Entran os grandes

A Copa Deputación segue o seu transcurso e chega a hora dos grandes. Os equipos da Segunda B, no caso do Fabril, e Terceira galega entran en acción o vindeiro mércores con partidos interesantes entre os que destacar o que xogarán os nosos na Pobra do Caramiñal fronte a un recén ascendido á Preferente norte. Será, ademais, o segundo ano consecutivo no que os nosos visiten o Campo da Alta.

O Bertamiráns, superado. 
O Puebla entrou na competición enfrontándose a un duro Bertamiráns que non deixou as cousas nada doadas malia non contar co seu equipo titular, xogando con varios futbolistas da base. Un partido non exento de polémica no que os pobrenses chegaron a poñerse 0-3 no marcador cumprida a hora de xogo. Non obstante, o cadro local buscou manterse con opcións grazas a dous goles en menos de dez minutos e que os deixaban, cun cuarto de hora para o final, a un gol dos penaltis. Non obstante, as esperanzas amesás duraron non máis de dous minutos, coa chegada do cuarto gol visitante, obra de Jorge Viturro asinando así o seu terceiro gol na súa conta particular e o pase dos seus á seguinte fase da competición.
Foi un partido no que, ademais, se enfrontaron dous ex xogadores da base branquiazul: Silva no Bertamiráns e Aguado polo Puebla, equipo que prepara o ex adestrador da Esedé Anxo Casalderrey.

Segundo ano consecutivo. 
O pasado verán, o Compos visitou tamén a Pobra do Caramiñal. Un partido correspondente ao Trofeo Conde de Fenosa e que os nosos trouxeron cara á capital grazas a unha vitoria pola mínima con goles de Tomás e o xuvenil Yago, remontando así o gol inicial asinado por Viturro.
Por contra, será a primeira ocasión na que se vexan as caras na Copa Deputación logo da eliminación do Puebla a pasada tempada a mans do Noia, que días despois remataría co camiño dos nosos na competición na primeira oportunidade.

Primeira competición.
Despois do Triangular de Praíña, no que os nosos deixaron moi boas sensacións, chega a primeira proba importante na que Yago terá que buscar o seu primeiro once titular para os noventa minutos despois do bo facer das novas fichaxes en Pontevea. Un partido no que ver, tamén, o estado físico dos nosos logo de semana e media de preparación.

Sen moitas sorpresas. 
Sen equipos da Terceira na competición, as posibles maiores sorpresas foron a eliminación nos penaltis do Órdenes a mans do Flavia despois do 3-3 nos 90 minutos. Ademais, no lado do cadro polo que vai o Compos, hai que falar do pase do Arzúa, que se enfrontará ao Bergantiños, e do Eume Deportivo, que fará o propio fronte ao Laracha.
En oitavos, o gañador do Puebla-Compos terá que xogar contra o vencedor do Flavia-Noia.

Primeiro, entre semana. 
O partido está marcado para o 1 de agosto, mércores, ás 19:30 horas, horario xa oficial, no Campo da Alta. Para este encontro, ao igual que no resto da competición, as entradas terán un prezo de 5 euros para maiores de 18 anos e de balde para menores de idade.