O Compos asinou o pase aos oitavos de final da Copa Deputación nun partido onde foi claramente superior ao rival, o Puebla. Noventa minutos onde a efectividade non se fixo presente, sobre todo no primeiro tempo, mais o equipo conseguiu un triunfo cómodo grazas aos acertos de Marcos Remeseiro, Josiño Filgueira e Brais Abelenda, asinando máis goles por parte das novas pezas, despois do feito por Miki Villar o pasado sábado contra o Coruxo.
Faltou acerto.
Contra un Puebla inferior, que pouco puido facer para evitar unha goleada. Aínda así, logo dun aviso que puido evitar Lorenzo, o gol non chegou durante os primeiros corenta e cinco minutos con Aythami buscando abrir a súa conta particular coa camisola branquiazul, un gol que, de novo, se fai de rogar.
Ás do canario hai que engadir tamén as oportunidades de Mon, cuxo tiro saiu por enriba da portería, e outra de Rubén, cun disparo cruzado que non entrou por milímetros. Non obstante, a ocasión máis clara foi un gol mal anulado aos nosos por un suposto fóra de xogo cando a pelota chegada dos pés dun contrario.
Os trocos melloraron o encontro.
Na segunda metade, máis do mesmo coa diferenza de que nos cinco trocos realizados nos vinte primeiros minutos entraron os tres xogadores que, por sorte, si conseguiron ver portería certificando o pase aos oitavos nos intres finais do enfrontamento. De feito, catro dos recén entrados ao terreo de xogo fabricaron o primeiro gol.
Un roubo de Samu no centro do campo, unha parede con Josiño, cesión para Santi e asistencia para Remeseiro. O primeiro gol do Compos na Copa Deputación, cun final fermoso despois dunha gran xogada en equipo na que interviron dúas das novas fichaxes.
E é que os novos parecen ter collido o ritmo ben ao fútbol dos nosos. Como mostra, unha posible asistencia de Josiño Filgueira para Santi, que non foi quen de ver porta por moi pouco, e unha ocasión de Brais Abelenda que sacou baixo paus un defensa despois de superar ao porteiro cun caneo.
Protagonista da anterior xogada, o ex do Racing de Ferrol tamén participou no segundo gol cunha gran asistencia cun pase da morte para Josiño Filgueira, que non perdoou marcando a pracer case sen tempo posible para unha reacción local que nunca chegou. E marcou o terceiro batendo ao porteiro no man a man pechando unha actuación moi notable en algo menos de media hora que tivo sobre o terreo de xogo.
Agora, o equipo terá que preparar a cita do sábado contra o Pontevedra na Escravitude, no 'II Torneo Vila de Padrón', ademais do encontro de oitavos desta mesma competición contra o Noia.
ALIÑACIÓN: Lorenzo; Saro, Casas, Uña, Sergio Pereira; Ube (Remeseiro, min. 54), Mon (Samu, min. 54); Alex Ares, Miki Villar (Josiño Filgueira, min. 64), Rubén (Abelenda, min. 64); e Aythami (Santi, min. 64).
CARTÓNS: -.
GOLES: 0-1 69' Remeseiro, 0-2 82' Josiño Filgueira, 0-3 90' Abelenda.
CAMPO: Da Alta.
Ningún comentario:
Publicar un comentario