Tres semanas son moitas sen o noso Compos e para iso chega unha cita extra que acurta un pouco unha moi longa espera. Un amigable moi preto da casa que servirá para lembrar a figura de Jesús García Calvo e os 50 anos de Feiraco, empresa que fundou alá por 1969. Negreira acollerá un agasallo de Reis por adiantado e permitirá ver aos nosos unha semana antes da volta á competición oficial.
Con máis rodaxe.
O Negreira chega a esta cita amigable, a primeira proba para este 2019 que arrincou esta mesma semana, en horas baixas ocupando un posto na zona media da táboa no grupo 1 da Preferente. Despois de 20 xornadas, o equipo dirixido por Juan Cabrejo, que chegou ao equipo acompañando a Nacho e cubrindo agora o seu posto como primeiro adestrador, ocupa a décimo segunda posición da táboa con 25 puntos, lonxe dos postos de descenso. 8 vitorias, só 1 empate contra o Atlético Arteixo e 11 derrotas para un equipo que anota case os mesmos goles que recibe, facendo 25 e encaixando 26.
Un equipo con representación branquiazul xa que o ex lateral está acompañado no corpo técnico polo ex defensa e ex coordinador da base da Esedé David Rey e contan na dianteira con Rubén Márquez. O dianteiro segue pelexando aos seus 33 anos despois de pasar polas filas do conxunto santiagués, Bergantiños, Boiro e Céltiga entre outros, e asinou un total de 2 goles en 3 partidos.
Un Compos superior.
Tanto a historia como a situación actual dos dous equipos sitúan ao Compos por enriba do Negreira. Equipos de diferente categoría actualmente mais que compartiron a Terceira división ata en catro ocasións na última década deixando enfrontamentos cheos de emoción aínda que sen tanta igualdade sobre o verde.
Ao longo da historia recente, oito enfrontamentos entre veciños nos que a Esedé levou os tres puntos en sete ocasións, deixando opcións aos negreireses nunha soa cita, na que conseguiron facerse cun empate no García Calvo. Un total de 18 goles a prol do cadro branquiazul ante os 3 únicos tantos feitos polo equipo vermello.
A domicilio, os nosos asinaron o único resultado non tan positivo cun empate a un gol. A parte, alí chegou unha das grandes alegrías dos últimos anos en forma de gol. Hai só uns meses, en abril do xa pasado 2018, a falta de catro xornadas para o final do campionato regular, os nosos deixaban a tiro o primeiro posto grazas a un gol de penalti de Alex Ares xa no tempo engadido. Un gol que deixaba máis que encamiñado o obxectivo, que se conseguiría dúas semanas despois no Carballiño.
Proba para a segunda volta.
Cun equipo aínda cunha cita para pechar a primeira volta e o outro coa segunda parte do campionato xa comezada, o enfrontamento servirá para medir as forzas dos dous equipos despois das vacacións de Nadal e comprobar, agora con tempo, se serán precisas incorporacións para afrontar a segunda parte do curso, a máis dura e importante.
E para iso, Yago poderá ter ao seu mando a todos os seus xogadores agás Alberto, que aínda terá que esperar para poder estrearse esta tempada. Non obstante, as boas novas chegan para o xogador, xa que a súa longa recuperación está chegando ao seu fin, adestrando xa co resto dos seus compañeiros.
Memorial polo que pasaron grandes equipos.
O Memorial Jesús García Calvo, torneo que contou con algún equipo importante coma o caso do Deportivo, gañador en dúas ocasións. O Compos buscará facerse con este premio despois de só dous días de adestramentos nunha cita tan especial como esta, que supón ademais unha homenaxe aos 50 anos de Feiraco.
O partido dará comezo este mesmo venres 4 ás 20 horas no García Calvo de Negreira e as entradas terán un prezo de 5 euros. Por contra, quen non poida achegarse á vila negreiresa poderá seguir o encontro a través das redes sociais da Curva Branquiazul e do clube.
Ningún comentario:
Publicar un comentario