo branquiazul fronte aos valdeorreses. Un gol de Brais Abelenda foi suficiente para deixar sen nada a un Barco que chegaba nun gran momento para medirse contra un Compos que non saiu ben parado do 'tourmalet' da primeira volta.

E fin!

A parte supostamente máis dura toca ao seu fin. Os rivais máis duros do grupo xa se enfrontaron cos nosos e os resultados non puideron ser mellores. O empate contra o Bergantiños para comezar e as vitorias contra Racing de Ferrol, UD Ourense e Porriño con só a derrota diante do Arosa nun mal partido.

O Barco, pola súa parte, arrincará o seu 'tourmalet' particular contra o Compos. Despois, Arosa, Racing de Ferrol, Ourense, Porriño Industrial e Bergantiños puidendo ser de boa axuda para os intereses dos nosos na loita polo primeiro posto.

Dúas baixas máis.

Xa con Alex Ares recuperado totalmente e dispoñible para ser titular e a sanción de Brais Abelenda superada, Yago Iglesias poderá ter ao seu cargo a dúas das pezas máis importantes. Por contra, perderá a Rubén por lesión, cuxo tempo de recuperación é aínda descoñecido, e Sergio Pereira, que viu o quinto cartón amarelo fronte ao Porriño Industrial. Os dous únense a Alberto, que está a piques de rematar o prazo de recuperación para volver ao verde.

Por outro lado, Naveira chega a esta cita con catro cartóns amarelos, polo que podería perderse o partido contra o Boiro de ver o quinto.

Os primeiros en xogar.

O Compos non será o que abra a xornada mais si será o primeiro dos que pelexan polo primeiro posto da clasificación que salte ao terreo de xogo. Calabagueiros abrirá as súas portas para un partido que dará comezo ás 17:15h, un horario un tanto inusual para os encontros dos nosos, mentres que o UD Ourense-Racing de Ferrol e o Somozas-Bergantiños arrincarán 45 minutos máis tarde. As entradas terán un prezo de 13 euros en venda anticipada, que se poden adquirir no Vero Boquete, e 15 euros nas billeteiras do campo ourensán.

Por contra, quen non poida achegarse ao Barco de Valdeorras poderá seguir o encontro a través das contas de Twitter tanto da Curva Branquiazul coma no do clube.

Un paso máis

Entramos nas dez últimas xornadas do campionato. A recta final arrinca e a parte máis importante do campionato chega logo de superar a primeira parte do 'tourmalet' branquiazul, no que aínda quedan dous enfrontamentos contra rivais que buscarán evitar que a xeira de vitorias vaia a máis. E o primeiro que quere evitar que aumente a conta a tres triunfos consecutivos é un Porriño Industrial que visitará o Vero Boquete con poucas opcións de salvarse na que está a ser a súa volta á Terceira división despois de trece anos de ausencia. Un pechacancelas que chega, ademais, despois de gañar na casa ao Paiosaco e empatar, quince días atrás, fronte ao Alondras nun partido sen goles.

Un duro rival.

Malia pechar a clasificación, o Porriño Industrial demostrou ao longo da tempada ser un duro rival, poñendo as cousas difíciles na primeira volta aos equipos da parte alta, algo que non queda reflexado na actualidade fronte aos serios problemas cos que contan á hora de marcar gol sendo o equipo con menos acerto de cara á porta rival.

Ocupando o derradeiro posto na táboa con só 15 puntos, gañaron ata o de agora un total de 3 partidos contra Racing Vilalbés e Paiosaco tanto na primeira coma na segunda volta. A iso hai que engadir outros 6 empates conseguindo nos dous enfrontamentos do campionato empatar sen goles contra o Alondras. Por contra, caeron nun total de 19 enfrontamentos sufrindo as maiores goleadas na Lomba e fronte ao Racing de Ferrol, ámbolos dous casos perdendo por tres goles de diferenza. En canto aos goles, trátase do equipo con menos tantos a favor, con 23, e o segundo que máis encaixa, con 51 en contra, só superado polo Céltiga.

Un equipo que fixo gran parte dos seus puntos no Lourambal e que, cando saiu do Porriño, non foi quen de encadear bos resultados. De feito, non puntúan lonxe da casa dende que o fixeron por última vez no mes de outubro, na Porta Santa coa vitoria pola mínima diante do Paiosaco. Antes, dous empates sen goles na Magdalena e no Morrazo sendo incapaces de superar os 7 goles a favor e quedando sen marcar a domicilio dende o mes de xaneiro, cando caeron 5-4 na Senra contra o Ribadumia.

A nivel individual, contan cun grupo que mestura xuventude e experiencia entre os que está a destacar, polos seus goles, Richi. Autor de 4 goles, o dianteiro de Ponteareas é un fixo no once porriñés na súa segunda campaña na que busca aumentar a súa conta particular, que inaugurou a pasada tempada facendo 14 goles na Preferente Sur.

Dous campións.

O Vero Boquete de San Lázaro recibirá este domingo a dous campións da Terceira división. O Compos, vixente campión da categoría facéndose co título por quinta vez, e o Porriño Industrial, que fixo o propio hai 20 anos quedando ás portas do ascenso que asinou nese mesmo grupo a Ponferradina.

Non obstante, malia sumar entre os dous equipos un total de 41 tempadas na Terceira galega, nunca antes se viron as caras en partido oficial en Santiago, si no Lourambal no partido no que mediron forzas na primeira volta. Ese único precedente, que data do mes de outubro, rematou con vitoria branquiazul grazas aos goles de Álvaro Casas e Aythami, este último cunha gran definición superando a un gardamallas que non puxo as cousas nada doadas.

Unha semellanza.

Hai moitas diferenzas con respecto ás chegadas dos dous conxuntos a este partido, xa que nin o Compos partía naquela cita dende os postos de promoción de ascenso nin o Porriño o facía nos de descenso, dúas cousas que cambiaron logo dos 90 minutos. Non obstante, si hai un dato que se pode comparar con este momento e é o cadro que actuará de visitante, o conxunto porriñés, chega despois de sumar de tres, algo que fixo tamén na primeira volta. 

O Compos, que na primeira volta chegaba a esta cita despois de empatar na Malata fronte ao Racing e na casa contra a UD Ourense, chega agora en mellor forma e, sobre todo, con mellores sensacións e resultados. Con dúas vitorias consecutivas e só pensando nunha terceira, o equipo de Yago Iglesias está nun momento de forma envexable e quere aproveitar unha nova oportunidade para seguir recortando distancias con respecto a Bergantiños e Racing de Ferrol, a 2 e 3 puntos respectivamente e que se enfrontarán entre eles nas Eiroas este mesmo domingo.

Pola súa parte, o Porriño Industrial ven de facer o mesmo que na novena xornada de liga. O Paiosaco convertiuse na vítima favorita dos de Manuel Losada superándoos tanto na primeira coma na segunda volta. Nesta ocasión, a pasada fin de semana, conseguírono grazas a un gol de Edu no segundo tempo. Unha vitoria que esperan acompañar do que sería o seu primeiro punto neste 2019 a domicilio, sendo incapaces de puntuar na Grela, no Salvador Otero, no Couto nin na Senra, onde caeron fronte ao Ribadumia por 5-4 sendo, ademais, a única saída desta segunda volta na que conseguiron ver portería.

Penúltima parada.

É o momento de botar unha ollada ao feito polos nosos neste 'tourmalet' que chegará ao seu fin a vindeira fin de semana en Calabagueiros. Unha serie de resultados que nada teñen que ver co feito na primeira volta, na que os nosos conseguiron un total de 8 puntos dos 18 en xogo. Nesta segunda parte do campionato, as cousas son tan diferentes ata o punto de que o equipo encadea 7 puntos con aínda dous enfrontamentos por disputar.

O Compos arrincaba esta parte crucial do campionato terceiro con 4 puntos sobre o quinto clasificado, igualado co cuarto e a 6 de Racing e Bergantiños despois do empate contra o Paiosaco. Unha serie de xogos que comezou co empate 'in extremis' nas Eiroas recibindo un gol no tempo engadido. Unha sorte que empeorou á seguinte fin de semana na Lomba encadeando a segunda terceira xornada sen gañar fronte a un rival que se adiantaba dende os once metros logo de xogar gran parte do encontro cun home menos. As boas sensacións, por contra, volveron no partido contra o Racing de Ferrol onde se puido vivir unha exhibición de Alex Ares suficiente para volver ao camiño da vitoria e evitar que os departamentais puideran afastarse na clasificación. E a cousa mellorou cun triunfo histórico no Couto diante da UD Ourense cun partido moi completo dos nosos.

Neste gran momento de forma do campionato hai que salientar unha peza que foi fundamental. Aythami Perera foi autor dos dous goles diante do Bergantiños e foi quen de abrir a lata contra o Racing de Ferrol, nunha goleada que completaría Alex Ares cun 'hat-trick'. O canario, que tivo que ser substituido no Couto por precaución, suma un total de 13 goles na súa conta e 6 nos últimos 6 partidos que xogou, conseguindo en Carballo o seu primeiro dobrete do curso.

Brais Abelenda, ausencia importante.

Brais Abelenda terá un merecido, e obrigado, descanso este domingo. O atacante branquiazul cumprirá ciclo de amoestacións logo de ver a quinta no Couto. O de Bembibre acompañará a Alberto na bancada, aínda lesionado, ocupando o posto que a pasada fin de semana tiña Mon, que volve estar dispoñible para o adestrador logo dunha semana de sanción. Outro que tamén podería volver, despois de ausentarse por lesión a pasada fin de semana, é Alex Ares.

Por outro lado, Naveira e Sergio Pereira chegan apercibidos de sanción logo de ter vistos 4 cartóns amarelos cada un.

Volta á normalidade. 

Despois do máis duro, volvemos á normalidade no Vero Boquete. O domingo, o teatro dos soños branquiazul abrirá as súas portas para acoller un encontro que dará comezo ás 17 horas. Un partido para o que as entradas volverán ao seu prezo habitual de 10 euros con aboados e menores de 18 anos completamente de balde. 

Por contra, quen non poida achegarse ao estadio, poderá seguirse o encontro a través das contas de Twitter tanto da Curva Branquiazul coma a oficial do clube. Ademais, poderá escoitarse en directo a través de 'Esedé Radio', na web oficial do clube.