Longa viaxe

O Compos, novo líder do grupo 1 da Terceira división, volverá este mércores á Copa do Rei tres anos despois. Unha estrea no campionato do KO dun equipo que terá que xogar a competición a domicilio por segunda ocasión consecutiva buscando superar a primeira fase, algo que non se ve en Santiago dende o ano 2000, cando os nosos conseguiron a súa última vitoria en dito torneo. 

Diante estará un equipo do grupo 12 da mesma categoría, único equipo do nivel que podía tocar aos nosos no torneo. Un Mensajero que non sabe aínda o que é gañar no que vai de curso logo de dous empates consecutivos repetindo, ademais, resultado en ámbalas dúas citas.

Empate. 

Ao igual que os nosos, o Mensajero suma xa dúas xornadas de liga xogadas e, polo de agora, non tiveron que lamentar ningunha derrota. Non obstante, tampouco conseguiron encadear ningunha vitoria no que vai de torneo con dous empates ante o Unión Viera a domicilio e El Cotillo na súa estrea diante da afección palmeira por repetindo o 1-1 no marcador ao final dos 90 minutos.

Un equipo que pechou o pasado curso no segundo posto da clasificación e que estará na competición xa que o campión do seu mesmo grupo non foi outro que o filial do Tenerife, exento deste torneo. Logo da fase regular, sen sorte, caeron na primeira fase contra un Atlético Sanluqueño que si conseguiu acadar o obxectivo do ascenso de categoría.

A nivel individual hai que destacar a presenza de xogadores importantes coma Yeray. Chegado ao cadro vermello hai xa seis anos procedente do Coruxo, foi autor de 27 goles a pasada tempada sendo unha parte moi importante á hora de conseguir o bo resultado dos seus. Non obstante, o gol desta tempada leva os nomes de Víctor e Vianney. 

Un meigallo de 18 anos. 

Dende o 13 de decembro do ano 2000 o Compos non sabe o que é gañar un partido de Copa do Rei. Cinco participacións e cinco derrotas logo de superar hai 18 anos ao Getafe en San Lázaro por 3-0, caendo na seguinte rolda contra un Celta que superara antes, curiosamente, ao Mensajero pola mínima. 

Alavés, Oviedo, Deportivo, Zamora e Tudelano foron quen de superar a un Compos que chega con ilusión a un torneo onde conseguiu acadar os cuartos de final no ano 2000 caendo goleado diante do Espanyol a dobre partido.

Pola súa parte, o Mensajero volve á competición na que participou en 12 ocasións despois de tres anos de ausencia, edición na que superaron ao Rayo Majadahonda na primeira fase caendo diante do Cádiz na segunda. Un equipo que nunca foi quen de superar a terceira rolda do campionato, á que chegou en tres ocasións.

Baixas e dúbidas.

Yago Iglesias manterá para este encontro as baixas xa máis que coñecidas de Rubén e Alberto. Non obstante, a lista definitiva de 16 homes que viaxarán ás Canarias podería quedar xa pechada coas dúbidas de Álvaro Casas, que non puido estrearse aínda en partido oficial por problemas físicos, e Alex Ares, que rematou a cita contra o Céltiga tocado. 

Lleida ou Teruel. 

En terras ilerdenses xogarán o mesmo día Lleida e Teruel. Outro partido pertencente á primeira fase entre dous equipos da Segunda B e do que sairá o rival do gañador da nosa eliminatoria na segunda rolda. Ademais, non só se coñecerá ao rival senón que tamén a sede do encontro, que se xogará en Catalunya ou Aragón obrigando a un longo desprazamento. 

Proximidade?

Antes de realizarse o sorteo, a RFEF fixo pública unha lista de catro grupos entre equipos que entraban nesta primeira eliminatoria por proximidade xeográfica, a mesma coa que se organizaron os grupos da Segunda B este curso e pola que os conxuntos galegos terán que visitar ao filial do Las Palmas.

Con Vigo, Castela e León, Madrid e Canarias nas posibilidades e despois dun primeiro sorteo invalidado no que o rival branquiazul sería o Rápido de Bouzas... saiu a bola en primeiro lugar do Mensajero, único Terceira posible, obrigando aos nosos a facer unha viaxe de 2 000 quilómetros en avión e sen traxecto directo. 

Xa de volta ao partido, a cita será o mércores ás 17:30 hora local, 18:30 na nosa terra, no Estadio Silvestre Carrillo de La Palma. O encontro poderá seguirse en directo a través da web de Footters previo pago de 2,99 euros.